ວັນທີ 20/12, ທ່ານຮອງປະທານປະເທດ ສປ ຈີນ ສື່ຈີ້ນພິ່ງ ໄດ້ເລີ່ມຕົ້ນ ການຢ້ຽມຢາມຫວຽດນາມຢ່າງເປັນທາງການທີ່ແກ່ຍາວເຖິງວັນທີ 22/12. ເນື່ອງໃນໂອກາດນີ້, ໂຄສົກກະຊວງການຕ່າງປະເທດ ຈີນ ທ່ານ ຫຼີວກວາຍມິນໃຫ້ຮູ້ວ່າ: ໃນໄລຍະຢູ່ຢ້ຽມຢາມຫວຽດນາມ, ທ່ານຮອງປະທານປະເທດ ສື່ຈີ້ນພິ່ງ ຈະມີການເຈລະຈາ ແລະ ພົບປະກັບການນຳຫວຽດນາມ, ເພື່ອແນໃສ່ແລກປ່ຽນຄວາມເຫັນ ກ່ຽວກັບການເຮັດໃຫ້ການພົວພັນລະຫວ່າງ 2 ພັກ, 2 ລັດ ແລະ ບັນດາບັນຫາສຳຄັນຂອງພາກພື້ນ ແລະ ໂລກເຊິ່ງຕ່າງຝ່າຍຕ່າງມີຄວາມສົນໃຈ ເລິກເຊິ່ງກ່ວາອີກ. 2 ຝ່າຍຈະພ້ອມກັນລົງນາມໃນເອກະສານຮ່ວມມືຈຳນວນໜຶ່ງທີ່ກ່ຽວຂ້ອງເຖິງບັນດາຂົງເຂດ: ສາທາລະນະສຸກ, ເສດຖະກິດ, ການຄ້າ ... ຕີລາຄາກ່ຽວກັບການພົວພັນລະຫວ່າງ 2 ປະເທດ ໃນປະຈຸບັນ, ທ່ານ ຫຼີວກວາຍມິນ ໃຫ້ຮູ້ວ່າ: “ພາຍຫລັງ 61 ປີ ແຫ່ງວັນສ້າງຕັ້ງສາຍພົວພັນທາງການທູດ, ເບິ່ງລວມແລ້ວ,ການພົວພັນລະຫວ່າງ 2 ປະເທດ ໄດ້ຮັບການພັດທະນາຢ່າງດີງາມ, 2 ຝ່າຍໄດ້ສ້າງຕັ້ງການພົວພັນຮ່ວມມື, ຄູ່ຮ່ວມມືຍຸດທະສາດຢ່າງຮອບດ້ານ, ການພົບປະແລກປ່ຽນຂັ້ນສູງໄດ້ດຳເນີນໄປເປັນປະຈຳ ແລະ ຕໍ່ເນື່ອງ, ການຮ່ວມມືໃນຂົງເຂດຕ່າງໆໄດ້ຮັບການຊຸກຍູ້ເທື່ອລະກ້າວ, ນຳມາເຊິ່ງໝາກຜົນອັນແທດຈິງໃຫ້ແກ່ ປຊຊ 2 ປະເທດ. ຈີນ ຫວັງວ່າ, ການຢ້ຽມຢາມຫວຽດນາມຂອງທ່ານຮອງປະທານປະເທດ ສື່ຈີ້ນພິ່ງ ຄັ້ງນີ້ຈະເປັນການປະກອບສ່ວນຊຸກຍູ້ການພົວພັນ 2 ປະເທດ ໃຫ້ພັດທະນາກ້າວຂຶ້ນສູ່ລະດັບສູງໃໝ່”.