(vovworld) - ໂດຍໄດ້ຮັບຄຳເຊີນຂອງພົນເອກ Tea Banh, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດແຫ່ງລາຊະອານາຈັກກຳປູເຈຍ, ທ່ານພົນເອກ ໂງຊວນລິກ, ລັດຖະມົນຕີກະຊວງປ້ອງກັນປະເທດຫວຽດນາມ ໄດ້ນຳໜ້າຄະນະຜູ້ແທນການທະຫານຂັ້ນສູງຫວຽດນາມ ໄປຢ້ຽມຢາມມິດຕະພາບລາຊະອານາຈັກກຳປູເຈຍ ຢ່າງເປັນທາງການ ໃນລະຫວ່າງວັນທີ 31/05 – 01/06. ຕອນເຊົ້າວັນທີ 01/06, ຢູ່ສຳນັກງານກະຊວງປ້ອງກັນປະເທດກຳປູເຈຍ, ພົນເອກ ໂງຊວນລິກ ແລະ ຄະນະຜູ້ແທນການທະຫານຂັ້ນສູງຫວຽດນາມ ໄດ້ດຳເນີນການເຈລະຈາກັບຄະນະຜູ້ແທນການທະຫານຂັ້ນສູງແຫ່ງລາຊະອານາຈັກກຳປູເຈຍ, ໂດຍທ່ານພົນເອກ Tea Banh ເປັນຫົວໜ້າຄະນະ. ລັດຖະມົນຕີ 2 ທ່ານໄດ້ຖືວ່າ, ການຮ່ວມມືດ້ານປ້ອງກັນຊາດລະຫວ່າງ 2 ຝ່າຍໄດ້ຮັບການຜັນຂະຫຍາຍບົນຈິດໃຈອະນຸສັນຍາກ່ຽວກັບການປ້ອງກັນຊາດ ແລະ ບັນດາຂໍ້ຕົກລົງທີ່ບັນລຸໄດ້ລະຫວ່າງລັດຖະບານ ແລະ ກອງທັບ 2 ປະເທດ. ລັດຖະມົນຕີ 2 ທ່ານໄດ້ເຫັນດີນຳກັນວ່າ ໃນໄລຍະຈະມາເຖິງຈະສືບຕໍ່ຜັນຂະຫຍາຍຢ່າງຄົບຖ້ວນ ແລະ ມີປະສິດທິຜົນບັນດາເນື້ອໃນຂອງອະນຸສັນຍາ ກ່ຽວກັບການຮ່ວມມືດ້ານປ້ອງກັນຊາດ ດ້ວຍຈຸດໝາຍເພີ່ມທະວີຄວາມຮູ້, ຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ, ຮັບປະກັນສະພາບແວດລ້ອມສັນຕິພາບ, ສະຖຽນລະພາບໃຫ້ທັງ 2 ຝ່າຍໃນການພັດທະນາເສດຖະກິດ ແລະ ເຮັດໃຫ້ບັນດາກົນອຸບາຍແບ່ງແຍກການພົວພັນ 2 ປະເທດຖືກປະລາໄຊ.
ສ່ວນທ່ານພົນເອກ ໂງຊວນລິກ ໄດ້ໃຫ້ຮູ້ວ່າ, ເລື່ອງເລືອກເອົາກຳປູເຈຍ ແມ່ນໜຶ່ງໃນບັນດາປະເທດທຳອິດປະຕິບັດການໄປຢ້ຽມຢາມ ໃນຖານະຕຳແໜ່ງໃໝ່, ອີກຄັ້ງໜຶ່ງໄດ້ເປັນການຢືນຢັນວ່າ ຫວຽດນາມ ຖືເປັນສຳຄັນການພົວພັນມິດຕະພາບ, ການຮ່ວມມືຮອບດ້ານກັບກຳປູເຈຍ.