(vovworld) – ຕອນຄຳ່ວັນທີ 19/7, ຢູ່ເທດສະບານຕວຽນກວາງ, ການນຳແຂວງ ຕວຽນກວາງ ໄດ້ຈັດງານລ້ຽງຕ້ອນຮັບຄະນະຜູ້ແທນຂັ້ນສູງ ສປປ ລາວ ໂດຍທ່ານຮອງປະທານປະເທດລາວ ບຸນຍັງ ວໍລະຈິດ ນຳໜ້າ ທີ່ພວມຢູ່ຢ້ຽມຢາມ, ເຮັດວຽກຢູ່ຫວຽດນາມ ແລະ ຄະນະຜູ້ແທນປະຊາຊົນ ລາວ ທີ່ມາເຂົ້າຮ່ວມງານມະໂຫລານມິດຕະພາບປະຊາຊົນຫວຽດນາມ - ລາວ ຄັ້ງທີ 3. ທ່ານປະທານສະພາປະຊາຊົນແຂວງ ຕວຽນກວາງ Nguyen Sang Vang ເນັ້ນໜັກວ່າ: ການຢ້ຽມຢາມ ແລະ ເຮັດວຽກຂອງຄະນະຜູ້ແທນຂັ້ນສູງ ແລະ ຄະນະຜູ້ແທນປະຊາຊົນ ລາວ ສະແດງໃຫ້ເຫັນນ້ຳໃຈທີ່ເລິກເຊິ່ງ, ສາຍພົວພັນສາມັກຄີມິດຕະພາບ, ຄວາມໄວ້ເນື້ອເຊື່ອໃຈລະຫວ່າງ 2 ພັກ, 2 ລັດ ແລະ ປະຊາຊົນ 2 ປະເທດ. ກ່າວຄຳເຫັນທີ່ງານລ້ຽງ, ທ່ານ ບຸນຍັງ ວໍລະຈິດ, ຜູ້ປະຈຳການຄະນະເລຂາ, ຮອງປະທານປະເທດ ສປປ ລາວ ໃຫ້ຮູ້ວ່າ:
ສຽງທ່ານ ບຸນຍັງ ວໍລະຈິດ
ກ່ອນໜ້ານັ້ນ, ຕອນບ່າຍວັນທີ 19/7, ທີ່ການເຮັດວຽກລະຫວ່າງການນຳແຂວງ ຕວຽນກວາງ ແລະ ຄະນະຜູ້ແທນຂັ້ນສູງ ສປປ ລາວ, ທ່ານປະທານສະພາປະຊາຊົນແຂວງ ຕວຽນກວາງ Nguyen Sang Vang ຊີ້ແຈ້ງວ່າ: ໃນໄລຍະຈະມາເຖິງ, ແຂວງຕວຽນກວາງ ກຽມພ້ອມທີ່ຈະຮ່ວມມື, ແບ່ງປັນບົດຮຽນກັບບັນດາແຂວງຂອງລາວ, ພິເສດແມ່ນໃນການພັດທະນາຕົ້ນຊາ, ຜະລິດກະສິກຳ... ປະກອບສ່ວນຢ່າງແທດຈິງພ້ອມກັບ 2 ພັກ, 2 ລັດ ແລະ ປະຊາຊົນ 2 ປະເທດສືບຕໍ່ເພີ່ມທະວີສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດລະຫວ່າງ ຫວຽດນາມ - ລາວ.
ແລະ ກໍໃນວັນດຽວກັນ, ຄະນະຜູ້ແທນຂັ້ນສູງ ລາວ ແລະ ຄະນະຜູ້ແທນທີ່ເຂົ້າຮ່ວມງານມະໂຫລານມິດຕະພາບປະຊາຊົນຫວຽດນາມ - ລາວ ຄັ້ງທີ 3 ໄດ້ໄປຢ້ຽມຢາມເຂດປູຊະນີຍະສະຖານປະຕິວັດ ເຕີນຈ່າວ, ຕາແສງ ເຕີນຈ່າວ, ເມືອງ ເຊີນເຢືອງ ແລະ ເຂດປູຊະນີຍະສະຖານປະຕິວັດລາວ ຢູ່ຕາແສງ ໝີບັ່ງ, ເມືອງ ອຽນເຊີນ, ແຂວງ ຕວຽນກວາງ.