(vovworld) – ຕອນເຊົ້າວັນທີ 20/8, ຢູ່ແຂວງ ນາມດິ້ງ, ທ່ານນາງຮອງປະທານປະເທດ ຫງວຽນທິຢວານ, ປະທານສະພາໜູນຊ່ວຍ - ກອງທຶນໜູນຊ່ວຍເດັກນ້ອຍ ຫວຽດນາມ, ພ້ອມກັບຄະນະປະຕິບັດງານກອງທຶນໜູນຊ່ວຍເດັກນ້ອຍ ຫວຽດນາມ ແລະ ກະຊວງສຶກສາ ແລະ ບຳລຸງສ້າງ ໄດ້ມອບທຶນສຶກສາ “ພ້ອມກັບນ້ອງໄປຮຽນ” 118 ທຶນໃຫ້ແກ່ນັກຮຽນປະສົບກັບຄວາມຫຍຸ້ງຍາກແຕ່ຮຽນເກັ່ງໃນບໍລິເວັນແຂວງ. ຊຸມປີຜ່ານມາ, ກອງທຶນໜູນຊ່ວຍເດັກນ້ອຍ ຫວຽດນາມ ແລະ ກອງທຶນສຶກສາ “ພ້ອມກັບນ້ອງໄປຮຽນ” ໄດ້ໄປເຖິງນັກຮຽນທຸກຍາກຢູ່ 44 ແຂວງ, ນະຄອນໃນທົ່ວປະເທດ, ມອບຂອງຂວັນນັບໝື່ນພູດ ດ້ວຍມູນຄ່ານັບສິບຕື້ດົ່ງ. ສະເພາະກອງທຶນໜູນຊ່ວຍເດັກນ້ອຍ ແຂວງ ນາມດິ້ງ, ໄລ່ຮອດເດືອນ 6/2013 ໄດ້ປຸກລະດົມເງິນໄດ້ກ່ວາ 2,5 ຕື້ດົ່ງເພື່ອມອບທຶນສຶກສາດ້ວຍເງິນສົດ, ລົດຖີບໃຫ້ເດັກນ້ອຍກ່ວາ 500 ຄົນ, ຜ່າຕັດໂດຍບໍ່ເສຍຄ່າໃຫ້ເດັກນ້ອຍຖືກພະຍາດ ແລະ ເດັກພິການມາແຕ່ເກີດ, ຢ້ຽມຢາມ ແລະ ມອບຂອງຂວັນໃຫ້ເດັກນ້ອຍປະສົບກັບຄວາມຫຍຸ້ງຍາກເປັນພິເສດກ່ວາ 20.000 ເທື່ອຄົນ.
ກ່ອນໜ້ານັ້ນ, ຕອນບ່າຍວັນທີ 19/8, ທ່ານນາງຮອງປະທານປະເທດ ຫງວຽນທິຢວານ ລົງຢ້ຽມຢາມ ແລະ ມອບຂອງຂວັນໃຫ້ບັນດາຄອບຄົວເປົ້າໝາຍນະໂຍບາຍພິເສດ ແລະ ບັນດາຄອບຄົວປະສົບກັບຄວາມຫຍຸ້ງຍາກພິເສດຢູ່ຕາແສງ ນາມເກື່ອງ, ເມືອງ ຕ໋ຽນຫາຍ, ແຂວງ ທ໋າຍບິ່ນ. ກ່າວຄຳເຫັນຕໍ່ອົງຄະນະພັກ ແລະ ປະຊາຊົນຕາແສງ ນາມເກື່ອງ, ທ່ານນາງຮອງປະທານປະເທດ ຫງວຽນທິຢວານ ເນັ້ນໜັກວ່າ: ຕາແສງ ນາມເກື່ອງ ມີຫຼາຍຈຸດພົ້ນເດັ່ນໃນການປະຕິບັດມະຕິສູນກາງພັກຄັ້ງທີ 7 ກ່ຽວກັບກະສິກຳ - ຊາວກະສິກອນ ແລະ ຊົນນະບົດ, ດີເດັ່ນໃນການປະຕິບັດຄຳສັ່ງເລກທີ 03 ກ່ຽວກັບການຮຳ່ຮຽນ ແລະ ປະຕິບັດຕາມຄຸນສົມບັດປະທານ ໂຮ່ຈີມິນ. ທ່ານນາງຮອງປະທານປະເທດ ຫງວຽນທິຢວານ ປາດຖະໜາວ່າ: ອົງຄະນະພັກ ແລະ ປະຊາຊົນ ຕາແສງ ນາມເກື່ອງ ສືບຕໍ່ສາມັກຄີ, ຮຳ່ຮຽນ ແລະ ປະຕິບັດຕາມຄຸນສົມບັດປະທານ ໂຮ່ຈີມິນ, ໝູນໃຊ້ບັນດາຄວາມສາມາດບົ່ມຊ້ອນ ທ່າແຮງຂອງຕາແສງເຂດແຄມທະເລເພື່ອພັດທະນາເສດຖະກິດ. ພິເສດ, ຕາແສງ ນາມເກື່ອງ ຄວນລົງທຶນໃຫ້ແກ່ພາລະກິດສຶກສາ ບຳລຸງສ້າງ ແລະ ເບິ່ງແຍງດູແລສຸຂະພາບຂອງປະຊາຊົນຢ່າງແຮງ. ທ່ານນາງຮອງປະທານປະເທດ ໄດ້ມອບຂອງຂວັນ 20 ພູດໃຫ້ບັນດາຄອບຄົວເປົ້າໝາຍນະໂຍບາຍທີ່ດີເດັ່ນ ແລະ ບັນດາຄອບຄົວປະສົມກັບຄວາມຫຍຸ້ງຍາກພິເສດຂອງຕາແສງ ນາມເກື່ອງ.