ຮອງນາຍົກລັດຖະມົນຕີຫງວຽນຊວນຟຸກຢ້ຽມຢາມອີຣານຢ່າງເປັນທາງການ
ທ່ານຮອງນາຍົກລັດຖະມົນຕີ ຫງວຽນຊວນຟຸກ ແລະ ທ່ານຮອງປະທານາທິບໍດີ Mohammad Shariatmadari
(ພາບ: chinhphu.vn)
(vovworld) – ວັນທີ 14/10, ໃນຂອບເຂດການຢ້ຽມຢາມ ອີຣານ ຢ່າງເປັນທາງການ, ທ່ານຮອງນາຍົກລັດຖະມົນຕີ ຫງວຽນຊວນຟຸກ ມີການເຈລະຈາກັບທ່ານຮອງປະທານາທິບໍດີ Mohammad Shariatmadari. 2 ຝ່າຍເຫັນດີເປັນເອກະສັນຊຸກຍູ້ການຮ່ວມມືລະຫວ່າງ 2 ປະເທດໃນໄລຍະຈະມາເຖິງຢ່າງມີປະສິດທິຜົນກ່ວາອີກ, ພິເສດໃນຂົງເຂດເສດຖະກິດ, ການຄ້າ ແລະ ວິທະຍາສາດເຕັກໂນໂລຢີ. 2 ຝ່າຍເຫັນດີເປັນເອກະສັນເພີ່ມທະວີການແລກປ່ຽນຄະນະຜູ້ແທນທຸກຂັ້ນລະຫວ່າງ 2 ປະເທດ, ພິເສດແມ່ນບັນດາຄະນະຜູ້ແທນຂັ້ນສູງ, ສືບຕໍ່ສົມທົບກັນ ແລະ ສະໜັບສະໜູນເຊິ່ງກັນ ແລະ ກັນໃນບັນດາເວທີປາໄສສາກົນ ແລະ ຫຼາຍຝ່າຍຄື ສປຊ ແລະ ຂະບວນການບໍ່ຮ່ວມກຸ່ມ. 2 ຝ່າຍກໍ່ລ້ວນແຕ່ສະແດງຄວາມຕັດສິນໃຈນຳວົງເງິນການຄ້າ 2 ຝ່າຍຂຶ້ນລະດັບ 500 ລ້ານ USD ໃນປີໜ້າ. ທ່ານຮອງນາຍົກລັດຖະມົນຕີ ຫງວຽນຊວນຟຸກ ສະເໜີລັດຖະບານ ອີຣານ ສ້າງເງື່ອນໄຂເພື່ອໃຫ້ ຫວຽດນາມ ເພີ່ມທະວີການສົ່ງອອກຜະລິດຕະພັນກະເສດ ແລະ ເຄື່ອງໃຊ້ສອຍໄປຍັງ ອີຣານ, ພ້ອມທັງຊົມເຊີຍ ແລະ ຢັ້ງຢືນຈະສ້າງເງື່ອນໄຂອຳນວຍຄວາມສະດວກເພື່ອໃຫ້ສິນຄ້າຂອງ ອີຣານ ມີໜ້າຢູ່ຕະຫຼາດ ຫວຽດນາມ ກໍ່ຄືບັນດາວິສາຫະກິດ ອີຣານ ເຂົ້າຫວຽດນາມ ຮ່ວມມືດຳເນີນທຸລະກິດ ແລະ ລົງທຶນຫຼາຍກ່ວາອີກ. ສ່ວນທ່ານຮອງປະທານາທີບໍດີ ອີຣານ ຢືນຢັນວ່າ: ອີຣານ ຖືເປັນສຳຄັນການພັດທະນາສາຍພົວພັນມິດຕະພາບ, ການຮ່ວມມືກັບ ຫວຽດນາມ ຄືດັ່ງຈຸດສຸມໃນນະໂຍບາຍເປີດກ້ວາງການພົວພັນກັບພາກພື້ນ ອາຊຽນ ແລະ ອາຊີ - ປາຊີຟິກ.
ເນື່ອງໃນການຢ້ຽມຢາມຄັ້ງນີ້, 2 ຝ່າຍໄດ້ເຊັນເອກະສານຮ່ວມມື 4 ສະບັບ.