ຮອງນາຍົກລັດຖະມົນຕີ ຫງວຽນທ້ຽນເຍີນ ຢ້ຽມຢາມ ຫໍພິພິທະພັນ 2 ແຫ່ງຢູ່ ຮ່າໂນ້ຍ
ທ່ານຮອງນາຍົກລັດຖະມົນຕີ ຫງວຽນທ້ຽນເຍີນ
(vovworld) - ຕອນບ່າຍວັນທີ 27/12, ທ່ານຮອງນາຍົກລັດຖະມົນຕີຫວຽດນາມ ຫງວຽນທ້ຽນເຍີນ ໄດ້ໄປຢ້ຽມຢາມຫໍພິພິທະພັນໄຊຊະນະ B52 ແລະ ຫໍພິພິທະພັນປະຫວັດສາດການທະຫານຫວຽດນາມ, ເນື່ອງໃນໂອກາດສະເຫຼີມສະຫຼອງ 40 ປີແຫ່ງໄຊຊະນະຮ່າໂນ້ຍ - ດ້ຽນບຽນຝູທາງອາກາດ. ເມື່ອມາຢ້ຽມຢາມຫໍພິພິທະພັນໄຊຊະນະ B52, ທ່ານຮອງນາຍົກລັດຖະມົນຕີ ຫງວຽນທ້ຽນເຍີນ ໄດ້ຕັກເຕືອນການນຳຫໍພິພິທະພັນເອົາໃຈໃສ່ເຖິງການແປພາສາໃນການຕ້ອນຮັບແຂກສາກົນ ເພື່ອໃຫ້ເຂົາເຈົ້າມີຄວາມເຂົ້າໃຈຢ່າງຈະແຈ້ງກ່ຽວກັບໄຊຊະນະພິລະອາດຫານນີ້. ທ່ານຮອງນາຍົກລັດຖະມົນຕີ ຫງວຽນທ້ຽນເຍີນ ເນັ້ນໜັກວ່າ:
“ກ່ອນນີ້ 40 ປີເຕັມ, ໃນວັນທີ 27/12, ກອງທັບ ແລະ ປະຊາຊົນນະຄອນຫຼວງ ຮ່າໂນ້ຍ ໄດ້ຜ່ານຜ່າຄວາມເຈັບປວດ, ຕັດສິນໃຈຕໍ່ສູ້ຕ້ານສັດຕຸຜູ້ຮຸກຮານ ອາເມລິກາ, ເຊື່ອໝັ້ນຕໍ່ໄຊຊະນະຂອງຊາດຫວຽດນາມ, ຍິງເຮືອບິນ B52 ຕົກຫຼາຍລຳ ແລະ ທັບມ້າງເຈດຈຳນົງຮຸກຮານຂອງ ອາເມລິກາ, ບັງຄັບໃຫ້ເຂົາເຈົ້າຕ້ອງເຊັນສັນຍາ ປາຣີ. ບັນດາບຸກຄົນທີ່ໄດ້ຮັບການກຳເນີດ ແລະ ເຕີບໃຫຍ່ໃນໄລຍະນັ້ນ, ບັນດາຊາວໜຸ່ມຫວຽດນາມ ໃນປະຈຸບັນ ຍາມໃດກໍ່ຈົດຈຳໄຊຊະນະປະຫວັດສາດ ຮ່າໂນ້ຍ - ດ້ຽນບຽນຝູທາງອາກາດ ແລະ ຈະດຳລົງຊີວິດ, ເຮັດວຽກ ແລະ ຕໍ່ສູ້ໃຫ້ສົມກັບມູນເຊື້ອອັນພິລະອາດຫານຂອງນະຄອນຫຼວງຮ່າໂນ້ຍ ແລະ ຂອງຊາດ”
ຈາກນັ້ນ, ທ່ານຮອງນາຍົກລັດຖະມົນຕີ ຫງວຽນທ້ຽນເຍີນ ໄດ້ໄປຢ້ຽມຢາມຫໍພິພິທະພັນປະຫວັດສາດການທະຫານຫວຽດນາມ, ແຫ່ງທີ່ພວມດຳເນີນງານວາງສະແດງທີ່ມີຫົວຂໍ້ກ່ຽວກັບ “ຮ່າໂນ້ຍ - ດ້ຽນບຽນຝູທາງອາກາດ”. ທ່ານຮອງນາຍົກລັດຖະມົນຕີ ຫງວຽນທ້ຽນເຍີນ ຫວັງວ່າ ງານວາງສະແດງຈະແກ່ຍາວຮອດບຸນປີໃຫມ່ປະຈຳຊາດ ເພື່ອຮັບໃຊ້ໃຫ້ແກ່ແຂກສາກົນມາຢ້ຽມຢາມຮ່າໂນ້ຍ.