ທ່ານ ດິງລາທັງ ພົບປະເຈລະຈາ ກັບ ທ່ານ Pa Socheatvong
(vovworld) – ໃນຕອນບ່າຍ ວັນທີ 1/6, ທ່ານ ດິງລາທັງ, ເລຂາຄະນະພັກນະຄອນໂຮ່ຈີມິນ ແລະ ຄະນະຜູ້ແທນນະຄອນໂຮ່ຈີມິນ ໄດ້ໄປນະຄອນຫຼວງພະນົມເປັນ, ເລີ່ມຕົ້ນການຢ້ຽມຢາມ, ເຮັດວຽກ ຢູ່ກຳປູເຈຍ ລະຫວ່າງ ວັນທີ 1 ແລະ 2/6. ເຂົ້າຢ້ຽມຄຳນັບ ທ່ານ Say Chum, ຫົວໜ້າຄະນະ ປະຈຳການຄະນະປະຈຳສູນກາງພັກປະຊາຊົນກຳປູເຈຍ, ປະທານສະພາສູງກຳປູເຈຍ, ທ່ານ ດິງລາທັງ, ເລຂາຄະນະພັກນະຄອນ ໃຫ້ຮູ້ວ່າ: ການຢ້ຽມຢາມ ແນໃສ່ຢັ້ງຢືນຄວາມມານະພະຍາຍາມ ແລະ ເຈດຕະນາດີ ຂອງນະຄອນໂຮ່ຈີມິນ ໃນການເພີ່ມທະວີ ແລະ ຮັດແໜ້ນການພົວພັນມິດຕະພາບ ແລະ ການຮ່ວມມືກັບບັນດາທ້ອງຖິ່ນ ຂອງກຳປູເຈຍກ່ວາອີກ. ທ່ານ ດິງລາທັງ, ເລຂາຄະນະພັກນະຄອນ ສະແດງຄວາມປາດຖະໜາ ປະທານສະພາສູງກຳປູເຈຍ ສ້າງເງື່ອນໄຂ ເພື່ອໃຫ້ບັນດາວິສາຫະກິດ ນະຄອນໂຮ່ຈີມິນ ເວົ້າສະເພາະ, ຫວຽດນາມເວົ້າລວມ ລົງທຶນ ຢູ່ກຳປູເຈຍ.
ແລະກໍ່ໃນວັນດຽວກັນ, ທີ່ການພົບປະເຈລະຈາ ກັບ ທ່ານ Pa Socheatvong, ເຈົ້າຄອງນະຄອນຫຼວງພະນົມເປັນ, ທ່ານ ດິງລາທັງ, ເລຂາຄະນະພັກນະຄອນ ໃຫ້ຮູ້ວ່າ: ນະຄອນໂຮ່ຈີມິນ ຈະເພີ່ມທະວີການແລກປ່ຽນຄະນະ, ຍູ້ແຮງການເຊື່ອມຕໍ່ຄົມມະນາຄົມ ກັບນະຄອນຫຼວງພະນົມເປັນ, ພ້ອມກັນນັ້ນ, ແມ່ນປັບປຸງລະບຽບການບໍລິຫານ ແລະ ລະດົມບັນດາວິສາຫະກິດ ເພີ່ມທະວີການລົງທຶນ ຢູ່ກຳປູເຈຍ ກໍ່ຄືຮຽກຮ້ອງບັນດາວິສາຫະກິດກຳປູເຈຍ ເຂົ້າມາລົງທຶນ, ທຳມາຫາກິນ ຢູ່ນະຄອນໂຮ່ຈີມິນ . ທ່ານ ດິງລາທັງ, ເລຂາຄະນະພັກນະຄອນໂຮ່ຈີມິນ ປາດຖະໜາວ່າ ອຳນາດການປົກຄອງນະຄອນຫຼວງພະນົມເປັນ ເວົ້າສະເພາະ ແລະ ກຳປູເຈຍເວົ້າລວມ ສືບຕໍ່ເອົາໃຈໃສ່ໜູນຊ່ວຍ ບັນດາວິສາຫະກິດຫວຽດນາມ ທີ່ລົງທຶນ ຢູ່ກຳປູເຈຍ; ສ້າງເງື່ອນໄຂໃຫ້ຊາວຫວຽດນາມ ທີ່ອາໄສ ແລະ ທຳມາຫາກິນມີສະຖຽນລະພາບ, ສະດວກ ຕາມກົດໝາຍຂອງກຳປູເຈຍ.