( vovworld ) - ຕອນບ່າຍວັນທີ 28/6, ຢູ່ສຳນັກງານລັດຖະບານ, ທ່ານ Nguyen Xuan Phuc, ກຳມະການກົມການເມືອງ, ຮອງນາຍົກລັດຖະມົນຕີ ໄດ້ໃຫ້ການຕ້ອນຮັບຄະນະຜູ້ແທນຜູ້ມີຄຸນງາມຄວາມດີຕໍ່ການປະຕິວັດນະຄອນຕາມກີ່, ແຂວງກວາງນາມ ເນື່ອງໃນໂອກາດທີ່ຄະນະມາຢ້ຽມຢາມນະຄອນຫຼວງຮ່າໂນ້ຍ, ເຂົ້າຢ້ຽມຂໍ່ານັບສຸສານປະທານໂຮ່ຈິມິນ. ທີ່ການຕ້ອນຮັບ, ທ່ານຮອງນາຍົກລັດຖະມົນຕີ ໄດ້ສະແດງຄວາມເອກອ້າງທະນົງໃຈຕໍ່ມູນເຊື້ອວິລະຊົນ, ອົງອາດ, ກ້າແກ່ນບໍ່ຍອມຈຳນົນ, ລຳບາກກາກກຳ ແລະ ເສຍສະຫຼະຊີວິດເພື່ອຄວາມເອກະລາດແຫ່ງຊາດຂອງບ້ານເກີດເມືອງນອນຕາມກີ່ - ກວາງນາມ ແລະ ເນັ້ນໜັກວ່າ: ຍາມໃດ ພັກ, ລັດ ກໍເຄົາລົບ ແລະ ຈົດຈຳບຸນຄຸນຕໍ່ການອຸທິດສ່ວນທີ່ໃຫຍ່ຫຼວງຂອງປະຊາຊົນທຸກຊັ້ນວັນນະ, ແມ່ຫວຽດນາມ ວິລະຊົນ, ທະຫານເສຍອົງຄະ ແລະ ຄອບຄົວນັກຮົບເສຍສະຫຼະຊີວິດເພື່ອຊາດຢູ່ດິນແດງແຫ່ງນີ້, ເຊິ່ງໄດ້ປະກອບສ່ວນສຳຄັນເຂົ້າໃນບັນດາຜົນງານຂອງປະເທດຊາດ. ທ່ານຮອງນາຍົກລັດຖະມົນຕີສະເໜີໃຫ້ຄະນະພັກ, ອຳນາດການປົກຄອງນະຄອນຕາມກີ່ ແລະ ແຂວງກວາງນາມ ສືບຕໍ່ເອົາໃຈໃສ່ເບິ່ງແຍງດູແລຊີວິດການເປັນຢູ່ໃຫ້ແກ່ຜູ້ມີຄຸນງາມຄວາມດີຕໍ່ການປະຕິວັດ, ຮັບປະກັນຊີວິດການເປັນຢູ່ຂອງເຂົາເຈົ້າທຽບເທົ່າ ຫຼື ສູງກວ່າລະດັບປານກາງຂອງປະຊາຊົນທ້ອງຖິ່ນ. ພິເສດແມ່ນເອົາໃຈໃສ່ເບິ່ງແຍງດູແລ ແລະ ຮັບໃຊ້ການປິ່ນປົວສຸຂະພາບໃຫ້ແກ່ບັນດາແມ່ຫວຽດນາມ ວິລະຊົນ ເພື່ອໃຫ້ແມ່ຫວຽດນາມ ວິລະຊົນມີຄວາມສຸກ. ນີ້ແມ່ນການຕອບບຸນແທນຄຸນຂອງລູກຫຼານທີ່ມີຕໍ່ຄົນລຸ້ນກ່ອນໆ.