(vovworld) - ໂດຍໄດ້ຮັບຄຳເຊີນຈາກອົງການກວດສອບບັນຊີແຫ່ງລັດ ສະຫະພັນລັດເຊຍ, ຄະນະຜູ້ແທນອົງການກວດສອບບັນຊີແຫ່ງລັດຫວຽດນາມ ໂດຍທ່ານຮອງຫົວໜ້າອົງການກວດສອບບັນຊີແຫ່ງລັດ Le Minh Khai ນຳໜ້າ, ໄດ້ໄປຢ້ຽມຢາມ ແລະ ເຮັດວຽກຢູ່ສະຫະພັນລັດເຊຍແຕ່ວັນທີ 5 – 11/9. ວັນທີ 10/9, ຢູ່ສຳນັກງານອົງການກວດສອບບັນຊີແຫ່ງລັດ ສະຫະພັນລັດເຊຍ ໄດ້ດຳເນີນການເຈລະຈາລະຫວ່າງທ່ານຮອງຫົວໜ້າອົງການກວດສອບບັນຊີແຫ່ງລັດຫວຽດນາມ Le Minh Khai ແລະ ທ່ານປະທານອົງການກວດສອບບັນຊີແຫ່ງລັດສະຫະພັນລັດເຊຍ Serget Stepashin. ນະທີ່ນີ້, ສອງຝ່າຍໄດ້ແລກປ່ຽນບັນດາບັນຫາກ່ຽວກັບດ້ານວິຊາການກວດສອບບັນຊີ ແລະ ເພີ່ມທະວີການພົວພັນລະຫວ່າງສອງອົງການໃນໄລຍະຈະມາເຖິງ; ປຶກສາຫາລື, ເປັນເອກະພາບນຳກັນ ແລະ ລົງນາມໃນຂໍ້ຕົກລົງລະຫວ່າງອົງການກວດສອບບັນຊີແຫ່ງລັດຫວຽດນາມ ກັບ ອົງການກວດສອບບັນຊີແຫ່ງລັດສະຫະພັນລັດເຊຍ ກ່ຽວກັບເລື່ອງກວດສອບບັນຊີສອງຝ່າຍທີ່ມີຕໍ່ໂຄງການລົງທຶນກໍ່ສ້າງໂຮງງານໄຟຟ້ານິວເຄຼຍ Ninh Thuan 1 ເພື່ອແນໃສ່ຕີລາຄາຢ່າງຮອບດ້ານບັນດາມາດຕະການຕ່າງໆທີ່ລັດຫວຽດນາມ ແລະ ສະຫະພັນລັດເຊຍ ນຳໃຊ້ ເພື່ອປະຕິບັດບັນດາຂໍ້ຕົກລົງລະຫວ່າງລັດຖະບານ ກ່ຽວກັບການສະໜອງເງິນ ແລະ ກໍ່ສ້າງໂຮງງານໄຟຟ້ານິວເຄຼຍ Ninh Thuan 1 ໃນເຂດດິນແດນຂອງຫວຽດນາມ; ຍົກອອກຂໍ້ສະເໜີຕໍ່ລັດຖະບານລະຫວ່າງສອງປະເທດເພື່ອແນໃສ່ຜັນຂະຫຍາຍປະຕິບັດໂຄງການຢ່າງຖືກຕ້ອງຕາມຄວາມຄຶບໜ້າ ແລະ ມີປະສິດທິຜົນ.
ວັນທີ 11/9, ຄະນະຜູ້ແທນອົງການກວດສອບບັນຊີແຫ່ງລັດຫວຽດນາມ ໄດ້ມີການເຮັດວຽກກັບການນຳ Duma ແຫ່ງຊາດ, ລາຍງານໝາກຜົນແຫ່ງການຮ່ວມມືລະຫວ່າງອົງການກວດສອບບັນຊີແຫ່ງລັດຫວຽດນາມ ແລະ ອົງການກວດສອບບັນຊີແຫ່ງລັດສະຫະພັນລັດເຊຍ ໃນຊຸມປີມໍ່ໆມານີ້ ແລະ ສະເໜີຍູ້ແຮງບັນດາການເຄື່ອນໄຫວຮ່ວມມືລະຫວ່າງສອງອົງການໃນໄລຍະຈະມາເຖິງ.