ທ່ານນາງຮອງປະທານປະເທດ ດັ້ງທິງ້ອກທິງ
ແລະ ທ່ານປະທານາທິບໍດີ Juan Manuel Santos
(ພາບສຳນັກຂ່າວສານຫວຽດນາມ)
(vovworld) - ໃນລະຫວ່າງວັນທີ 13 - 16/07 ທ່ານນາງຮອງປະທານປະເທດ ຫວຽດນາມ ດັ້ງທິງ້ອກທິງ ນຳໜ້າຄະນະຜູ້ແທນ ຫວຽດນາມ ຢ້ຽມຢາມ ໂກໂລມບີ ຢ່າງເປັນທາງການ. ທີ່ການພົບປະເຈລະຈາກັບທ່ານປະທານາທິບໍດີ ໂກໂລມບີ Juan Manuel Santos ໃນວັນທີ 14/07, 2 ຝ່າຍເຫັນດີເປັນເອກະພາບຕີລາຄາວ່າການພົວພັນ 2 ຝ່າຍໃນໄລຍະຜ່ານມາສືບຕໍ່ພັດທະນາຢ່າງຕັ້ງໜ້າໃນທຸກຂົງເຂດຄື: ການພົວພັນດ້ານການເມືອງສືບຕໍ່ໄດ້ຮັບການປັບປຸງ ແລະ ເພີ່ມທະວີຄວາມໄວ້ເນື້ອເຊື່ອໃຈ; ການແລກປ່ຽນດ້ານການຄ້າ 2 ຝ່າຍສືບຕໍ່ຮັກສາທ່າເຕີບໂຕຢ່າງລຽນຕິດ; ການຮ່ວມມືດ້ານວັດທະນະທຳ, ບຳລຸງສ້າງ ແລະ ບັນດາຂົງເຂດອື່ນໆ ມີບັນດາບາດກ້າວແທດຈິງ…ການນຳ 2 ປະເທດລ້ວນແຕ່ເຫັນດີເປັນເອກະພາບ ໃນໄລຍະຈະມາເຖິງຄວນຕັ້ງໜ້າຊຸກຍູ້ຜັນຂະຫຍາຍບັນດາມາດຕະການລະອຽດ ເພື່ອແນໃສ່ຍົກສູງຄວາມເຂົ້າອົກເຂົ້າໃຈເຊິ່ງກັນ ແລະ ກັນ ແລະ ພັດທະນາ, ເປີດກ້ວາງການພົວພັນຮ່ວມມື 2 ຝ່າຍໃນທຸກຂົງເຂດ; ສ້າງຕັ້ງ “ຄະນະກຳມະການປະສົມກ່ຽວກັບການຮ່ວມມືດ້ານເສດຖະກິດ - ການຄ້າ, ການລົງທຶນ ແລະ ວິທະຍາສາດ - ການເຕັກນິກ” ລະຫວ່າງລັດຖະບານ 2 ປະເທດໂດຍໄວ, ຮັບສາກົນໄກທາບທາມດ້ານການເມືອງຂັ້ນຮອງລັດຖະມົນຕີການຕ່າງປະເທດ 2 ປະເທດເປັນປະຈຳ ແລະ ມີປະສິດທິຜົນ…
ແລະກໍ່ໃນວັນດຽວກັນທ່ານນາງຮອງປະທານປະເທດ ດັ້ງທິງ້ອກທິງ ມີການເຮັດວຽກກັບທ່ານຮອງປະທານາທິບໍດີ ໂກໂລມບີ German Vargas Lieras ແລະ ທ່ານນາງລັດຖະມົນຕີກະຊວງການຕ່າງປະເທດ ໂກໂລມບີ Maria Angela Holguin.