(vovworld) – ວັນທີ 11/5, ຄະນະຜູ້ແທນຂັ້ນສູງຫວຽດນາມ ໂດຍທ່ານນາຍົກລັດຖະມົນຕີ ຫວຽດນາມ ຫວຽນເຕີນຢູ້ງ ນຳໜ້າ ໄດ້ກັບເມືອຮອດ ຮ່າໂນ້ຍ ສີ້ນສຸດການເຂົ້າຮ່ວມກອງປະຊຸມສຸດຍອດ ອາຊຽນ ຄັ້ງທີ 24. ເມື່ອຕອບສຳພາດກ່ຽວກັບໝາກຜົນກອງປະຊຸມ, ທ່ານຮອງນາຍົກລັດຖະມົນຕີ ທັງເປັນລັດຖະມົນຕີການຕ່າງປະເທດ ຟ້າມບິ່ງມິງ ຢືນຢັນວ່າ: ທະເລຕາເວັນອອກແມ່ນບັນຫາຈຸດສຸມຂອງກອງປະຊຸມຄັ້ງນີ້. ບັນດາການນຳ ອາຊຽນ ລ້ວນແຕ່ສະແດງຄວາມວິຕົກກັງວົນຢ່າງເລິກເຊິ່ງສຳລັບ ເລື່ອງ ຈີນ ເປັນຄັ້ງທຳອິດຕັ້ງຮ້ານເຈາະນ້ຳມັນ ແລະ ນຳກຳ່ປັນປ້ອງກັນເຂົ້າເລິກໃນເຂດເສດຖະກິດຈຳເພາະ ແລະ ເຂດໄຫຼ່ທະວີບຂອງປະເທດສະມາຊິກ ອາຊຽນ ປະເທດໜຶ່ງ, ຖືວ່າ ນີ້ແມ່ນການກະທຳອັນຕະລາຍ, ລະເມີດກົດໝາຍສາກົນ, ສົນທິສັນຍາ ສປຊ ກ່ຽວກັບທະເລປີ 1982 (UNCLOS) ແລະ ຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ເຊິ່ງ ຈີນ ໄດ້ລົງນາມ, ອັນໄດ້ສົງຜົນສະທ້ອນຢ່າງຮ້າຍແຮງເຖິງຄວາມສະຫງົບ, ຄວາມປອດໄພໃນການເດີນທະເລຢູ່ທະເລຕາເວັນອອກ ກໍ່ຄືສັນຕິພາບ ແລະ ສະຖຽນລະພາບຂອງພາກພື້ນ. ບັນດາການນຳໄດ້ເຫັນດີນຳກັນວ່າ: ອາຊຽນ ຄວນສະແດງຫຼັກໝັ້ນລວມ ກ່ຽວກັບສະພາບການຢູ່ທະເລຕາເວັນອອກໃນປະຈຸບັນຢ່າງຮີບດ່ວນ, ຮຽກຮ້ອງໃຫ້ບັນດາຝ່າຍລະງັບໃຈ, ບໍ່ນຳໃຊ້ອາວຸດ, ແກ້ໄຂບັນດາການພິດພາດ, ປະຕິບັດກົດໝາຍສາກົນ ແລະ UNCLOS, ປະຕິບັດ DOC ຢ່າງຄົບຖ້ວນ ແລະ ສ້າງຂໍ້ກຳນົດການປະພຶດຢູ່ທະເລຕາເວັນອອກ (COC) ເພື່ອແນໃສ່ຮັບປະກັນສະພາບແວດລ້ອມສັນຕິພາບ, ສະຖຽນລະພາບຢູ່ພາກພື້ນ, ສະກັດກັ້ນການເພີ່ມຄວາມເຄັ່ງຕຶງ. ທ່ານຮອງນາຍົກລັດຖະມົນຕີ ຟ້າມບິ່ງມິງ ໃຫ້ຮູ້ວ່າ: ບັນດາປະເທດ ອາຊຽນ ໄດ້ເຫັນດີເປັນເອກສັນຮັບຮອງເອົາຖະແຫຼງການສະເພາະຂອງບັນດາລັດຖະມົນຕີການຕ່າງປະເທດ ກ່ຽວກັບບັນຫາ ທະເລຕາເວັນອອກ. ສິ່ງດັ່ງກ່າວສະແດງຄວາມສາມັກຄີ, ເຫັນດີເຫັນພ້ອມຢ່າງສູງ ແລະ ບົດບາດເປັນເຈົ້າການ, ຄວາມຮັບຜິດຊອບຂອງ ອາຊຽນ ສຳລັບສັນຕິພາບ, ສະຖຽນລະພາບ ແລະ ຄວາມສະຫງົບຢູ່ທະເລຕາເວັນອອກເວົ້າສະເພາະ, ພາກພື້ນເວົ້າລວມ. ນີ້ເປັນຄັ້ງທຳອິດໃນເກືອບ 2 ທົດສະວັດ (ນັບແຕ່ປີ 1995), ອາຊຽນອອກຖະແຫຼງການສະເພາະ ກ່ຽວກັບສະພາບການສັບສົນ, ນາບຂູ່ເຖິງສັນຕິພາບ, ຄວາມສະຫງົບ, ຄວາມປອດໄພການເດີນທະເລຢູ່ທະເລຕາເວັນອອກ.