ງານມະໂຫລານການທ່ອງທ່ຽວໝູ່ບ້ານຫັດຖະກຳ
ທີ່ເປັນມູນເຊື້ອ ຮ່າໂນ້ຍ - ຫວຽດນາມ ປີ 2016
(vovworld) - ໃນຂອບເຂດງານມະໂຫລານການທ່ອງທ່ຽວໝູ່ບ້ານຫັດຖະກຳທີ່ເປັນມູນເຊື້ອ ຮ່າໂນ້ຍ - ຫວຽດນາມ ປີ 2016. ຕອນເຊົ້າວັນທີ 1/10, ຢູ່ພະລາຊະວັງ ຮ່ວາງແທ່ງທັງລອງ, ພະແນກທ່ອງທ່ຽວ ຮ່າໂນ້ຍ ໄດ້ຈັດ ພິທີແຫ່ບັນພະບຸລຸດຜູ້ກໍ່ຕັ້ງອາຊີບທີ່ເປັນມູນເຊື້ອຂອງສາມໝູ່ບ້ານອາຊີບທີ່ດີເດັ່ນ, ນັ້ນແມ່ນໝູ່ບ້ານຜະລິດເຄື່ອງເຟີນີເຈີສິລະປະ ລາຊວຽນ, ເມືອງ ອີອຽນ, ແຂວງ ນາມດິ້ງ; ໝູ່ບ້ານຕຳແພໄໝ ຫວ້ານຟຸກ, ເມືອງ ຮ່າດົງ, ຮ່າໂນ້ຍ ແລະ ໝູ່ບ້ານຜະລິດເຄື່ອງປັ້ນດິນເຜົາເຄືອບ ບາດຈ່າງ, ເມືອງ ຢາເລິມ, ຮ່າໂນ້ຍ.
ນີ້ແມ່ນໜຶ່ງໃນບັນດາພິທີທີ່ເປັນມູນເຊື້ອ ເຊິ່ງໄດ້ຮັບການອະນຸລັກຮັກສາໄວ້ນັບແຕ່ພັນປີມານີ້, ມີຄວາມໝາຍພົວພັນແລກປ່ຽນວັດທະນະທຳ, ສະນິດຕິດພັນປະຊາຄົມນຳກັນ… ກ່າວຄວາມເຫັນທີ່ ພິທີແຫ່ບັນພະບຸລຸດຜູ້ກໍ່ຕັ້ງອາຊີບທີ່ເປັນມູນເຊື້ອ, ທ່ານ ເຈິ່ນດຶກຫາຍ, ຮອງຫົວໜ້າພະແນກທ່ອງທ່ຽວ ຮ່າໂນ້ຍ, ໃຫ້ຮູ້ວ່າ:
“ການຄົງຕົວຂອງບັນດາໝູ່ບ້ານຫັດຖະກຳ, ຖະໜົນອາຊີບຫັດຖະກຳ ໄດ້ສ້າງເປັນຄວາມເຊື່ອຖືບູຊາບັນພະບຸລຸດ, ຜູ້ກໍ່ຕັ້ງອາຊີບຂອງຊາວ ທັງລອງ - ຮ່າໂນ້ຍ. ນີ້ແມ່ນໂອກາດເພື່ອຫວນຄືນຄຸນງາມຄວາມດີຂອງລຸ້ນກ່ອນ; ເຊີດຊູ ແລະ ຮູ້ບຸນຄຸນຜູ້ທີ່ໄດ້ກໍ່ຕັ້ງອາຊີບ, ສອນອາຊີບໃຫ້ປະຊາຊົນ. ພ້ອມກັນນັ້ນແມ່ນການຍ້ອງຍໍໝູ່ບ້ານອາຊີບ, ປະຫວັດສາດ ວັດທະນະທຳໝູ່ບ້ານອາຊີບ, ຄວາມສາມາດບົ່ມຊ້ອນດ້ານເສດຖະກິດຂອງໝູ່ບ້ານຫັດຖະກຳທີ່ເປັນມູນເຊື້ອ, ປຸກລຸກຄວາມເອກອ້າງທະນົງໃຈກ່ຽວກັບໝູ່ບ້ານອາຊີບ, ຂະແໜງອາຊີບທີ່ເປັນມູນເຊື້ອ; ພ້ອມທັງສົ່ງເສີມບັນດາໝູ່ບ້ານອາຊີບ ໃຫ້ມີຄວາມເອກອ້າງທະນົງໃຈຕໍ່ຜູ້ກໍ່ຕັ້ງອາຊີບ, ບ້ານເກີດເມືອງນອນ, ອອກແຮງງານຢ່າງຫ້າວຫັນ ແລະ ມີຫົວຄິດປະດິດສ້າງ“.