(vovworld) - ຕອນເຊົ້າວັນທີ 19/05, ຢູ່ຕາແສງ, ດ້ຽນທໍ້, ເມືອງ ດ້ຽນບ່ານ, ແຂວງ ກວາງນາມ, ທ່ານຮອງນາຍົກລັດຖະມົນຕີ ຫງວຽນຊວນຟຸ໋ກ ເຂົ້າຮ່ວມ ແລະ ອອກຄຳສັ່ງເລີ່ມລົງມືກໍ່ສ້າງເສັ້ນທາງດ່ວນ ດ່ານັ້ງ - ກວາງຫງາ້ຍ. ໂຄງການມີຍອດຈຳນວນເງິນລົງທຶນເກືອບ 1,5 ຕື້ USD, ຈາກແຫຼ່ງທຶນກູ້ຍືມໜູນຊ່ວຍພັດທະນາ (ODA) ຂອງລັດຖະບານຍີ່ປຸ່ນ ແລະ ແຫຼ່ງທຶນກູ້ຍືມຈາກທະນາຄານໂລກ. ເສັ້ນທາງດ່ວນ ດ່ານັ້ງ - ກວາງຫງາ້ຍ ຄາດວ່າຈະສ້າງສຳເລັດໃນປີ 2017. ນີ້ແມ່ນພາກສ່ວນໜຶ່ງຂອງເສັ້ນທາງດ່ວນ ເໜືອ - ໃຕ້, ພາຍຫຼັງໄດ້ຮັບການກໍ່ສ້າງສຳເລັດ ຈະຫລຸດຜ່ອນໄລຍະທາງ ແລະ ເວລາໄປມາລະຫວ່າງບັນດາສູນເສດຖະກິດ ແລະ ບັນດາແຂວງ, ນະຄອນດ່ານັ້ງ, ກວາງນາມ ແລະ ກວາງຫງາ້ຍ. ກ່າວຄຳເຫັນທີ່ພິທີເລີ່ມລົງມືກໍ່ສ້າງ, ທ່ານຫງວຽນຊວນຟຸ໋ກ, ກຳມະການກົມການເມືອງ, ຮອງນາຍົກລັດຖະມົນຕີ ຊີ້ແຈ້ງວ່າ, ເສັ້ນທາງດ່ວນ ດ່ານັ້ງ - ກວາງຫງາ້ຍ ໄດ້ເປີດກາລະໂອກາດລົງທຶນ, ຊຸກຍູ້ການພັດທະນາເສດຖະກິດສັງຄົມຢູ່ເຂດພາກກາງ, ປະກອບສ່ວນເຊື່ອມຕໍ່ການຂົນສົ່ງສາກົນພາຍໃນພາກພື້ນ, ຮັບປະກັນການໄປມາ, ກູ້ໄພກູ້ຊີບດ່ວນໃຫ້ແກ່ປະຊາຊົນໃນເຂດທີ່ປະສົບກັບໄພນ້ຳຖ້ວມໃນລະດູຝົນເປັນປະຈຳ.