(vovworld) - ວັນທີ 4/10, ຢູ່ທີ່ຮ່າໂນ້ຍ, ໃນການຕ້ອນຮັບຜູ້ວ່າການລັດ Hessen ແຫ່ງສາທາລະນະລັດສະຫະພັນເຢຍລະມັນ ທ່ານ Volker Bouffier ທີ່ພວມຢູ່ຢ້ຽມຢາມຫວຽດນາມ, ທ່ານຮອງນາຍົກລັດຖະມົນຕີຫວຽດນາມ Nguyen Thien Nhan ຫວັງວ່າ ອຳນາດການປົກຄອງລັດ Hessen ສືບຕໍ່ສົ່ງເສີມ, ໜູນຊ່ວຍບັນດາວິສາຫະກິດເຂົ້າມາຫວຽດນາມ ລົງທຶນດຳເນີນທຸລະກິດ ກໍຄືສະໜັບສະໜູນ ແລະ ສ້າງເງື່ອນໄຂສະດວກໃຫ້ແກ່ບັນດາວິສາຫະກິດຫວຽດນາມ ທີ່ພວມເຄື່ອນໄຫວຢ່າງມີປະສິດທິຜົນຢູ່ລັດ Hessen. ທ່ານຮອງນາຍົກລັດຖະມົນຕີ ໄດ້ຢືນຢັນຄວາມຕັດສິນໃຈຂອງລັດຖະບານຫວຽດນາມ ໃນການກໍ່ສ້າງ ແລະ ພັດທະນາມະຫາວິທະຍາໄລ ຫວຽດນາມ - ເຢຍລະມັນ ໃຫ້ກ່າຍເປັນມະຫາວິທະຍາໄລອັນດັບໜຶ່ງຂອງຫວຽດນາມ. ຄາດວ່າຮອດປີ 2016 ໂຮງຮຽນແຫ່ງນີ້ຈະຖືກນຳເຂົ້າເຄື່ອນໄຫວ. ທ່ານຮອງນາຍົກລັດຖະມົນຕີ ກໍສະເໜີໃຫ້ອຳນາດການປົກຄອງລັດ Hessen ສືບຕໍ່ສະໜັບສະໜູນ ສ້າງຕັ້ງສູນບຳລຸງສ້າງວິຊາອາຊີບຢູ່ພາກເໜືອ ເພື່ອແນໃສ່ປະກອບສ່ວນຍົກສູງຄຸນນະພາບແຫຼ່ງຊັບພະຍາກອນມະນຸດຂອງຫວຽດນາມ ພ້ອມທັງສະໜອງຄົນງານໃຫ້ແກ່ບັນດາວິສາຫະກິດເຢຍລະມັນ ແລະ ຕ່າງປະເທດທີ່ພວມເຄື່ອນໄຫວຢູ່ຫວຽດນາມ.
ພາຍຫຼັງການຕ້ອນຮັບ, ທ່ານຮອງນາຍົກລັດຖະມົນຕີ Nguyen Thien Nhan ແລະ ຜູ້ວ່າການລັດ Hessen, Volker Bouffier ໄດ້ລົງນາມໃນບົດບັນທຶກຊ່ວຍຈຳກ່ຽວກັບການຮ່ວມມືພິເສດລະຫວ່າງຫວຽດນາມ ແລະ ລັດ Hessen. ເນື້ອໃນຂອງບົດບັນທຶກຊ່ວຍຈຳ ຊີ້ແຈ້ງວ່າ ສອງຝ່າຍຈະຊຸກຍູ້ການເພີ່ມທະວີການຮ່ວມມືໃນບັນດາຂົງເຂດຄື; ເສດຖະກິດ, ການຄ້າ, ການລົງທຶນ, ພື້ນຖານໂຄງລ່າງ, ວິທະຍາສາດ, ເຕັກນິກ, ເຕັກໂນໂລຊີ, ຄົມມະນາຄົມຂົງສົ່ງ, ວັດທະນະທຳ, ການສຶກສາບຳລຸງສ້າງ, ກິລາ ແລະ ທ່ອງທ່ຽວ.