(vovworld) – ຕອນບ່າຍວັນທີ 27/5, ຢູ່ ຮ່າໂນ້ຍ, ທ່ານເລຂາທິການໃຫຍ່ ຫງວຽນຟຸຈ້ອງ ໄດ້ໃຫ້ການຕ້ອນຮັບຄະນະສະມາຊິກສະພາສູງ ອາເມລິກາ ໂດຍທ່ານ ສະມາຊິກສະພາສູງ ອາເມລິກາ Jonh McCain ນຳໜ້າ ພວມຢູ່ຢ້ຽມຢາມ ຫວຽດນາມ . ທ່ານເລຂາທິການໃຫຍ່ ຫງວຽນຟຸຈ້ອງ ສະແດງຄວາມເພິ່ງພໍໃຈຕໍ່ບັນດາບາດກ້າວພັດທະນາຢ່າງຕັ້ງໜ້າໃນການພົວພັນຮ່ວມມືຫຼາຍດ້ານ ລະຫວ່າງ 2 ປະເທດຕາມຂອບເຂດຄູ່ຮ່ວມມືຮອບດ້ານ ເຊິ່ງໄດ້ຮັບການສ້າງຕັ້ງ; ທ່ານກໍຢືນຢັນນະໂຍບາຍສະເໝີຕົ້ນສະເໝີປາຍຂອງພັກ ແລະ ລັດ ຫວຽດນາມແມ່ນ ຍາມໃດ ຫວຽດນາມ ກໍຖືເປັນສຳຄັນການຊຸກຍູ້ສາຍພົວພັນ ຫວຽດນາມ-ອາເມລິກາ ເພື່ອຜົນປະໂຫຍດອັນຍາວນານຂອງປະຊາຊົນ 2 ປະເທດ. ທ່ານເລຂາທິການໃຫຍ່ ຫງວຽນຟຸຈ້ອງ ຮັບຮູ້ການຮ່ວມມືຂອງຝ່າຍ ອາເມລິກາ ໃນການເຂົ້າຮ່ວມແກ້ໄຂຜົນຮ້າຍຢ້ອນຫຼັງຈາກສົງຄາມ. ກ່ຽວກັບສະພາບການທະເລຕາເວັນອອກ, ທ່ານເລຂາທິຫານໃຫຍ່ ຫງວຽນຟຸຈ້ອງ ຢືນຢັນວ່າ: ຫຼັກໝັ້ນຂອງ ຫວຽດນາມ ແມ່ນປົກປັກຮັກສາອະທິປະໄຕ, ຜືນແຜ່ນດິນອັນຄົບຖ້ວນຂອງປະເທດຊາດ, ແກ້ໄຂບັນດາຄວາມຂັດແຍ້ງກັນດ້ວຍ ສັນຕິວິທີ, ເໝາະສົມກັບກົດບັດສະຫະປະຊາຊາດ, ກົດໝາຍສາກົນ, ໃນນັ້ນມີສົນທິສັນຍາກ່ຽວກັບກົດໝາຍວ່າດ້ວຍທະເລປີ 1982; ຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC), ມຸ່ງໄປເຖິງປະມວນຂໍ້ກຳນົດກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (COC); ຄັດຄ້ານທຸກການກະທຳລະເມີດກົດໝາຍສາກົນ, ນາບຂູ່ເຖິງສັນຕິພາບ ແລະ ສະຖຽນລະພາບໃນພາກພື້ນ.
ທ່ານສະມາຊິກສະພາສູງ Jonh McCain ເນັ້ນໜັກວ່າ: ບັນດາບາດກ້າວພັດທະນາໃນການພົວພັນ ລະຫວ່າງ 2 ປະເທດ, ພິເສດແມ່ນໃນ 2 ປີ ແຫ່ງການຜັນຂະຫຍາຍສາຍພົວພັນຄູ່ຮ່ວມມືຮອບດ້ານ ແລະ ຢືນຢັນຄືນໃໝ່ວ່າ: ຍາມໃດ ອາເມລິກາ ກໍຖືເປັນສຳຄັນ ແລະ ປາດຖະໜາຢາກເພີ່ມທະວີການພົວພັນຮ່ວມມືຫຼາຍດ້ານກັບ ຫວຽດນາມ ກ່ວາອີກ. ທ່ານ ສະມາຊິກສະພາສູງ Jonh McCain ແລະ ຄະນະສະມາຊິກສະພາສູງ ອາເມລິກາ ຫວັງວ່າ ຈະຕ້ອນຮັບທ່ານ ເລຂາທິການໃຫຍ່ ຫງວຽນຟຸຈ້ອງ ມາຢ້ຽມຢາມ ອາເມລິກາ ຢ່າງເປັນທາງການ ແລະ ຖືວ່າ ນີ້ແມ່ນການຢ້ຽມຢາມທີ່ມີຄວາມໝາຍປະຫວັດສາດໃນການພົວພັນລະຫວ່າງ 2 ປະເທດ ແລະ ໃຫ້ຄຳໝັ້ນສັນຍາຈະມານະພະຍາຍາມເພື່ອໃຫ້ການຢ້ຽມຢາມບັນລຸໄດ້ໝາກຜົນສູງສຸດ.