(vovworld) - ຕອນບ່າຍວັນທີ 15/11, ຢູ່ສຳນັກງານລັດຖະບານ, ທ່ານຮອງນາຍົກລັດຖະມົນຕີ Nguyen Thien Nhan ໄດ້ໃຫ້ການຕ້ອນຮັບຜູ້ແທນທະຫານເຈັບປ່ວຍ ແລະ ເສຍອົງຄະ, ຄອບຄົວນັກຮົບທີ່ເສຍສະຫຼະຊີວິດເພື່ອຊາດ, ຜູ້ມີຄຸນງາມຄວາມດີຕໍ່ປະຕິວັດດີເດັ່ນຂອງແຂວງ Dong Thap 71 ທ່ານ ເນື່ອງໃນໂອກາດຄະນະມາຢ້ຽມຢາມນະຄອນຫຼວງຮ່າໂນ້ຍ ແລະ ເຂົ້າຢ້ຽມສຸສານປະທານໂຮ່ຈິມິນ. ທ່ານຮອງນາຍົກລັດຖະມົນຕີ Nguyen Thien Nhan ຢືນຢັນວ່າ ຍາມໃດ ພັກ, ລັດ, ລັດຖະບານ ກໍສະແດງຄວາມຮູ້ບຸນຄຸນ ແລະ ຕອບບຸນແທນຄຸນການອຸທິດສ່ວນຂອງບັນດາແມ່ຫວຽດນາມ ວິລະຊົນ, ບັນດານັກປະຕິວັດອາວຸໂສ, ທະຫານເສຍອົງຄະ, ນັກຮົບທີ່ເສຍສະຫຼະຊີວິດເພື່ອຊາດ, ຜູ້ມີຄຸນງາມຄວາມດີຕໍ່ການປະຕິວັດ ໃນພາລະກິດຕໍ່ສູ້ປົດປ່ອຍຊາດ ແລະ ສ້າງສາປະເທດຊາດ. ຍາມໃດພັກ, ລັດ, ລັດຖະບານ ກໍເອົາໃຈໃສ່ ແລະ ຈະເຮັດຈົນສຸດຄວາມສາມາດຂອງຕົນ ເພື່ອຍົກສູງຊີວິດທາງດ້ານວັດຖຸ ແລະ ຈິດໃຈໃຫ້ແກ່ບັນດາຄອບຄົວໃນເປົ້າໝາຍນະໂຍບາຍ, ຜູ້ມີຄຸນງາມຄວາມດີຕໍ່ປະເທດຊາດຂອງທົ່ວປະເທດເວົ້າລວມ ແລະ ແຂວງ Dong Thap ເວົ້າສະເພາະ. ທ່ານຮອງນາຍົກລັດຖະມົນຕີໄດ້ໃສ່ໃຈວ່າ ໃນໄລຍະຈະມາເຖິງ, ທ້ອງຖິ່ນຕ້ອງສືບຕໍ່ຍູ້ແຮງບັນດາການເຄື່ອນໄຫວສັງຄົມ, ຕອບບຸນແທນຄຸນ, ກິນເຂົ້າຄິດຮອດຄຸນນາ ກິນປ່າຄິດຮອດຄຸນນ້ຳ ເພື່ອໃຫ້ວຽກງານເບິ່ງແຍງດູແລ, ຕອບບຸນແທນຄຸນຜູ້ທີ່ມີຄຸນງາມຄວາມດີຕໍ່ການປະຕິວັດໃຫ້ນັບມື້ນັບມີປະສິດທິຜົນກວ່າອີກ.