ພິທີຕ້ອນຮັບ ກຳມະການປະຈຳກົມການເມືອງ, ຮອງປະທານປະເທດ ສປ ຈີນ ສື່ຈີ້ນພິ່ງ ມາຢ້ຽມຢາມຫວຽດນາມ ຢ່າງເປັນທາງການ ຕາມຄຳເຊື້ອເຊີນຂອງສູນກາງພັກກອມມູນິດຫວຽດນາມ ແລະ ທ່ານນາງຮອງປະທານປະເທດ ຫງວຽນທິຢວານ ຖືກຈັດຂຶ້ນໃນຕອນເຊົ້າວັນທີ 21/12 ຢູ່ ຮ່າໂນ້ຍ. ພາຍຫຼັງພິທີຕ້ອນຮັບ, ກຳມະການກົມການເມືອງ, ຜູ້ປະຈຳການຄະນະເລຂາ ຫວຽດນາມ ເລຮົ່ງແອງ, ທ່ານນາງຮອງປະທານປະເທດຫວຽດນາມ ຫງວຽນທິຢວານ ແລະ ກຳມະການປະຈຳກົມການເມືອງ, ຮອງປະທານປະເທດ ສປ ຈີນ ສື່ຈີ້ນພິ່ງ ໄດ້ດຳເນີນການເຈລະຈາ. ສອງຝ່າຍໄດ້ເຫັນດີເປັນເອກະສັນຈະຍົກສູງບົດບາດຂອງຄະນະກຳມະການຊີ້ນຳການຮ່ວມມືສອງຝ່າຍ ຫວຽດນາມ - ຈີນ; ຊຸກຍູ້ການຮ່ວມມືລະຫວ່າງປະຊາຊົນທຸກຂັ້ນ. ສອງຝ່າຍເຫັນດີເປັນເອກະສັນຈະເພີ່ມທະວີການຮ່ວມມືໃນບັນດາຂົງເຂດວັດທະນະທຳ, ສາທາລະນະສຸກ, ການສຶກສາ, ວິທະຍາສາດເຕັກນິກ, ຖະແຫຼງຂ່າວ ໂທລະຄົມ…
ເມື່ອແລກປ່ຽນຄວາມເຫັນກ່ຽວກັບບັນຫາທະເລຕາເວັນອອກ, ຝ່າຍຫວຽດນາມຢືນຢັນ ພ້ອມແລ້ວທີ່ຈະຮ່ວມມືກັບຝ່າຍຈີນ ເພື່ອແກ້ໄຂຄວາມບໍ່ລົງລອຍກັນ ຜ່ານການເຈລະຈາໂດຍສັນຕິ, ເຄົາລົບນັບຖື ແລະເອົາໃຈໃສ່ເຖິງຜົນປະໂຫຍດຢ່າງຊອບທຳຂອງກັນ, ໂດຍອີງໃສ່ຄວາມຮັບຮູ້ລວມ ເຊິ່ງບັນລຸໄດ້ລະຫວ່າງການນຳຂັ້ນສູງຂອງສອງປະເທດ, ບົນພື້ນຖານກົດໝາຍສາກົນ, ໂດຍສະເພາະແມ່ນສົນທິສັນຍາຂອງ ສປຊ ກ່ຽວກັບກົດໝາຍວ່າດ້ວຍທະເລ ປີ 1982 ແລະຈິດໃຈຂອງຖະແຫຼງການກ່ຽວກັບການປະພຶດຕໍ່ຂອງຝ່າຍຕ່າງໆຢູ່ທະເລຕາເວັນອອກ (DOC), ປະກອບ ສ່ວນເພື່ອສັນຕິພາບ, ສະຖຽນລະພາບ, ມິດຕະພາບ ແລະການຮ່ວມມືໃນພາກພື້ນ. ສອງຝ່າຍເຫັນດີເປັນເອກະສັນ ຊີ້ນຳຄະນະເຈລະຈາຂັ້ນສູງຂອງລັດຖະບານສອງປະເທດ ປະຕິບັດຂໍ້ຕົກລົງ ກ່ຽວກັບບັນດາຫຼັກການທີ່ເປັນພື້ນຖານໃນການຊີ້ນຳແກ້ໄຂບັນຫາໃນທະເລຫວຽດນາມ - ຈີນ ຢ່າງເຂັ້ມງວດ.
ພາຍຫຼັງການເຈລະຈາ, ບັນດາການນຳໄດ້ເປັນສັກຂີພິຍານພິທີລົງນາມໃນເອກະສານສຳຄັນ 8 ສະບັບ. ໃນນັ້ນມີສັນຍາລະຫວ່າງລັດຖະບານຫວຽດນາມ ແລະລັດຖະບານຈີນ ກ່ຽວກັບການຮ່ວມມືທາງດ້ານສາທາລະນະສຸກ, ຂໍ້ຕົກລົງຮ່ວມມືລະຫວ່າງກະຊວງຖະແຫຼງຂ່າວ ແລະ ໂທລະຄົມ ຫວຽດນາມ ກັບຫ້ອງການສື່ມວນຊົນການຕ່າງປະເທດລັດຖະບານຈີນ, ຂໍ້ຕົກລົງຮ່ວມມືລະຫວ່າງຄະນະຊາວໜຸ່ມກອມມູນິດ ໂຮ່ຈີມິນ ກັບຄະນະຊາວໜຸ່ມກອມມູນິດຈີນ ໄລຍະ 2012-2013.