ຮອງລັດຖະມົນຕີການຕ່າງປະເທດບູ່ຍແທງເຊີນເປັນປະທານຮ່ວມທາບທາມຄຳເຫັນການເມືອງຢູ່ແອດສະປາຍ
ທ່ານ ບູ່ຍແທງເຊີນ ແລະ ທ່ານ Ybanez Ignacio Rubia
(ພາບອິນເຕີແນດ)
(vovworld) – ໂດຍໄດ້ຮັບຄຳເຊີນຂອງກະຊວງການຕ່າງປະເທດ ແລະ ການຮ່ວມມື ແອດສະປາຍ, ໃນລະຫວ່າງວັນທີ 16 – 18/9 ຢູ່ Madrid, ທ່ານລັດຖະມົນຕີຊ່ວຍວ່າການກະຊວງການຕ່າງປະເທດຫວຽດນາມ ບູ່ຍແທງເຊີນ ພ້ອມກັບລັດຖະມົນຕີກະຊວງການຕ່າງປະເທດ ແລະ ການຮ່ວມມື ແອດສະປາຍ ທ່ານ Ybanez Ignacio Rubia ເປັນປະທານຮ່ວມທາບທາມຄຳເຫັນການເມືອງຂັ້ນລັດຖະມົນຕີຊ່ວຍວ່າການກະຊວງການຕ່າງປະເທດ ຫວຽດນາມ - ແອດສະປາຍ. ໃນໄລຍະຢູ່ຢ້ຽມຢາມ ແອດສະປາຍ, ທ່ານ ບູ່ຍແທງເຊີນ ໄດ້ພົບປະທ່ານລັດຖະມົນຕີກະຊວງເສດຖະກິດ ແລະ ແກ່ງແຍ້ງ ແອດສະປາຍ.
ທີ່ການທາບທາມຄຳເຫັນ, ຝ່າຍ ແອດສະປາຍ ຢືນຢັນວ່າ: ຫວຽດນາມ ແມ່ນໜຶ່ງໃນສາມຄູ່ຮ່ວມມືສຳຄັນທີ່ສຸດຂອງ ແອດສະປາຍ ຢູ່ພາກພື້ນ ອາຊີຕາເວັນອອກສຽງໃຕ້ ແລະ ປາດຖະໜາຢາກເຮັດໃຫ້ການພົວພັນຄູ່ຮ່ວມມືຍຸດທະສາດກັບ ຫວຽດນາມ ເລິກເຊິ່ງກ່ວາອີກ. ທ່ານລັດຖະມົນຕີຊ່ວຍວ່າການ ບູ່ຍແທງເຊີນ ເນັ້ນໜັກວ່າ: ຫວຽດນາມ ຍາມໃດກໍຖືເປັນສຳຄັນການເພີ່ມທະວີ ແລະ ພັດທະນາການພົວພັນຮ່ວມມືຫລາຍດ້ານ, ມີປະສິດທິຜົນ, ແທດຈິງກັບ ແອດສະປາຍ. 2 ຝ່າຍເຫັນດີເປັນເອກະສັນເຮັດໃຫ້ບັນດາການຮ່ວມມື 2 ຝ່າຍໃນຂອບເຂດຄູ່ຮ່ວມມືຍຸດທະສາດ ຫວຽດນາມ - ແອດສະປາຍ ເລິກເຊິ່ງກ່ວາອີກ. ກ່ຽວກັບການພົວພັນດ້ານເສດຖະກິດ, ການຄ້າ, 2 ຝ່າຍຢືນຢັນວ່າ: ສືບຕໍ່ສົ່ງເສີມ ແລະ ສ້າງເງື່ອນໄຂສະດວກໃຫ້ປະຊາຄົມວິສາຫະກິດ 2 ປະເທດ, ໃນນັ້ນມີບັນດາວິສາຫະກິດຂະໜາດກາງ ແລະ ຂະໜາດໜ້ອຍ ເພີ່ມທະວີການພົບປະ, ແລກປ່ຽນບົດຮຽນ ແລະ ເຊື່ອມຕໍ່ຄູ່ຮ່ວມມື, ນັບທັງຕາມຮູບການຄູ່ຮ່ວມມືພາກລັດ - ເອກະຊົນ (PPP), ບຸລິມະສິດໃຫ້ແກ່ການຮ່ວມມືໃນບາງຂົງເຂດ ຊຶ່ງ ຫວຽດນາມ ມີຄວາມຕ້ອງການ ແລະ ແອດສະປາຍ ມີທ່າແຮງ. 2 ຝ່າຍຢືນຢັນຈະສົມທົບກັນຢ່າງແໜ້ນແຟ້ນ ແລະ ສະໜັບສະໜູນເຊິ່ງກັນ ແລະ ກັນຢູ່ບັນດາເວທີປາໄສຫລາຍຝ່າຍ, ໃນພາກພື້ນ ແລະ ສາກົນ.
ກ່ຽວກັບບັນຫາທະເລຕາເວັນອອກ, ຝ່າຍ ແອດສະປາຍ ແບ່ງປັນທັດສະນະ ແລະ ສະໜັບສະໜູນວິທີສຳພັດຂອງ ຫວຽດນາມ ເພື່ອແກ້ໄຂບັນດາຄວາມຂັດແຍ້ງກັນດ້ວຍສັນຕິວິທີ, ບໍ່ນຳໃຊ້ກຳລັງອາວຸດ ຫຼື ນາບຂູ່ນຳໃຊ້ກຳລັງອາວຸດ, ເຄົາລົບກົດໝາຍສາກົນ, ພິເສດແມ່ນສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982, ຮັບປະກັນຄວາມສະຫງົບ, ປອດໄພ, ຄວາມເສລີໃນການເດີນທະເລ ແລະ ທາງອາກາດ, ປະຕິບັດຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC)ຢ່າງຄົບຖ້ວນ, ກ້າວໄປເຖິງການສ້າງປະມວນຂໍ້ກຳນົດການປະພຶດຢູ່ທະເລຕາເວັນອອກ (COC).