ຮອງປະທານປະເທດ Nguyen Thi Doan ເຈລະຈາ ກັບ ນາຍົກລັດຖະມົນຕີ ໄທ
ທ່ານນາງຮອງປະທານປະເທດຫວຽດນາມ ແລະ ທ່ານນາງນາຍົກລັດຖະມົນຕີໄທ
(ພາບ: ສຳນັກຂ່າວສານຫວຽດນາມ)
(vovworld) - ພິທີຕ້ອນຮັບທ່ານນາງຮອງປະທານປະເທດຫວຽດນາມ Nguyen Thi Doan ຢ່າງເປັນທາງການ ໄດ້ດຳເນີນໄປຢ່າງສົມກຽດເມື່ອຕອນບ່າຍວັນທີ 22/6, ຢູ່ສຳນັກງານນາຍົກລັດຖະມົນຕີ ລາຊະອານາຈັກ ໄທ. ພາຍຫຼັງພິທີຕ້ອນຮັບ, ທ່ານນາງຮອງ ປະທານປະເທດ Nguyen Thi Doan ມີການເຈລະຈາ ກັບທ່ານນາງນາຍົກລັດຖະມົນຕີ ໄທ ຍິງຣັກ ຊິນນະວັດ. ທ່ານນາງຮອງປະທານປະເທດ Nguyen Thi Doan ຢືນຢັນວ່າ: ຫວຽດນາມ ຍາມໃດກໍຖືການພັດທະນາການພົວພັນມິດຕະພາບ ແລະ ຮ່ວມມືຫຼາຍດ້ານກັບ ໄທ ເປັນສຳຄັນ, ນັບທັງ 2 ຝ່າຍ ແລະ ຫຼາຍຝ່າຍ. ສ່ວນທ່ານນາງນາຍົກລັດຖະມົນຕີໄທ ຍິງຣັກ ຊິນນະວັດ ເຊື່ອໝັ້ນວ່າ: ການຢ້ຽມຢາມຄັ້ງນີ້ຈະປະກອບສ່ວນປັບປຸງ ແລະ ເພີ່ມທະວີການພົວພັນມິດຕະພາຍທີ່ເປັນມູນເຊື້ອ ແລະ ການຮ່ວມມືອັນດີງາມທີ່ເຄີຍມີມາກ່ອນລະຫວ່າງ 2 ປະເທດ. 2 ຝ່າຍເຫັນດີ ໃນໄລຍະຈະມາເຖິງ ຈະສືບຕໍ່ແລກປ່ຽນຄະນະຜູ້ແທນທຸກຂັ້ນ ແລະ ພົບປະແລກປ່ຽນປະຊາຊົນ, ຜັນຂະຫຍາຍບັນດາກົນໄກຮ່ວມມື 2 ຝ່າຍ, ຈັດຕັ້ງກອງປະຊຸມຄະນະລັດຖະບານລວມຄັ້ງທີ 2 ແລະ ກອງປະຊຸມຄະນະກຳມະການປະສົມ ກ່ຽວກັບການຮ່ວມມືດ້ານການຄ້າຄັ້ງທີ 1 ໃນປີນີ້ ເພື່ອວາງອອກບັນດາມາດຕະການເພີ່ມທະວີການຮ່ວມມືໃນບັນດາຂົງເຂດລະອຽດ, ໃນນັ້ນມີການຊຸກຍູ້ການລົງທຶນ, ເພີ່ມວົງເງິນການຄ້າ 2 ສົ້ນ ແລະ ຫຼຸດຜ່ອນການນຳເຂົ້າເກີນດຸ່ນຂອງຫວຽດນາມ. 2 ຝ່າຍເຫັນດີເປັນເອກະສັນນຳກັນສືບຕໍ່ແບ່ງປັນຂໍ້ມູນຂ່າວ, ສົມທົບກັນໃນຂົງເຂດສົ່ງອອກເຂົ້າສານ, ສົ່ງເສີມການເຈລະຈາ, ເຊັນຂໍ້ຕົກລົງກ່ຽວກັບການຮ່ວມມືດ້ານແຮງງານໂດຍໄວ, ເພີ່ມທະວີການຮ່ວມມືໃນການປ້ອງກັນ, ຕ້ານການຄ້າມະນຸດ, ແມ່ຍິງ ແລະ ຊຸກຍູ້ຄວາມສະເໝີພາບລະຫວ່າງ ຍິງ - ຊາຍ, ເປີດກ້ວາງບັນດາຮູບການຮ່ວມມືໃນຂົງເຂດສຶກສາ - ບຳລຸງສ້າງ ແລະ ວັດທະນະທຳ, ໃນນັ້ນມີເລື່ອງສ້າງເງື່ອນໄຂອຳນວຍຄວາມສະດວກ ເພື່ອໃຫ້ຫວຽດນາມ ມີສູນພາສາ ແລະ ວັດທະນະທຳ ຢູ່ ໄທ ເພື່ອສອນພາສາຫວຽດ ແລະ ເຜິຍແຜ່ວັດທະນະທຳຫວຽດນາມ. 2 ຝ່າຍກໍເປັນເອກະພາບສົມທົບກັນຢ່າງແໜ້ນແຟ້ນເພື່ອສ້າງເງື່ອນໄຂອຳນວຍຄວາມສະດວກໃຫ້ພໍ່ແມ່ປະຊາຊົນຊາວຫວຽດນາມ ອາໄສຢູ່ໄທມີຊີວິດເປັນປົກຕິ, ປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ - ສັງຄົມ ຂອງໄທ ກໍຄືການພົວພັນມິດຕະພາບລະຫວ່າງ 2 ປະເທດ.