(ພາບ: backan.gov.vn)
(vovworld)- ກ່າວຄຳເຫັນຊີ້ນຳກອງປະຊຸມໂດຍກົງທາງເຄືອຍຂ່າຍອິນເຕີເນັດທົ່ວປະເທດ ສະຫລຸບວຽກງານປີ 2013 ແລະ ຜັນຂະຫຍາຍໜ້າທີ່ປີ 2014 ໂດຍກະຊວງການເງິນຫວຽດນາມ ຈັດຂຶ້ນເມື່ອຕອນເຊົ້າວັນທີ 30/12, ທ່ານນາຍົກລັດຖະມົນຕີຫວຽດນາມ ຫງວຽນເຕິນຢຸງ ໄດ້ຕີລາຄາສູງຂະແໜງການເງິນກໍ່ຄືທ້ອງຖິ່ນຕ່າງໆ ໄດ້ມານະພະຍາຍາມຜ່ານຜ່າຄວາມຫຍຸ້ງຍາກ, ບັນລຸໄດ້ບັນດາໝາກຜົນທີ່ຕັ້ງໜ້າ, ປະກອບສ່ວນສຳຄັນ, ໂດຍກົງເຂົ້າໃນໝາກຜົນການພັດທະນາເສດຖະກິດສັງຄົມລວມຂອງປະເທດຊາດ. ທ່ານນາຍົກລັດຖະມົນຕີຫວຽດນາມ ຫງວຽນເຕິນຢຸງ ໄດ້ຊີ້ແຈ້ງຄວາມຫຍຸ້ງຍາກ, ສິ່ງທ້າທາຍ ແລະ ຄວາມຈຳກັດຊື່ງຂະແໜງການເງິນຕ້ອງສຸມໃສ່ແກ້ໄຂ, ທ່ານເນັ້ນໜັກວ່າ:
“ຕ້ອງສົມທົບບໍລິຫານນະໂຍບາຍງົບປະມານ ແລະ ນະໂຍບາຍເງິນຕາຢ່າງມີປະສິດທິຜົນເພື່ອແນໃສ່ເພີ່ມທະວີການຮັກສາເສດຖະກິດມະຫາພາກເປັນປົກກະຕິ, ປະກອບສ່ວນແກ້ໄຂຄວາມຫຍຸ້ງຍາກໃກ້ແກ່ການຜະລິດດຳເນີນທຸລະກິດ, ຜ່ານນັ້ນຈະຊຸກຍູ້, ຟື້ນຟູການເຕີບໂຕໃຫ້ສູງກ່ວາປີ 2013 ແລະ ພ້ອມກັນປະກອບສ່ວນຊຸກຍູ້ການສ້າງໂຄງປະກອບເສດຖະກິດຄືນໃໝ່“.
ບົນເນື້ອໃນຈິດໃຈດັ່ງກ່າວ, ທ່ານນາຍົກລັດຖະມົນຕີຫວຽດນາມ ຫງວຽນເຕິນຢຸງ ຮຽກຮ້ອງການປະສານສົມທົບລະຫວ່າງຂະແໜງການເງິນ ແລະ ທະນາຄານ, ສືບຕໍ່ແກ້ໄຂຄວາມຫຍຸ້ງຍາກ, ສ້າງເງື່ອນໄຂອຳນວຍຄວາມສະດວກໃຫ້ແກ່ການຜະລິດດຳເນີນທຸລະກິດ, ໂດຍສະເພາະແມ່ນອັດຕາດອກເບັ້ຍເໝາະສົມ, ອັດຕາແລກປ່ຽນເງິນຕາເປັນປົກກະຕິ, ຄວບຄຸມໄພເງິນເຟີ້ຕາມຈຸດໝາຍເພື່ອແນໃສ່ຊຸກຍູ້ການເຕີບໂຕ. ທ່ານນາຍົກລັດຖະມົນຕີຫວຽດນາມ ຫງວຽນເຕິນຢຸງ ໃສ່ໃຈວ່າ: ຂະແໜງການເງິນຕ້ອງຕັ້ງໜ້າເຊື່ອມໂຍງເຂົ້າກັບສາກົນ, ພິເສດແມ່ນໃນການສ້າງບັນດາວິທີເຈລະຈາກ່ຽວກັບພາສີ, ອາກອນ, ການຄ້າ, ເປັນເຈົ້າການສະເໜີບັນດາມາດຕະການເພື່ອຍູ້ແຮງການສົ່ງອອກ, ດຶງດູດເງິນລົງທຶນ, ຈຳກັດບັນດາການກະທົບທີ່ຫຍໍ້ທໍ້ໃນວິວັດການເຊື່ອມໂຍງຂອງປະເທດຊາດ./.