(vovworld) - ຕອນບ່າຍວັນທີ 13/03, ທ່ານປະທານສະພາແຫ່ງຊາດ ສ.ສະຫະພັນເຢຍລະມັນ Norbert Lammert ໄດ້ເປັນປະທານພິທີຕ້ອນຮັບທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ແລະ ຄະນະຜູ້ແທນຂັ້ນສູງສະພາແຫ່ງຊາດຫວຽດນາມ ມາຢ້ຽມຢາມ ສ.ສະຫະພັນເຢຍລະມັນ ຢ່າງເປັນທາງການ. ທີ່ການເຈລະຈາພາຍຫຼັງພິທີຕ້ອນຮັບ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ຊີ້ແຈ້ງວ່າ ຫວຽດນາມ ຖືເປັນສຳຄັນການເພີ່ມທະວີ ແລະ ບຸລິມະສິດໃຫ້ແກ່ການພັດທະນາການພົວພັນຮ່ວມມືກັບ ສ.ສະຫະພັນເຢຍລະມັນ ແລະ ສະເໜີໃຫ້ເພີ່ມມະວີການເຄື່ອນໄຫວແລກປ່ຽນຄະນະຜູ້ແທນທຸກຂັ້ນລະຫວ່າງ 2 ປະເທດ, 2 ສະພາແຫ່ງຊາດ ໃນນັ້ນມີບັນດາກຸ່ມສະມາຊິກລັດຖະສະພາມິດຕະພາບ; ສົມທົບກັນຢ່າງແໜ້ນແຟ້ນບົນເວທີຫຼາຍຝ່າຍ ແລະ ອົງການຈັດຕັ້ງສາກົນຕ່າງໆ, ໂດຍສະເພາະແມ່ນຢູ່ສະຫະປະຊາຊາດ, ອາແຊມ, ອາຊຽນ - EU ແລະ ບັນດາເວທີປາໄສລັດຖະສະພາເຊິ່ງສະພາແຫ່ງຊາດ 2 ປະເທດລ້ວມແຕ່ແມ່ນສະມາຊິກ. ສ່ວນທ່ານປະທານສະພາແຫ່ງຊາດ ສ.ສະຫະພັນເຢຍລະມັນ Nobert Lammert ຢືນຢັນວ່າ, ຍາມໃດສະພາແຫ່ງຊາດສ.ສະຫະພັນເຢຍລະມັນ ກໍສະໜັບສະໜູນ ແລະ ໃຫ້ບຸລິມະສິດແກ່ການພັດທະນາການພົວພັນກັບຫວຽດນາມ.
ແລະກໍໃນວັນດຽວກັນ, ທ່ານປະທານສະພາແຫ່ງຊາດຫງວຽນຊິງຮຸ່ງ ໄດ້ໄປຢ້ຽມຢາມພະນັກງານ, ພາລະກອນສະຖານທູດຫວຽດນາມ, ຜູ້ຕາງໜ້າວົງຄະນະຍາດຊາວຫວຽດນາມ ອາໄສຢູ່ເຢຍລະມັນ. ກ່າວຄຳເຫັນຢູ່ທີ່ນີ້, ທ່ານປະທານສະພາແຫ່ງຊາດຫງວຽນຊິງຮຸ່ງ ໄດ້ຮັບຮູ້ການປະກອບສ່ວນອັນລ້ຳຄ່າຂອງວົງຄະນະຍາດຊາວຫວຽດນາມ ອາໄສຢູ່ຕ່າງປະເທດທີ່ມີຕໍ່ປະເທດຊາດ ແລະ ໃຫ້ຮູ້ວ່າ ລັດຈະພິຈາລະນາປັບປຸງບັນດາຂໍ້ກຳນົດ ເພື່ອແນໃສ່ສ້າງເງື່ອນໄຂສະດວກກວ່າໃຫ້ວົງຄະນະຍາດຊາວຫວຽດນາມ ອາໄສຢູ່ຕ່າງປະເທດກັບເມືອລົງທຶນຢູ່ບ້ານເກີດເມືອງນອນ.