(vovworld) - ຕອນເຊົ້າວັນທີ 16/9, ຢູ່ນະຄອນ ດ່າລາດ, ແຂວງ ເລີມດົ່ງ, ຄະນະປະຕິບັດງານເຊິ່ງລວມມີ: ຜູ້ຕາງໜ້າບັນດາກະຊວງ, ຂະແໜງການຂັ້ນສູນກາງ, ຄະນະຊີ້ນຳເຂດໄທງວຽນ ໂດຍທ່ານຮອງນາຍົກລັດຖະມົນຕີ ຫງວຽນຊວນຟຸກ ນຳໜ້າ ເຮັດວຽກກັບການນຳແຂວງ ເລີມດົ່ງ ກ່ຽວກັບສະພາບການພັດທະນາເສດຖະກິດ - ສົງຄົມ, ວຽກງານປ້ອງກັນ ແລະ ຕ້ານ AIDS ແລະ ຢາເສບຕິດ, ໂສເພນີ, ປ້ອງກັນ, ຕ້ານອາດຊະຍາກຳ ແລະ ຄວາມເປັນລະບຽບຮຽບຮ້ອຍ, ຄວາມປອດໄພທາງຄົມມະນາຄົມຢູ່ທ້ອງຖີ່ນ. ທ່ານຮອງນາຍົກລັດຖະມົນຕີ ຫງວຽນຊວນຟຸກ ຕີລາຄາສູງບັນດາຄວາມມານະພະຍາຍາມສຸ້ຊົນຂອງ ຄະນະພັກ, ອຳນາດການປົກຄອງ ແລະ ປະຊາຊົນແຂວງ ເລີມດົ່ງ ໃນຫຼາຍຂົງເຂດ, ພົ້ນເດັ່ນແມ່ນຂົງເຂດອຸດສາຫະກຳເຕັກໂນໂລຢີສູງ, ກໍ່ສ້າງຊົນນະບົດໃໝ່ ແລະ ພັດທະນາການທ່ອງທ່ຽວ. ກ່ຽວກັບໜ້າທີ່ໃນໄລຍະຈະມາເຖິງ, ທ່ານຮອງນາຍົກລັດຖະມົນຕີ ຫງວຽນຊວນຟຸກ ສະເໜີໃຫ້ແຂວງ ເລີມດົ່ງ ກວດກາຄືນບັນດາຕົວເລກຄາດໝາຍ, ແຜນການຂອງປີ ເພື່ອຜັນຂະຫຍາຍປະຕິບັດຢ່າງຄົບຖ້ວນ ແລະ ຮອບດ້ານ, ຈັດຕັ້ງປະຕິບັດບັນດາມະຕິຂອງລັດຖະບານຢ່າງເຂັ້ມງວດ, ພິເສດແມ່ນສຸມໃສ່ແກ້ໄຂຄວາມຫຍຸ້ງຍາກໃຫ້ແກ່ວິສາຫະກິດ.