(ທ່ານເລຂາທິການໃຫຍ່ ຫງວຽນຟູຈ້ອງ
ກ່າວຄຳເຫັນທີ່ການພົບປະຜູ້ມີສິດເລືອກຕັ້ງ)
(vovworld) – ໂດຍປະຕິບັດລາຍການພົບປະກັບຜູ້ມີສິດເລືອກຕັ້ງ ພາຍຫລັງກອງປະຊຸມສະໄໝສາມັນເທື່ອທີ 10 ສະພາແຫ່ງຊາດຊຸດທີ 13, ຕອນເຊົ້າວັນທີ 08/12, ທ່ານ ຫງວຽນຟູຈ້ອງ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ພ້ອມບັນດາສະມາຊິກສະພາແຫ່ງຊາດນະຄອນ ຮ່າໂນ້ຍ ພົບປະກັບຜູ້ມີສິດເລືອກຕັ້ງເມືອງ ຮ່ວານກ໋ຽມ ແລະ ບາດິ່ງ, ເພື່ອແຈ້ງໝາກຜົນຂອງກອງປະຊຸມສະໄໝສາມັນ ແລະ ຮັບຟັງແນວຄິດຈິດໃຈຄວາມມຸ່ງມາດປາດຖະໜາ, ຂໍ້ສະເໜີຂອງຜູ້ມີສິດເລືອກຕັ້ງທີ່ສົ່ງຕໍ່ເຖິງສະພາແຫ່ງຊາດ. ຜູ້ມີສິດເລືອກຕັ້ງເມືອງ ຮ່ວານກ໋ຽມ ແລະ ບາດິ່ງ ຈຳນວນຫລວງຫລາຍຢືນຢັນວ່າ: ກອງປະຊຸມສະໄໝສາມັນເທື່ອທີ 10 ສະພາແຫ່ງຊາດຊຸດທີ 13 ມີການປ່ຽນໃໝ່ ແລະ ປະຊາທິປະໄຕຫລາຍຢ່າງ, ພິເສດແມ່ນໃນບັນດາວາລະປຶກສາຫາລື, ການຊັກຖາມ ແລະ ຕອບຄຳຊັກຖາມຂອງບັນດາສະມາຊິກລັດຖະບານ.ຜູ້ມີສິດເລືອກຕັ້ງ ຟູ່ງຢຸຍເມີ້ນ ປະກອບຄຳເຫັນວ່າ:
“ຜູ້ມີສິດເລືອກຕັ້ງພວກຂ້າພະເຈົ້າຕີລາຄາສູງການເຄື່ອນໄຫວຂອງສະພາແຫ່ງຊາດ, ພິເສດແມ່ນວຽກງານນິຕິບັນຍັດ,ອຳນາດບໍລິຫານ ແລະ ຕັດສິນບັນດາບັນຫາໃຫຍ່ຂອງປະເທດຊາດ. ກ່ຽວກັບດ້ານເສດຖະກິດ, ເຖິງວ່າ ໂລກຍັງມີຄວາມຫຍຸ້ງຍາກຫລາຍຢ່າງ, ຖືກຊຸດໂຊມ, ພິເສດແມ່ນໃນຊຸມປີມໍ່ໆມານີ້ ແຕ່ວ່າສະພາແຫ່ງຊາດ ໄດ້ວາງອອກຫລາຍມາດຕະການປະຢັດ, ຫລຸດຜ່ອນວຽກງານທີ່ຍັງບໍ່ທັນຈຳເປັນ ເພື່ອເພີ່ມເງິນເດືອນໃຫ້ພະນັກງານ, ພາລະກອນ”
ຕາງໜ້າໃຫ້ຄະນະສະມາຊິກສະພາແຫ່ງຊາດນະຄອນ ຮ່າໂນ້ຍ, ທ່ານ ເລຂາທິການໃຫຍ່ ຫງວຽນຟູຈ້ອງ ຮັບຮອງບັນດາຄຳເຫັນຢ່າງສຸດຈິດສຸດໃຈ ແລະ ທີ່ຖືກຕ້ອງຂອງຜູ້ມີສິດເລືອກຕັ້ງໃນການປະກອບສ່ວນ, ເຕື້ອງເຖິງຫລາຍບັນຫາໃຫຍ່ຂອງປະເທດຊາດ ແລະ ບັນດາບັນຫາແທດຈິງສຳລັບຊີວິດປະຈຳວັນຂອງປະຊາຊົນ.