ຮອງນາຍົກລັດຖະມົນຕີຫງວຽນຊວນຟູ໋ກພົບປະເຈລະຈາກັບນາຍົກລັດຖະມົນຕີຫຼີເຄີຊຽງ

ວັນພະຫັດ ທີ 17 ກັນຍາ ຄ.ສ. 2015 | 14:24:20

(ທ່ານ ຫງວຽນຊວນຟູ໋ກ ພົບປະເຈລະຈາກັບທ່ານ ຫຼີເຄີຊຽງ)

vovworld) – ໃນຂອບເຂດການຢ້ຽມຢາມ ສາທາລະນະລັດປະຊາຊົນ ຈີນ ຢ່າງເປັນທາງການ, ວັນທີ 16/9, ຢູ່ປັກກິ່ງ, ຈີນ, ທ່ານຮອງນາຍົກລັດຖະມົນຕີ ຫວຽດນາມ ຫງວຽນຊວນຟູ໋ກ ໄດ້ພົບປະເຈລະຈາກັບທ່ານນາຍົກລັດຖະມົນຕີ ຈີນ ຫຼີເຄີຊຽງ. ທີ່ການພົບປະເຈລະຈາ, ທ່ານຮອງນາຍົກລັດຖະມົນຕີ ຫງວຽນຊວນຟູ໋ກ ຢືນຢັນວ່າ: ຫວຽດນາມ ຍາມໃດກໍຍືດໝັ້ນແນວທາງການຕ່າງປະເທດສັນຕິພາບ, ເອກະລາດ, ເປັນເຈົ້າຕົນເອງ, ຫັນເປັນຫລາຍຝ່າຍ, ຫລາຍຮູບຫລາຍແບບ; ຍາມໃດກໍຖືເປັນສຳຄັນການພັດທະນາການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ຈີນ ຢ່າງມີສະຖຽນລະພາບ, ໝັ້ນຄົງ ແລະ ສະເໝີຕົ້ນສະເໝີປາຍ. ທ່ານຮອງນາຍົກລັດຖະມົນຕີ ຫງວຽນຊວນຟູ໋ກ ສະເໜີທ່ານນາຍົກລັດຖະມົນຕີ ຫຼີເຄີຊຽງ ເອົາໃຈໃສ່, ຊີ້ນຳບັນດາຂັ້ນ, ຂະແໜງການ ແລະ ທ້ອງຖິ່ນຂອງ ຈີນ ຜັນຂະຫຍາຍບັນດາຂໍ້ຕົກລົງ ແລະ ຄວາມຮັບຮູ້ລວມ ທີ່ບັນລຸໄດ້ລະຫວ່າງການນຳຂັ້ນສູງ 2 ພັກ, 2 ລັດຢ່າງມີປະສິດທິຜົນ; ຊຸກຍູ້ບັນດາຂົງເຂດການຮ່ວມມືໃຫ້ພັດທະນາເປັນປົກກະຕິ, ສົມດູນ ສະເໝີພາບຕ່າງຝ່າຍຕ່າງມີຜົນປະໂຫຍດ; ສືບຕໍ່ເສີມຂະຫຍາຍບັນດາກົນໄກຮ່ວມມືລະຫວ່າງທ້ອງຖິ່ນຕ່າງໆຂອງ 2 ປະເທດຢ່າງມີປະສິດທິຜົນ, ສ້າງເງື່ອນໄຂເພີ່ມທະວີການພົບປະແລກປ່ຽນ, ການຮ່ວມມື ແລະ ພັດທະນາເສດຖະກິດເຂດຊາຍແດນ; ຄວບຄຸມຄວາມບໍ່ລົງລອຍກັນບົນທະເລ, ຮັກສາສັນຕິພາບ, ສະຖຽນລະພາບຢູ່ທະເລຕາເວັນອອກ, ບໍ່ໃຫ້ສົ່ງຜົນສະທ້ອນເຖິງທ່າອຽງ ປັບປຸງ ແລະ ພັດທະນາຂອງການພົວພັນ 2 ປະເທດ ຫວຽດນາມ - ຈີນ.

ເຫັນດີກັບບັນດາບັນຫາດັ່ງກາວ, ທ່ານນາຍົກລັດຖະມົນຕີ ຫຼີເຄີຊຽງ ຢືນຢັນວ່າ: ພັກ, ລັດ ແລະ ປະຊາຊົນ ຈີນ ຖືເປັນຄຳຄັນ ແລະ ຍືດໝັ້ນທິດນຳບ້ານໃກ້ເຮືອນຄຽງມິດຕະພາບ, ການຮ່ວມມືຮອບດ້ານກັບ ຫວຽດນາມ, ປາດຖະໜາຢາກຮັກສາການແລກປ່ຽນ, ພົບປະຂັ້ນສູງລະຫວ່າງ 2 ປະເທດ, ພ້ອມແລ້ວທີ່ຈະພ້ອມກັບ ຫວຽດນາມ ກຳແໜ້ນທ່າອຽງພັດທະນາການພົວພັນລະຫວ່າງ 2 ປະເທດ, ແກ້ໄຂຄວາມບໍ່ລົງລອຍກັນຢ່າງສົມເຫດສົມຜົນ, ຊຸກຍູ້ການຮ່ວມມືຢ່າງແທ້ຈິງໃນບັນດາຂົງເຂດລະຫວ່າງ 2 ປະເທດ, ປະກອບສ່ວນຮັກສາສັນຕິພາບ, ສະຖຽນລະພາບ ແລະ ຄວາມວັດທະນາຖາວອນຂອງພາກພື້ນ.

ກ່ອນໜ້ານັ້ນ, ທ່ານຮອງນາຍົກລັດຖະມົນຕີ ຫງວຽນຊວນຟູ໋ກ ມີການເຮັດວຽກກັບທ່ານ ວ໋າງຈີ໋ຊາງ ກຳມະການປະຈຳກົມການເມືອງ, ເລຂາຄະນະກຳມະການກວດກາລະບຽບວິໃນສູນກາງພັກກອມມູນິດ ຈີນ. 2 ຝ່າຍແລກປ່ຽນ, ແບ່ງປັນບົດຮຽນໃນວຽກງານກວດກາພັກ; ກວດກາ, ປ້ອງກັນ, ຕ້ານອາດຊະຍາກຳ ແລະ ປ້ອງກັນຕ້ານການສໍ້ລາດບັງຫລວງ; ເຫັນດີເປັນເອກະສັນເພີ່ມທະວີການແລກປ່ຽນຄະນະຜູ້ແທນລະຫວ່າງບັນດາອົງການກວດກາຂອງ 2 ພັກ, 2 ລັດ, ຮ່ວມມືບຳລຸງສ້າງພະນັກງານ ແລະ ແບ່ງປັນບົດຮຽນໃນວຽກງານຕໍ່ສູ້, ປ້ອງກັນຕ້ານການສໍ້ລາດບັງຫລວງ.