ເປັນຄັ້ງທຳອິດທີ່ຫວຽດນາມໄດ້ຮັບເລືອກຕັ້ງເຂົ້າເປັນຄະນະກຳມະການກົດໝາຍສາກົນຂອງສະຫະປະຊາຊາດ
(ທ່ານເອກອັກຄະລັດຖະທູດຫວຽດນາມ ປະຈຳ ຄູເວດ ຫງວຽນຮົ່ງທາວ)
(vovworld) - ຕອນບ່າຍວັນທີ 03/11 (ຕາມເວລານິວຢອກ), ສະມັດຊາໃຫຍ່ສະຫະປະຊາຊາດ ໄດ້ດຳເນີນການປ່ອນບັດຄັດເລືອກບັນດາສະມາຊິກຂອງຄະນະກຳມະການກົດໝາຍສາກົນ. ດ້ວຍຈຳນວນບັດສະໜັບສະໜູນ 120/191 ບັດ, ທ່ານເອກອັກຄະລັດຖະທູດຫວຽດນາມ ປະຈຳ ຄູເວດ ຫງວຽນຮົ່ງທາວ ໄດ້ຮັບເລືອກຕັ້ງເປັນສະມາຊິກຄະນະກຳມະການກົດໝາຍສາກົນ. ນີ້ແມ່ນຄັ້ງທຳອິດທີ່ຫວຽດນາມ ມີຜູ້ອອກສະໝັກໄດ້ຮັບເລືອກຕັ້ງເປັນສະມາຊິກຄະນະກຳມະການກົດໝາຍສາກົນ.
ທ່ານເອກອັກຄະລັດຖະທູດ ຫງວຽນຮົ່ງທາວ ແມ່ນນັກຊ່ຽວຊານດ້ານກົດໝາຍສາກົນ ດ້ວຍວິຊາການຄົ້ນຄວ້າທີ່ໝັ້ນແກ່ນ ແລະ ປະສົບການພຶດຕິກຳຕົວຈິງທີ່ອຸດົມສົມບູນ. ທ່ານເຄີຍເປັນຮອງປະທານຄະນະກຳມະການຊາຍແດນແຫ່ງຊາດ, ເປັນຫົວໜ້າຄະນະເຈລະຈາບັນດາສັນຍາຊາຍແດນກັບບັນດາປະເທດບ້ານໃກ້ເຮືອນຄຽງຂອງຫວຽດນາມ, ເປັນທີ່ປຶກສາດ້ານກົດໝາຍໃຫ້ຮ່າງກົດໝາຍວ່າດ້ວຍທະເລຫວຽດນາມ ປີ 2012… ທ່ານມີປະສົບການ 40 ປີແຫ່ງການເຄື່ອນໄຫວໃນຂະແໜງການທູດ ແລະ ທ່ານເຄີຍເປັນເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງສສ.ຫວຽດນາມ ປະຈຳມາເລເຊຍ (2011 - 2014) ແລະ ປະຈຸບັນທ່ານເປັນເອກອັກຄະລັດຖະທູດປະຈຳ ຄູເວດ (ແຕ່ປີ 2014). ເລື່ອງແນະນຳທ່ານເອກອັກຄະລັດຖະທູດ ຫງວຽນຮົ່ງທາວ ອອກສະໝັກເລືອກຕັ້ງເປັນສະມາຊິກຄະນະກຳມະການກົດໝາຍສາກົນ ແມ່ນສະແດງໃຫ້ເຫັນຄວາມປາດຖະໜາຂອງຫວຽດນາມ ເພື່ອປະກອບສ່ວນເຂົ້າໃນການພັດທະນາຄວາມກ້າວໜ້າ ແລະ ຫັນກົດໝາຍສາກົນເປັນປະມວນກົດໝາຍ, ປະຕິບັດແຜນນະໂຍບາຍຢ່າງເປັນເຈົ້າການ, ຕັ້ງໜ້າເຊື່ອມໂຍງເຂົ້າກັບສາກົນຂອງຫວຽດນາມ.
ທ່ານນາງເອກອັກຄະລັດຖະທູດ, ຫົວໜ້າຄະນະຜູ້ປະຈຳການຫວຽດນາມ ຢູ່ສະຫະປະຊາຊາດ ຫງວຽນເຟືອງງາ, ຕີລາຄາ ເລື່ອງເປັນຄັ້ງທຳອິດທີ່ມີພົນລະເມືອງຫວຽດນາມ, ໄດ້ຮັບເລືອກຕັ້ງເຂົ້າອົງການສຳຄັນຍິ່ງຂອງສະຫະປະຊາຊາດ ແມ່ນບາດກ້າວສຳຄັນໃນວິວັດທະນາການເຊື່ອມໂຍງເຂົ້າກັບສາກົນຂອງຫວຽດນາມ, ໄດ້ຊີ້ໃຫ້ເຫັນການເຂົ້າຮ່ວມຢ່າງຕັ້ງໜ້າຂອງຫວຽດນາມ ຢູ່ບັນດາເວທີປາໄສດ້ານກົດໝາຍຂອງສະຫະປະຊາຊາດ ກໍຄືຢູ່ລະດັບພາກພື້ນ: ອາຊຽນ, APEC. ເຫດການນີ້ສະແດງໃຫ້ເຫັນຄວາມໄວ້ເນື້ອເຊື່ອໃຈຂອງເພື່ອນມິດສາກົນສຳລັບທ່ານເອກອັກຄະລັດຖະທູດ ຫງວຽນຮົ່ງທາວ, ພ້ອມທັງຢືນຢັນອິດທິພົນຊື່ສຽງສາກົນຂອງຫວຽດນາມ.