ແລະກໍໃນວັນທີ 20/6, ຄະນະຜູ້ແທນຫວຽດນາມ ໂດຍທ່ານຮອງນາຍົກລັດຖະມົນຕີ Nguyen Thien Nhan ນຳໜ້າ ໄດ້ເຂົ້າຮ່ວມພິທີໄຂກອງປະຊຸມ Rio + 20, ຢູ່ນະຄອນ Rio de Janeiro ປະເທດ Brazil. ຄາດວ່າ, ຕອນບ່າຍວັນທີ 21/6 (ຕາມເວລາທ້ອງຖີ່ນ), ທ່ານຮອງນາຍົກລັດຖະມົນຕີ Nguyen Thien Nhan ຈະມີບົດກ່າວປາໄສທີ່ສຳຄັນ, ເນັ້ນໜັກເຖິງບັນດາການປະກອບສ່ວນຂອງຫວຽດນາມ ກ່ຽວກັບການພັດທະນາແບບຍືນຍົງ ໃນ10 ຜ່ານມາ ກໍຄືສະແດງທັດສະນະ ກ່ຽວກັບຍຸດທະສາດພັດທະນາແບບຍືນຍົງໃນອະນາຄົດ.
ກ່ອນໜ້ານັ້ນ, ຕອນຄຳວັນທີ 19/6 (ຕາມເວລາທ້ອງຖີ່ນ), ທ່ານຮອງນາຍົກລັດຖະມົນຕີ Nguyen Thien Nhan ໄດ້ເຂົ້າຮ່ວມ ແລະ ກ່າວປາໄສທີ່ວາລະປະຊຸມ ທີ່ມີຫົວຂໍ້ວ່າ “ຕີລາຄາພະລັງງານທົ່ວໂລກ” ໂດຍໂຄງການພັດທະນາສະຫະປະຊາຊາດ (ຫຼື UNDP) ຈັດຕັ້ງຂຶ້ນ. ທ່ານຮອງນາຍົກລັດຖະມົນຕີຢັ້ງຢືນການປະກອບສ່ວນສຳຄັນເຂົ້າໃນວິວັດການພັດທະນາ ແລະ ປ່ຽນໃໝ່ຂອງຫວຽດນາມ ແມ່ນການສູ້ຊົນຂອງຫຼາຍຂະແໜງການ, ທ້ອງຖີ່ນ, ວົງຄະນະຍາດ, ໃນນັ້ນຂະແໜງພະລັງງານມີບົດບາດສຳຄັນທີ່ສຸດ. ເຖິງຢ່າງໃດກໍຕາມ, ຂອບຂະໜາດ ແລະ ປະສິດທິຜົນຂອງຂະແໜງພະລັງງານຍັງຕຳ່ຢູ່, ມັນສະແດງໃຫ້ເຫັນຢູ່ຕົວເລກຄາດໝາຍ ສະເລ່ຍໃສ່ຫົວຄົນຍັງຕຳ່ ເມື່ອທຽບໃສ່ລະດັບສະເລ່ຍໃສ່ຫົວຄົນຂອງໂລກ. ຄວາມໝັ້ນຄົງດ້ານພະລັງງານຢູ່ຫວຽດນາມ ຍັງບໍ່ທັນໄດ້ຮັບປະກັນ. ເລື່ອງລົງທຶນພັດທະນາໄຟຟ້າຢູ່ເຂດຊົນນະບົດ, ເຂດພູດອຍ, ເຂດທະເລໝູ່ເກາະ, ເຂດຫ່າງໄກຊອກຫຼີກ ຍັງປະສົບກັບຄວາມຫຍຸ້ງຍາກຫຼາຍຢ່າງ. ປະຈຸບັນ, ຫວຽດນາມ ພວມສ້າງຍຸດທະສາດເຕີບໂຕຂຽວເພື່ອພັດທະນາເສດຖະກິດແບບຍືນຍົງ, ນຳໃຊ້ພະລັງງານຢ່າງມີປະສິດທິຜົນ ແລະ ພັດທະນາຮູບການພະລັງງານຜະລິດຄືນໃໝ່. ທ່ານຮອງນາຍົກລັດຖະມົນຕີ Nguyen Thien Nhan ເນັ້ນໜັກວ່າ: ເພື່ອພັດທະນາພະລັງງານແບບຍືນຍົງ, ຫວຽດນາມ ຕ້ອງການໄດ້ຮັບການໜູນຊ່ວຍດ້ານການເງິນ, ເຕັກໂນໂລຢີຂອງວົງຄະນະຍາດສາກົນໃນບາງບັນຫາຄື: ວິທີການ ແລະ ວາງແຜນສັງລວມພະລັງງານແຫ່ງຊາດ, ເຂດ, ທ້ອງຖີ່ນ, ບັນດາວິທີການພະລັງງານທົດແທນທີ່ມີປະສິດທິຜົນຄື: ພະລັງງານປະລະມານູ, ແຮງລົມ, ແຮງຕາເວັນ…