ຮອງປະທານສະພາແຫ່ງຊາດ Tong Thi Phong ຕ້ອນຮັບຄະນະຜູ້ແທນ ຕຳຫຼວດດີເດັ່ນ
ພາບປະກອບ
(vovworld) – ເນື່ອງໃນໂອກາດສະເຫຼີມສະຫຼອງ 67 ປີແຫ່ງການປະຕິວັດເດືອນ 8 ແລະ ວັນມູນເຊື້ອກຳລັງຕຳຫຼວດປະຊາຊົນ (19/8/1945 – 19/8/2012), ຕອນບ່າຍວັນທີ 17/8, ຢູ່ສຳນັກງານຫ້ອງວ່າການສະພາແຫ່ງຊາດ, ທ່ານນາງຮອງປະທານສະພາແຫ່ງຊາດຫວຽດນາມ Tong Thi Phong ໄດ້ໃຫ້ການຕ້ອນຮັບຄະນະຜູ້ແທນຊາວໜຸ່ມຕຳຫຼວດດີເດັ່ນ ທີ່ມານະຄອນຫຼວງ ຮ່າໂນ້ຍ ເພື່ອລາຍງານຜົນງານຕໍລຸງໂຮ່ ແລະ ເຂົ້າຮ່ວມພິທີຍ້ອງຍໍສັນລະເສີນ “ຊາວໜຸ່ມຕຳຫຼວດ ດີເດັ່ນປະຕິບັດຕາມຄຳສັ່ງສອນຂອງລຸງ ໂຮ່: ສະຫຼະຊີວິດເພື່ອປະເທດຊາດ, ຮັບໃຊ້ປະຊາຊົນ” ປີ 2012. ທີ່ການຕ້ອນຮັບ, ທ່ານນາງຮອງປະທານສະພາແຫ່ງຊາດ Tong Thi Phong ສະເໜີໃຫ້ຊາວໜຸ່ມຕຳຫຼວດ ຄວນສືບຕໍ່ຍົກສູງສະຕິຕືນຕົວຕໍ່ກົນອຸບາຍ, ເລ່ຫຼ່ຽມຂອງບັນດາກຳລັງທີ່ເປັນປໍລະປັກ ທີ່ຫວັງມ້າງທຳລາຍປະເທດຊາດ, ຍົກສູງສະຕິຮັບຜິດຊອບ, ຝຶກຝົນຫຼໍ່ຫຼອມຄຸນນະທາດດ້ານການເມືອງ, ຊາບຊຶມຄຳສັ່ງສອນ 6 ຂໍ້ຂອງລຸງໂຮ່ທີ່ມີຕໍ່ຕຳຫຼວດປະຊາຊົນ, ຍູ້ແຮງການຮຳ່ຮຽນ ແລະ ປະຕິບັດຕາມແບບຢ່າງຄຸນສົມບັດປະທານ ໂຮ່ຈີມິນ, ປະກອບສ່ວນຮັກສາຄວາມສະຫງົບປອດໄພຄວາມເປັນລະບຽບຮຽບຮ້ອຍທາງສັງຄົມ. ທ່ານນາງຮອງປະທານສະພາແຫ່ງຊາດ ເວົ້າວ່າ:
“ຫວັງວ່າໃນໄລຍະທີ່ຈະມາເຖິງ, ດ້ວຍຄວາມຂະຫຍັນຂັນເຄື່ອນ ຫົວຄິດປະດິດສ້າງຂອງວຽກງານສ້າງກຳລັງຕຳຫຼວດ, ວຽກງານຊາວໜຸ່ມ ແລະ ຂະບວນການຊາວໜຸ່ມໃນກຳລັງຕຳຫຼວດ, ບັນດາສະຫາຍຈະສືບຕໍ່ສະຫຼຸບ ແລະ ທະວີຄຸນບັນດາແບບຢ່າງ, ທີ່ດີເດັ່ນເພື່ອໂຄສະນາ, ສຶກສາໃນກຳລັງ ແລະ ຂະບວນການປົກປັກຮັກສາຄວາມສະຫງົບປອດໄພຂອງປະເທດຊາດ. ດັ່ງນັ້ນ, ຂ້າພະເຈົ້າຫວັງວ່າ:ເມື່ອບັນດາສະຫາຍບັນລຸໄດ້ຜົນງານແລ້ວ, ຈະຕ້ອງສືບຕໍ່ປະກອບສ່ວນເຂົ້າໃນການເຄື່ອນໄຫວຂອງຂະແໜງ, ຕິດພັນກັບການຮັບປະກັນຄວາມສະຫງົບປອດໄພ, ຄວາມເປັນລະບຽບຮຽບຮ້ອຍ, ຮັກສາສະຖຽນລະພາບດ້ານການເມືອງຢູ່ທ້ອງຖີ່ນ ແລະ ສ້າງກຳລັງໃຫ້ນັບມື້ນັບໝັ້ນຄົງເຂັ້ມແຂງ”