ເພີ່ມທະວີການຮ່ວມມືພັດທະນາໃນຫຼາຍຂົງເຂດລະຫວ່າງປຣາຮາ-ຮ່າໂນ້ຍ
ທ່ານ ຮອງລັດຖະມົນຕີກະຊວງການຕ່າງປະເທດ ສ. ເຊັກໂກ Lukas Kaucky ແລະ ທ່ານຮອງປະທານຄະນະກຳມະການປະຊາຊົນນະຄອນ ຮ່າໂນ້ຍ ຫງວຽນຢ໋ວານຕ່ວານ
|
(vovworld) – ຕອນບ່າຍວັນທີ 1/11, ທ່ານ ຫງວຽນຢ໋ວານຕ່ວານ, ຮອງປະທານຄະນະກຳມະການປະຊາຊົນນະຄອນ ຮ່າໂນ້ຍ ໄດ້ຕ້ອນຮັບທ່ານ Lukas Kaucky, ຮອງລັດຖະມົນຕີກະຊວງການຕ່າງປະເທດ ສ. ເຊັກໂກ, ກຳມະການສະພານະຄອນ ປຣາຮາ ທີ່ພວມຢ້ຽມຢາມ ແລະ ເຮັດວຽກຢູ່ ຫວຽດນາມ. ທີ່ການເຮັດວຽກ, ທ່ານຮອງລັດຖະມົນຕີ Lukas Kaucky ໃຫ້ຮູ້ວ່າ: ຈຸດປະສົງຂອງການຢ້ຽມຢາມແມ່ນເພື່ອແນໃສ່ເພີ່ມທະວີການພົວພັນຮ່ວມມືມິດຕະພາບໃນຫຼາຍຂົງເຂດລະຫວ່າງນະຄອນ ປຣາຮາ ແລະ ຮ່າໂນ້ຍ. ລະອຽດຄື, ນະຄອນ ປຣາຮາ ພວມເອົາໃຈໃສ່ ແລະ ມີຄວາມມຸ່ງມາດປາດຖະໜາຢາກຮ່ວມມືພ້ອມກັບ ຮ່າໂນ້ຍ ກ່ຽວກັບບັນດາຂົງເຂດພວມເປັນທ່າແຮງ ຄືກໍ່ສ້າງພື້ນຖານໂຄງລ່າງຄົມມະນາຄົມ, ບຳບັດສິ່ງເສດເຫຼືອ, ພັດທະນາການທ່ອງທ່ຽວ… ແນໃສ່ເສີມຂະຫຍາຍບັນດາຄຸນຄ່າວັດທະນະທຳ ເພື່ອຮັບໃຊ້ການພັດທະນາການທ່ອງທ່ຽວກໍ່ຄືເພີ່ມທະວີການພົວພັນແລກປ່ຽນ, ຍົກສູງຄວາມເຂົ້າອົກເຂົ້າໃຈເຊິ່ງກັນ ແລະ ກັນ, ປຣາຮາ ກຽມພ້ອມຮ່ວມມືໃນວຽກງານອານຸລັກຮັກສາ, ບູລະນະປະຕິສັງຂອນປູຊະນີຍະສະຖານຢູ່ ຮ່າໂນ້ຍ. ນອກນັ້ນ, ປຣາຮາ ກໍ່ປາດຖະໜາຢາກແລກປ່ຽນກ່ຽວກັບໂຄງການກໍ່ສ້າງນະຄອນສະຫຼາດຕື່ມອີກເພື່ອໜູນຊ່ວຍຮ່າໂນ້ຍ ພັດທະນາຢ່າງມີປະສິດທິຜົນ.
ທ່ານຮອງປະທານຄະນະກຳມະການປະຊາຊົນ ນະຄອນ ຮ່າໂນ້ຍ ຫງວຽນຢ໋ວານຕ່ວານ ໄດ້ເຫັນດີເຫັນພ້ອມກັບຂໍ້ສັງເກດ ແລະ ຂໍ້ສະເໜີຂອງທ່ານຮອງລັດຖະມົນຕີ Lukas Kaucky, ພ້ອມທັງຢັ້ງຢືນວ່າ, ຍາມໃດ ນະຄອນ ຮ່າໂນ້ຍ ກໍ່ຊົມເຊີຍ, ພ້ອມແລ້ວທີ່ຈະສ້າງເງື່ອນໄຂໃຫ້ບັນດານັກລົງທຶນ, ວິສາຫະກິດຂອງ ສ. ເຊັກໂກ ໄດ້ຊອກຮູ້ ແລະ ລົງທຶນເຂົ້າຮ່າໂນ້ຍ.