ທ່ານນາຍົກລັດຖະມົນຕີ ຫງວຽນເຕີນຢູ້ງ ກ່າວຄຳເຫັນທີ່ກອງປະຊຸມ
(ພາບ: Đức Tám – TTXVN)
|
(vovworld) – ຕອນເຊົ້າວັນທີ 23/6, ຢູ່ສູນກອງປະຊຸມສາກົນ ມຽນມາ ທີ່ນະຄອນຫຼວງ Nay Pyi Taw, ທ່ານນາຍົກລັດຖະມົນຕີ ຫງວຽນເຕີນຢູ້ງ ພ້ອມກັບທ່ານປະທານາທິບໍດີ ມຽນມາ Thein Sein, ທ່ານນາຍົກລັດຖະມົນຕີ ກຳປູເຈຍ Hunsen, ທ່ານນາຍົກລັດຖະມົນຕີລາວ ທອງສິງ ທຳມະວົງ, ທ່ານນາຍົກລັດຖະມົນຕີ ໄທ ປຣາຢຸດ ຈັນໂອຈາ ແລະ ທ່ານເລຂາທິການໃຫຍ່ ອາຊຽນ ເລເລືອງມິງ ເຂົ້າຮ່ວມກອງປະຊຸມໂອ້ລົມສົນທະນາກັບຜູ້ຕາງໜ້າເຂດວິສາຫະກິດ ACMECS. ປະຊາຄົມວິສາຫະກິດ ACMECS ສະແດງຄວາມພາກພູມໃຈຍ້ອນກອງປະຊຸມສຸດຍອດ ACMECS ຄັ້ງນີ້ໄດ້ຮັບຮອງເອົາແຜນການເຄື່ອນໄຫວໄລຍະ 2016 – 2018 ດ້ວຍ 8 ຂົງເຂດຮ່ວມມືບຸລິມະສິດ, ພ້ອມທັງສະເໜີບັນດາການນຳ ACMECS ສຸມໃສ່ເຂົ້າໃນ 6 ຂົງເຂດຮ່ວມມືຈຸດສຸມ, ໃນນັ້ນສ້າງເງື່ອນໄຂສະດວກຊຸກຍູ້ການຄ້າ ແລະ ການລົງທຶນ, ຍູ້ແຮງການຮ່ວມມືດ້ານກະສິກຳ… ກ່າວຄຳເຫັນທີ່ການໂອ້ລົມສົນທະນາ, ທ່ານນາຍົກລັດຖະມົນຕີ ຫງວຽນເຕີນຢູ້ງ ພ້ອມກັບບັນດາການນຳ ACMECS ຕີລາຄາສູງ ແລະ ຮັບຮູ້ບັນດາຂໍ້ສະເໜີທີ່ມີຜົນປະໂຫຍດຂອງສະພາດຳເນີນທຸລະກິດ ACMECS. ທ່ານນາຍົກລັດຖະມົນຕີ ຫງວຽນເຕີນຢູ້ງ ໄດ້ໄຈ້ແຍກຄວາມສາມາດບົ່ມຊ້ອນ, ທ່າແຮງຂອງ 5 ປະເທດສະມາຊິກ ACMECS ຢ່າງລະອຽດ ເພື່ອຍົກສູງບົດບາດ ແລະ ທີ່ຕັ້ງໃນການຜະລິດ ແລະ ສະໜອງທົ່ວໂລກ, ພິເສດແມ່ນໃນການເຊື່ອມຕໍ່ລະຫວ່າງ ອາຊີຕາເວັນອອກສ່ຽງໃຕ້ ແລະ ບັນດາຕະຫຼາດກ້ວາງໃຫຍ່ກ່ວາຄື: ຈີນ ແລະ ອິນເດຍ, ໝາກຜົນແຫ່ງການຮ່ວມມື ACMECS:
“ການຮ່ວມມື ACMECS ບໍ່ພຽງແຕ່ຕິດພັນນ້ຳໃຈມິດຕະພາບ, ຄວາມສາມັກຄີລະຫວ່າງບັນດາປະເທດບ້ານໃກ້ເຮືອນຄຽງເທົ່ານັ້ນ, ຫາກຍັງສ້າງໂອກາດພັດທະນາໃໝ່ໃຫ້ແກ່ບັນດາວິສາຫະກິດພາຍໃນ ແລະ ນອກພາກພື້ນອີກດ້ວຍ. ຂ້າພະເຈົ້າເຊື່ອໝັ້ນວ່າ ພວກທ່ານຈະບໍ່ພາດກາລະໂອກາດອັນດີງາມນີ້ເພື່ອບັນລຸຜົນສຳເລັດ. ຂ້າພະເຈົ້າປາດຖະໜາຈະໄດ້ຮັບການຕອບສະໜອງຢ່າງຕັ້ງໜ້າດ້ວຍການກະທຳລະອຽດຈາກພວກທ່ານ, ຍ້ອນຄວາມວັດທະນາຖາວອນ ແລະ ການພັດທະນາຢ່າງແຮງ ແລະ ຍືນຍົງຂອງ 5 ປະເທດພວກເຮົາ.”