ເລຂາຄະນະພັກນະຄອນ ດ່ານັ້ງ ແລະ ເອກອັກຄະລັດຖະທູດ ອີຕາລີ ປະຈຳ ຫວຽດນາມ (ເບື້ອງຊ້າຍ)
(ພາບ: Đoàn Lương)
|
(vovworld) – ການຮ່ວມມືເສດຖະກິດລະຫວ່າງ ດ່ານັ້ງ ແລະ ອີຕາລີ ແມ່ນຫົວຂໍ້ຂອງການໂອ້ລົມສົນທະນາໂດຍຄະນະກຳມະການປະຊາຊົນນະຄອນ ດ່ານັ້ງ ສົມທົບກັບກົມພົວພັນຕ່າງປະເທດ ຂຶ້ນກັບກະຊວງການຕ່າງປະເທດ ຈັດຕັ້ງໃນວັນທີ 3/3 ຢູ່ ດ່ານັ້ງ. ທີ່ການໂອ້ລົມສົນທະນາ, ທ່ານຮອງປະທານຄະນະກຳມະການປະຊາຊົນນະຄອນ ດ່ານັ້ງ ຟູ່ງເຕີ໋ນວຽດ, ໃຫ້ຮູ້ວ່າ: ນະຄອນ ດ່ານັ້ງ ຍາມໃດກໍເອົາໃຈໃສ່ດຶງດູດການລົງທຶນ, ສົ່ງເສີມດ້ານການຄ້າ, ປັບປຸງສະພາບແວດລ້ອມແຫ່ງການລົງທຶນ, ດຳເນີນທຸລະກິດ ແລະ ວາງແຜນຜັງບັນດານະໂຍບາຍເໝາະສົມເພື່ອແນໃສ່ສ້າງເງື່ອນໄຂໃຫ້ບັນດາວິສາຫະກິດ, ພິເສດແມ່ນບັນດາວິສາຫະກິດຕ່າງປະເທດມາລົງທຶນຢູ່ ດ່ານັ້ງ. ການໂອ້ລົມສົນທະນາແມ່ນໂອກາດເພື່ອໃຫ້ຜູ້ຕາງໜ້າບັນດາຫົວໜ່ວຍ, ວິສາຫະກິດຂອງ ອີຕາລີ ສຳພັດກັບຂໍ້ມູນຂ່າວກ່ຽວກັບສະພາບແວດລ້ອມແຫ່ງການລົງທຶນຢູ່ ດ່ານັ້ງ.
ທີ່ການໂອ້ລົມສົນທະນາ, ຜູ້ຕາງໜ້າຫ້ອງການການຄ້າ ອີຕາລີ ປະຈຳ ຫວຽດນາມ ຕີລາຄາສູງຄວາມສາມາດບົ່ມຊ້ອນ, ທ່າແຮງຂອງ ດ່ານັ້ງ, ເຊິ່ງແມ່ນນະຄອນທີ່ມີທະເລ ແລະ ເປັນກຳລັງໜູນຂອງພາກກາງ ກໍ່ຄືຄວາມມານະພະຍາຍາມ ແລະ ສ້າງເງື່ອນໄຂສະດວກໃຫ້ແກ່ບັນດາວິສາຫະກິດຕ່າງປະເທດເມື່ອມາລົງທຶນຢູ່ ດ່ານັ້ງ. ບັນດາຜູ້ແທນຝ່າຍ ອີຕາລີ ຫວັງວ່າ ຜ່ານການໂອ້ລົມສົນທະນານີ້ຈະເປີດຫຼາຍແງ່ຫວັງໃນການຮ່ວມມືເສດຖະກິດລະຫວ່າງ ດ່ານັ້ງ ແລະ ບັນດາວິສາຫະກິດ ອີຕາລີ.