(vovworld) - ຕອນເຊົ້າວັນທີ 11/03, ຢູ່ສຳນັກງານລັດຖະບານ, ທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງ ໄດ້ເປັນປະທານການເຮັດວຽກກັບສະຫະພັນໃຫຍ່ແຮງງານຫວຽດນາມ ເພື່ອແນໃສ່ຕີລາຄາໝາກຜົນແຫ່ງການປະຕິບັດກົດລະບຽບກ່ຽວກັບການ ພົວພັນວຽກງານລະຫວ່າງລັດຖະບານ ແລະ ສະຫະພັນໃຫຍ່ແຮງງານຫວຽດນາມ ໃນປີຜ່ານມາ, ພ້ອມທັງເປັນເອກະພາບຕໍ່ຈຸດສຸມວຽກງານໃນປີ 2014.
ທີ່ການເຮັດວຽກ, ທ່ານນາຍົກລັດຖະມົນຕີຮຽກຮ້ອງໃຫ້ຕ້ອງເສີມຂະຫຍາຍໝາກຜົນການສົມທົບກັນລະຫວ່າງ 2 ຝ່າຍໃນໄລຍະຈະມາເຖິງຢ່າງຕັ້ງໜ້າ, ລັດຖະບານ ແລະ ສະຫະພັນໃຫຍ່ແຮງງານຫວຽດນາມ ເພີ່ມທະວີການສົມທົບກັນສ້າງກົດໝາຍ, ນະໂຍບາຍກ່ຽວຂ້ອງໂດຍກົງເຖິງພະນັກງານ, ພາລະກອນ, ກຳມະກອນ ຢ່າງລະອຽດ ແລະ ແທດຈິງ. ທ່ານນາຍົກລັດຖະມົນຕີເນັ້ນໜັກວ່າ, ຕ້ອງສ້າງທຸກເງື່ອນໄຂໃຫ້ບຸລິມະສິດຕໍ່ຄົນງານເຮັດວຽກບົນທະເລ. ທ່ານກ່າວວ່າ.
“ຂ້າພະເຈົ້າເອົາໃຈໃສ່ເປັນພິເສດເຖິງຄົນງານເຮັດວຽກບົນທະເລ. ຂົງເຂດນີ້ຕ້ອງຮັບບຸລິມະສິດ ແລະ ການໜູນຊ່ວຍຢ່າງສຸງສຸດ, ອັນໃດທີ່ໜູນຊ່ວຍໄດ້ພວກເຮົາກໍ່ໜູນຊ່ວຍ. ທີ່ໜຶ່ງແມ່ນ ພາຫະນະຕ້ອງມີເງິນທຶນພື່ອຕໍ່ກໍ່າປັ່ນໃຫຍ່ດ້ວຍເຫຼັກ, ມີກຳລັງແຮງມ້າສູງ ຈຶ່ງຈະອອກໄກຝັ່ງໄດ້ ແຕ່ປະຊາຊົນບໍ່ມີທຶນຢ່າງພຽງພໍ ຕ້ອງມີບ້ວງສິ້ນເຊື່ອໃຫ້ໂຄງການນີ້. ທີ 2, ຂ້າພະເຈົ້າຮຽກຮ້ອງໃຫ້ທະນາຄານແຫ່ງລັດ ເດັດດຽວບໍ່ປະໃຫ້ຊາວປະມົງປະກອບອາຊີບປະມົງຢູ່ທະເລຕ້ອງກູ້ຢື່ມທຶນດ້ວຍຄ່າດອກເບ້ຍສູງ. ທີ 3 ແມ່ນໜູນຊ່ວຍປະກັນໄພ. ຂ້າພະເຈົ້າສະເໜີໃຫ້ກະຊວງການເງິນ ພ້ອມກັບກະຊວງແຮງງານທະຫານເສຍອົງຄະ ແລະ ສັງຄົມ ແລະ ກະຊວງກະສິກຳພັດທະນາຊົນນະບົດ ຕ້ອງຄິດໄລ່ໜູນຊ່ວຍການປະກັນຊີວິດ, ບາດເຈັບ ໃຫ້ຄົນງານປະກອບອາຊີບປະມົງທຸກຄົນ”.
ທ່ານນາຍົກລັດຖະມົນຕີ ຫງວຽນເຕີນຢຸງ ຕໍ່ສະເໜີໃຫ້ສະຫະພັນໃຫຍ່ແຮງງານຫວຽດນາມ ສົມທົບກັບລັດຖະບານເພື່ອສ້າງແຜນການ, ເນື້ອໃນຢ່າງລະອຽດ ເພື່ອແນໃສ່ຍູ້ແຮງການຕິດຕາມກວດກາການປະຕິບັດບັນດານະໂຍບາຍທີ່ໄດ້ປະກາດໃຊ້ ທີ່ກ່ຽວຂ້ອງເຖິງຄົນງານ.