(vovworld) – ວັນທີ 24/6, ຢູ່ ຮ່າໂນ້ຍ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູ໋ຈ້ອງ ມີການເຮັດວຽກກັບຄະນະປະຈຳສະພາທິດສະດີສູນກາງ, ກວດກາ, ຊຸກຍູ້ສະພາບການປະຕິບັດໜ້າທີ່ຂອງສະພາໃນ 6 ເດືອນຕົ້ນປີ ແລະ ບັນດາໜ້າທີ່ຈຸດສຸມຄວນປະຕິບັດໃນໄລຍະຈະມາເຖິງ.
ທ່ານເລຂາທິການໃຫຍ່ ຫງວຽນຟູ໋ຈ້ອງ ຊີ້ແຈ້ງໜ້າທີ່ຈຸດສຸມ, ໜ້າທີ່ຫຼັກແຫຼ່ງຂອງສະພາທິດສະດີສູນກາງໃນໄລຍະຈະມາເຖິງແມ່ນສຸມໃສ່ປະຕິບັດບາງໜ້າທີ່ຕົ້ນຕໍ່, ບຸລິມະສິດໃຫ້ແກ່ວຽກງານຄົ້ນຄ້ວາ, ໃຫ້ຄຳປຶກສາກ່ຽວກັບບາງທິດສະດີພື້ນຖານ, ເພື່ອເປັນພື້ນຖານໃຫ້ແກ່ເລື່ອງວາງທິດທາງແຜນນະໂຍບາຍຂອງພັກ, ໃນນັ້ນສຸມໃສ່ເຂົ້າໃນເລື່ອງສະຫລຸບ 30 ປີແຫ່ງການປ່ຽນໃໝ່, ກະກຽມເອກະສານກອງປະຊຸມໃຫຍ່ຄັ້ງທີ 12, ສະຫລຸບເຄິ່ງອາຍຸການຊຸດທີ 11 ແລະ ປຶກສາຫາລືໂຄງການໄລຍະກາງ ກ່ຽວກັບການພັດທະນາເສດຖະກິດສັງຄົມ ຈົນໝົດອາຍຸການ, ສະຫລຸບວຽກງານທິດສະດີ, ກ້າວເຂົ້າສູ່ບັນດາບັນຫາຕົວຈິງທີ່ຫາກໍ່ວາງອອກໃນພາລະກິດສ້າງສາ, ພັດທະນາປະເທດຊາດ, ປ່ຽນໃໝ່ ແລະ ເຊື່ອມໂຍງເຂົ້າກັບສາກົນ.
“ນີ້ແມ່ນໜ້າທີ່ຫຼັກແຫຼ່ງ, ໜ້າທີ່ຈຸດສຸມ ເຊິ່ງພວກເຮົາຕ້ອງເຮັດ. ກອງປະຊຸມສູນກາງຄັ້ງທີ 8 ຈະຮັບຈັດຕັ້ງໃນເດືອນ 10 ຈະມາເຖິງຈະສ້າງຕັ້ງອະນຸກຳມະການເອກະສານ. ກອງປະຊຸມສູນກາງຄັ້ງທີ 8 ມີບົດລາຍງານສຳຫລຸບທົບທວນຄືນບັນຫາເສດຖະກິດ - ສັງຄົມຂອງເຄິ່ງອາຍຸການ ແລະ ປຶກສາຫາລືໄລຍະກາງຈົນໝົດອາຍຸການເພື່ອຮັບປະກັນພັດທະນາເສດຖະກິດ - ສັງຄົມ”
ຕາມທ່ານເລຂາທິການໃຫຍ່ ຫງວຽນຟູ໋ຈ້ອງ ແລ້ວ, ວຽກງານໃຫ້ຄຳປຶກສາຄວນສຸມໃສ່ສະໜອງທິດສະດີ, ພື້ນຖານດ້ານວິທະຍາສາດ, ບົນພື້ນຖານຂອງລັດທິ ມາກ - ເລນິນ ແລະ ແນວຄິດປະທານ ໂຮ່ຈີມິນ. ໄປຄຽງຄູ່ກັນນັ້ນ, ຄວນສຸມໃສ່ເຖິງການ, ແລກປ່ຽນບັນດາບັນຫາທີ່ຍັງມີຄວາມເຫັນແຕກຕ່າງກັນ, ຄັດຄ້ານບັນດາທັດສະນະທີ່ຜິດພາດໃຫ້ດີກ່ວາອີກ.