ເລຂາທິການໃຫຍ່ຫງວຽນຟຸ໋ຈ້ອງຕ້ອນຮັບລັດຖະມົນຕີກະຊວງປ້ອງກັນປະເທດຈີນ
ທ່ານເລຂາທິການໃຫຍ່ ຫງວຽນຟຸ໋ຈ້ອງ ຕ້ອນຮັບທ່ານ ຈ໋າງຢ໋ວານແຈ໋ວນ
(ພາບ: Mod.gov.vn)
(vovworld) - ຕອນບ່າຍວັນທີ 27/03, ຢູ່ສຳນັກງານສູນກາງພັກ, ທ່ານເລຂາທິການໃຫຍ່ ຫງວຽນຟຸ໋ຈ້ອງ ໄດ້ໃຫ້ການຕ້ອນຮັບທ່ານ ຈ໋າງຢ໋ວານແຈ໋ວນ, ກຳມະການລັດຖະບານ, ລັດຖະມົນຕີ, ຫົວໜ້າຄະນະຜູ້ແທນຂັ້ນສູງກະຊວງປ້ອງກັນປະເທດ ຈີນ. ທ່ານເລຂາທິການໃຫຍ່ ຫງວຽນຟຸ໋ຈ້ອງ ຊົມເຊີຍການຢ້ຽມຢາມຂອງຄະນະ, ຕີລາຄາສູງໝາກຜົນການເຈລະຈາລະຫວ່າງ 2 ກະຊວງປ້ອງກັນປະເທດ, ຖືນັ້ນແມ່ນມາດຕະການຕັ້ງໜ້າ ປະກອບສ່ວນຫັນການຮັບຮູ້ລວມທີ່ບັນລຸໄດ້ລະຫວ່າງການນຳຂັ້ນສູງ 2 ພັກ, 2 ລັດເປັນລະອຽດ. ທ່ານເລຂາທິການໃຫຍ່ ຫງວຽນຟຸ໋ຈ້ອງ ກໍ່ຕີລາຄາສູງບັນດາການເຄື່ອນໄຫວຮ່ວມມື, ພົບປະແລກປ່ຽນລະຫວ່າງກອງທັບ 2 ປະເທດໃນໄລຍະຜ່ານມາ, ສະເໜີ 2 ຝ່າຍສືບຕໍ່ຮັກສາບັນດາການພົບປະແລກປ່ຽນຂັ້ນສູງໃຫ້ດີ, ຜັນຂະຫຍາຍບັນດາກົນໄກຮ່ວມມືດ້ານປ້ອງກັນຊາດຢ່າງມີປະສິດທິຜົນ ຄືການເຈລະຈານະໂຍບາຍດ້ານປ້ອງກັນຊາດ, ການລາດຕະເວນລວມໃນອ່າວພາກເໜືອ, ການລາດຕະເວນລວມຕາມເສັ້ນຊາຍແດນ ທາງບົກ, ການພົບປະແລກປ່ຽນປ້ອງກັນຊາດ, ປະກອບສ່ວນປັບປຸງສາຍພົວພັນສັນຕິພາບ, ສະຖຽນລະພາບ, ມິດຕະພາບ ແລະ ການຮ່ວມມືລະຫວ່າງ 2 ປະເທດ ຫວຽດນາມ - ຈີນ ຢ່າງບໍ່ຢຸດຢັ້ງ. ທ່ານເລຂາທິການໃຫຍ່ຢືນຢັນວ່າ: ຍາມໃດ ຫວຽດນາມ ກໍ່ຖືເປັນສຳຄັນການພັດທະນາສາຍພົວພັນຖານບ້ານໃກ້ເຮືອນຄຽງມິດຕະພາບທີ່ເປັນມູນເຊື້ອ, ຄູ່ຮ່ວມມືຍຸດທະສາດຮອບດ້ານກັບ ຈີນ; ສະເໜີ 2 ຝ່າຍຄວນສຸມໃສ່ສົມທົບກັນປະຕິບັດຄວາມຮັບຮູ້ລວມ ແລະ ຂໍ້ຕົກລົງຂອງການນຳຂັ້ນສູງ 2 ພັກ, 2 ລັດເປັນຢ່າງດີ ດ້ວຍບັນດາການກະທຳແທດຈິງ, ລະອຽດ, ເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ, ຍູ້ແຮງ ແລະ ຍົກສູງປະສິດທິຜົນການຮ່ວມມືໃນທຸກຂົງເຂດ, ປົກປັກຮັກສາສັນຕິພາບ, ສະຖຽນລະພາບບົນທະເລຕາເວັນອອກ ຕາມຈິດໃຈເຄົາລົບຜົນປະໂຫຍດຂອງກັນ ແລະ ເຄົາລົບກົດໝາຍສາກົນ.