ຮອງນາຍົກລັດຖະມົນຕີ ຟ້າມບີ່ງມີງ ເຮັດວຽກກັບ ແຂວງ ກອນຕຸມ
(ທ່ານຮອງນາຍົກລັດຖະມົນຕີ ຟ້າມບີ່ງມີງ
ເຮັດວຽກກັບແຂວງ ກອນຕຸມ)
(vovworld) – ໂດຍສືບຕໍ່ການປະຕິບັດງານຢູ່ບັນດາແຂວງ ໄຕງວຽນ, ຕອນບ່າຍວັນທີ 10/3, ທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ຟ້າມບີ່ງມີງ, ໄດ້ມີການເຮັດວຽກກັບການນຳແຂວງ ກອນຕຸມ ກ່ຽວກັບສະພາບເສດຖະກິດ-ສັງຄົມ, ການປ້ອງກັນຊາດ ປ້ອງກັນຄວາມສະຫງົບ ແລະ ການເຄື່ອນໄຫວວຽກງານພົວພັນຕ່າງປະເທດຂອງທ້ອງຖິ່ນ. ທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ຟ້າມບີ່ງມີງ ໄດ້ຍ້ອງຍໍຊົມເຊີຍ, ຕີລາຄາສູງຄວາມມານະພະຍາຍາມຂອງແຂວງ ກອນຕຸມ ໃນການພັດທະນາເສດຖະກິດ-ສັງຄົມ, ຮັບປະກັນການປ້ອງກັນຊາດ ປ້ອງກັນຄວາມສະຫງົບ ແລະ ວຽກງານພົວພັນຕ່າງປະເທດ. ທ່ານຮອງນາຍົກລັດຖະມົນຕີ ເນັ້ນໜັກວ່າ: ກອນຕຸມ ແມ່ນແຂວງໜຶ່ງດຽວຂອງປະເທດທີ່ມີເສັ້ນຊາຍແດນຕິດກັບ 2 ປະເທດ ລາວ ແລະ ກຳປູເຈຍ, ແຂວງຄວນສືບຕໍ່ບັນດາການເຄື່ອນໄຫວພົວພັນຕ່າງປະເທດເປັນຢ່າງດີ, ເພີ່ມພູນຄູນສ້າງສາຍພົວ ພັນທີ່ເປັນມູນເຊື້ອຕື່ມອີກ, ກໍ່ສ້າງເສັ້ນຊາຍແດນສັນຕິພາບ, ມິດຕະພາບພ້ອມກັນພັດທະນາ. ທ່ານຮອງນາຍົກລັດຖະມົນຕີ ໃຫ້ຮູ້ວ່າ: ລັດຖະບານກໍ່ໄດ້ພິຈາລະນາເພີ່ມແຫຼ່ງທຶນໜູນຊ່ວຍພັດທະນາຢ່າງເປັນທາງການ ແລະ ເພີ່ມການໜູນຊ່ວຍໃນຂົງເຂດການສຶກສາ, ບຳລຸງສ້າງສຳລັບ 2 ປະເທດ ລາວ ແລະ ກຳປູເຈຍ, ພ້ອມທັງ ຮັບເອົາຂໍ້ສະເໜີເພີ່ມງົບປະມານປະຈຳປີທີ່ສະຫງວນໃຫ້ວຽກງານພົວພັນຕ່າງປະເທດ, ເປີດດ່ານຊາຍແດນສຳຮອງຕື່ມອີກ ແລະ ຂໍ້ສະເໜີອື່ນຈຳນວນໜຶ່ງຂອງແຂວງ ກອນຕຸມ.