(vovworld) - ວັນທີ 28/6, ທ່ານຮອງນາຍົກລັດຖະມົນຕີຫວຽດນາມ Hoang Trung Hai ໄດ້ເຮັດວຽກກັບການນຳຫຼັກແຫຼ່ງແຂວງ ຮ່ວາບິນ ກ່ຽວກັບສະພາບການພັດທະນາເສດຖະກິດ - ສັງຄົມ. ກ່າວຄຳເຫັນທີ່ການເຮັດວຽກ, ທ່ານຮອງນາຍົກລັດຖະມົນຕີ Hoang Trung Hai ຕີລາຄາສູງບັນດາຜົນງານທີ່ແຂວງ ຮ່ວາບິນ ບັນລຸໄດ້ໃນ 6 ເດືອນຜ່ານມາ. ເຖິງວ່າແມ່ນແຂວງພູດອຍ, ແຕ່ທາງແຂວງ ໄດ້ມີບັນດາບາດກ້າວຫັນໂຄງປະກອບເສດຖະກິດ ຈາກກະສິກຳ ຫັນໄປສູ່ອຸດສາຫະກຳ, ອັດຕາຄົນທຸກຍາກອຶດຫິວໄດ້ຫຼຸດລົງຍັງເຫຼືອເກືອບ 27%, ຮັບປະກັນຈຸດໝາຍກ່ຽວກັບການຮັບປະກັນຊີວິດສັງຄົມ. ທ່ານຮອງນາຍົກລັດຖະມົນຕີສະເໜີໃຫ້ແຂວງ ຮ່ວາບິນ ຄວນປະຕິບັດບັນດາມາດຕະການພັດທະນາເສດຖະກິດ ຄືແນວໃດໃຫ້ສົມເປັນແຂວງຢູ່ທິດຕາເວັນຕົກຂອງນະຄອນຫຼວງ. ແຂວງຄວນກວດກາຄືນການວາງແຜນກຳນົດຕົວເມືອງ, ຜະລິດອຸດສາຫະກຳ, ກະສິກຳ, ປັບປຸງສະພາບແວດລ້ອມແຫ່ງການລົງທຶນ ດ້ວຍເລື່ອງປະຕິຮູບລະບຽບການບໍລິຫານ ເພື່ອຮຽກ ຮ້ອງການລົງທຶນ, ສົມທົບບັນດາໂຄງການຈຸດໝາຍແຫ່ງຊາດ, ຫຼີກລ້ຽງການຊ້ອນກັນ ເພື່ອຮັບປະກັນໃຫ້ປະຊາຊົນມີຊີວິດດີກ່ວາອີກ.