ເພີ່ມທະວີການຮ່ວມມືລະຫວ່າງສະພາແຫ່ງຊາດຫວຽດນາມແລະຮຸງກາຣີ
(ທ່ານປະທານສະພາແຫ່ງຊາດ ຫງວຽນຊິງຮຸ່ງ ຕອນຮັບ
ທ່ານປະທານສະພາແຫ່ງຊາດຮຸງກາຣີ Kover Laszlo)
(vovworld) – ໂດຍໄດ້ຮັບຄຳເຊີນຂອງທ່ານປະທານສະພາແຫ່ງຊາດ ຫງວຽນຊິງຮຸ່ງ, ທ່ານປະທານສະພາແຫ່ງຊາດຮຸງກາຣີ Kover Laszlo ເລີ່ມຕົ້ນການຢ້ຽມຢາມຫວຽດນາມ ຢ່າງເປັນທາງການ ໃນລະຫວ່າງວັນທີ 08 – 13/11. ຕອນເຊົ້າວັນທີ 09/11, ພາຍຫຼັງພິທີຕ້ອນຮັບຢ່າງເປັນທາງການ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ແລະ ທ່ານປະທານສະພາແຫ່ງຊາດຮຸງກາຣີ Kover Laszlo ໄດ້ດຳເນີນການເຈລະຈາ.
ທ່ານປະທານສະພາແຫ່ງຊາດ ຫງວຽນຊິງຮຸ່ງ ເຊື່ອໝັ້ນວ່າ, ການຢ້ຽມຢາມຈະສ້າງຂີດໝາຍໃໝ່ໃນການພົວພັນຮ່ວມມືລະຫວ່າງ 2 ອົງການນິຕິບັດຍັດ ແລະ ປະຊາຊົນ 2 ປະເທດ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ເນັ້ນໜັກວ່າ, ສະພາແຫ່ງຊາດຫວຽດນາມ ຍາມໃດກໍສະໜັບສະໜູນ, ສ້າງທຸກເງື່ອນໄຂສະດວກເພື່ອຍູ້ແຮງການພົວພັນຮ່ວມມືກັບບັນດາປະເທດເພື່ອນມິດ, ໃນນັ້ນມີຮຸງກາຣີ. ຍາມໃດຫວຽດນາມ ກໍຖືຮຸງກາຣີ ແມ່ນເພື່ອນມິດທິ່ໄວ້ເນື້ອເຊື່ອໃຈໃນສະຫະພາບເອີລົບ (EU). ຫວຽດນາມ ພ້ອມແລ້ວທີ່ຈະເປັນຂົວເຊື່ອມຕໍ່ຊຸກຍູ້ການການແລກປ່ຽນການຮ່ວມມືລະຫວ່າງຮຸງກາຣີ ແລະ ພາກພື້ນອາຊຽນ, ພ້ອມທັງປາດຖະໜາວ່າ ຮຸງກາຣີ ຈະແມ່ນຂົວເຊື່ອມຕໍ່ລະຫວ່າງຫວຽດນາມ ແລະ ສະຫະພາບເອີລົບ.
ສ່ວນທ່ານປະທານສະພາແຫ່ງຊາດຮຸງກາຣີ Kover Laszlo ໄດ້ຕີລາຄາສູງການຮັກສາການເຄື່ອນໄຫວແລກປ່ຽນຄະນະຜູ້ແທນເປັນປະຈຳລະຫວ່າງ 2 ປະເທດ, ພິເສດແມ່ນໝາກຜົນອັນດີງາມຈາກການປະຕິບັດຂໍ້ຕົກລົງຮ່ວມມືລະຫວ່າງສະພາແຫ່ງຊາດຫວຽດນາມ ແລະ ສະພາແຫ່ງຊາດຮຸງກາຣີ ທີ່ໄດ້ລົງນາມເມື່ອປີ 2009, ນຳການພົວພັນລະຫວ່າງ 2 ປະເທດ, 2 ສະພາແຫ່ງຊາດ ໃຫ້ຂຶ້ນສູ່ລະດັບສູງໃໝ່. ທ່ານປະທານສະພາແຫ່ຊາດຮຸງກາຣີ ໃຫ້ຮູ້ວ່າ, ຮຸງກາຣີ ປາດຖະໜາຢາກພ້ອມກັບຫວຽດນາມ ແບ່ງປັນບົດຮຽນໃນການສ້າງ ແລະ ປັບປຸງກົດໝາຍ, ປາດຖະໜາວ່າຢາກພັດທະນາການຮ່ວມມືກັບຫວຽດນາມ ໃນຂົງເຂດກະສິກຳ, ຄຸ້ມຄອງແຫຼ່ງນ້ຳ, ສົ່ງເສີມສຸຂະພາບປະຊາຊົນ ແລະ ພັດທະນາແບບຍືນຍົງ. 2 ຝ່າຍໄດ້ເປັນເອກະພາບນຳກັນຊຸກຍູ້ບັນດາການເຄື່ອນໄຫວພົບປະແລກປ່ຽນປະຊາຊົນ, ສົ່ງເສີມການຮ່ວມມືໃນຂົງເຂດວັດທະນະທຳ, ທ່ອງທ່ຽວ, ເພື່ອແນໃສ່ເພີ່ມທະວີຄວາມເຂົ້າໃຈຂອງປະຊາຊົນ 2 ປະເທດ, ເພື່ອຜົນປະໂຫຍດຂອງແຕ່ລະຝ່າຍ.
ແລະໃນຕອນຄໍ່າວັນດຽວກັນ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ໄດ້ເປັນປະທານຈັດງານລ້ຽງຕ້ອນຮັບທ່ານປະທານສະພາແຫ່ງຊາດຮຸງກາຣີ Kover Laszlo ແລະ ບັນດາສະມາຊິກໃນຄະນະຢ່າງສົມກຽດ.