ເພີ່ມທະວີການແລກປ່ຽນຄະນະຜູ້ແທນ ລະຫວ່າງການນຳຂັ້ນສູງ ຫວຽດນາມ ແລະ ອີຕາລີ
(VOVWORLD) - ວັນທີ 26 ພຶດສະພາ, ທ່ານຮອງລັດຖະມົນຕີກະຊວງການຕ່າງປະເທດ ຫວຽດນາມ ໂຕແອັງຢຸງ ພ້ອມດ້ວຍທ່ານລັດຖະມົນຕີ ການຕ່າງປະເທດ ແລະ ຮ່ວມມືສາກົນ ອີຕາລີ Manlio Di Stefano ໄດ້ເປັນປະທານຮ່ວມການປຶກສາຫາລືທາງດ້ານການເມືອງຂັ້ນຮອງລັດຖະມົນຕີການຕ່າງປະເທດ ຫວຽດນາມ - ອີຕາລີ ຄັ້ງທີ 3 ເຊິ່ງຖືກຈັດຂຶ້ນຕາມຮູບການທາງອອນລາຍ.
|
ສອງຝ່າຍລົງນາມໃນແຜນການເຄື່ອນໄຫວ ຜັນຂະຫຍາຍສາຍພົວພັນຄູ່ຮ່ວມມືຍຸດທະສາດ ຫວຽດນາມ - ອີຕາລີ ໄລຍະ 2021 – 2022, ວິໄສທັດຮອດປີ 2023 (ພາບ: TTXVN)
|
ເມື່ອແລກປ່ຽນກ່ຽວກັບສະພາບການໂລກລະບາດໃນປັດຈຸບັນ, ສອງຝ່າຍຖືວ່າ ການສັກວັກຊິນ ແມ່ນປັດໄຈສຳຄັນໃນການເປີດປະຕູບັນດາພື້ນຖານເສດຖະກິດໂດຍໄວ; ພ້ອມທັງຢັ້ງຢືນຄຳໝັ້ນສັນຍາຈະສືບຕໍ່ສົມທົບກັນແບ່ງປັນປະສົບການໃນການປ້ອງກັນ, ຕ້ານໂລກລະບາດ, ສຳຜັດກັບແຫຼ່ງວັກຊິນທີ່ປອດໄພ, ມີປະສິດທິຜົນ ກໍຄືການຖ່າຍທອດເຕັກໂນໂລຢີຜະລິດວັກຊິນ; ພ້ອມທັງສົມທົບກັນ, ຊ່ວຍເຫຼືອເຊິ່ງກັນແລະກັນໃນການຜັນຂະຫຍາຍບັນດາມາດຕະການພັດທະນາເສດຖະກິດຫຼັງໄລຍະ ໂຄວິດ - 19 ຢ່າງມີປະສິດທິຜົນ.
ສອງຝ່າຍເຫັນດີເພີ່ມທະວີການພົບປະແລກປ່ຽນຄະນະການນຳຂັ້ນສູງລະຫວ່າງສອງປະເທດ, ສືບຕໍ່ຜັນຂະຫຍາຍບັນດາກົນໄກ ເຊິ່ງສອງຝ່າຍໄດ້ສ້າງຂຶ້ນໃນຊຸມປີຜ່ານມາໃຫ້ມີປະສິດທິຜົນ, ສົມທົບກັນສ້າງໂຄງການເຄື່ອນໄຫວ ມຸ່ງໄປເຖິງການສະເຫຼີມສະຫຼອງວັນສ້າງຕັ້ງສາຍພົວພັນທາງການທູດຄົບຮອບ 50 ປີ ແລະ ການພົວພັນຄູ່ຮ່ວມມືຍຸດທະສາດ ຫວຽດນາມ - ອີຕາລີ ຄົບຮອບ 10 ປີ ໃນປີ 2023. ສິ້ນສຸດການປຶກສາຫາລືທາງດ້ານການເມືອງ, ສອງຝ່າຍໄດ້ລົງນາມໃນແຜນການເຄື່ອນໄຫວ ຜັນຂະຫຍາຍສາຍພົວພັນຄູ່ຮ່ວມມືຍຸດທະສາດ ຫວຽດນາມ - ອີຕາລີ ໄລຍະ 2021 – 2022, ວິໄສທັດຮອດປີ 2023.