(vovworld) – ຕອນບ່າຍວັນທີ 19/11, ທ່ານເລຂາທິການໃຫຍ່ຄະນະບໍລິຫານງນສູນກາງພັກກອມມູນິດຫວຽດນາມ ຫງວຽນຟູ໋ຈ້ອງ ແລະ ຄະນະຜູ້ແທນຂັ້ນສູງຫວຽດນາມ ໄດ້ໄປຮອດສະໜາມບິນການທະຫານ Palam ຢູ່ນະຄອນຫຼວງ New Delhi, ເລີ່ມຕົ້ນການຢ້ຽມຢາມທາງລັດຖະກິດ ສ ອິນເດຍ, ຕາມຄຳເຊື້ອເຊີນຂອງທ່ານນາຍົກລັດຖະມົນຕີ ອິນເດຍ Manmohan Singh. ຕ້ອນຮັບທ່ານເລຂາທິການໃຫຍ່ ຫງວຽນຟູ໋ຈ້ອງ ແລະ ຄະນະຢູ່ສະໜາມບິນມີບັນດາສະມາຊິກລັດຖະບານ ອິນເດຍ, ເອກອັກຄະລັດຖະທູດ ຫວຽດນາມ ປະຈຳ ອິນເດຍ ພ້ອມກັບບັນດາລັດຖະກອນສະຖານທູດ ແລະ ພໍ່ແມ່ນປະຊາຊົນ, ນັກສຶກສາ ຫວຽດນາມ ຢູ່ ອິນເດຍ.
ແລະກໍ່ໃນຕອນຄຳ່ວັນດຽວກັນ, ທ່ານເລຂາທິການໃຫຍ່ ຫງວຽນຟູ໋ຈ້ອງ ໄດ້ໄປຢ້ຽມຢາມສະຖານທູດ ແລະ ໂອ້ລົມກັບພະນັກງານ, ນັກຮຽນ, ນັກສຶກສາ ແລະ ພໍ່ແມ່ປະຊາຊົນຫວຽດນາມ ຢູ່ ອິນເດຍ. ທ່ານເລຂາທິການໃຫຍ່ ຫງວຽນຟູ໋ຈ້ອງ ໄດ້ຍ້ອງຍໍຊົມເຊີຍບັນດາການປະກອບສ່ວນຢ່າງຕັ້ງໜ້າຂອງພະນັກງານ, ລັດຖະກອນສະຖານທູດ ຫວຽດນາມ ປະຈຳ ອິນເດຍ, ຂອງພໍ່ແມ່ ປຊຊ ແລະ ບັນດານັກຮຽນ, ນັກສຶກສາ ຫວຽດນາມ ເຂົ້າໃນການພັດທະນາການພົວພັນ 2 ປະເທດ ຫວຽດນາມ - ອິນເດຍ ໃນຊຸມປີຜ່ານມາ. ທ່ານເລຂາທິການໃຫຍ່ ຫງວຽນຟູ໋ຈ້ອງ ຢັ້ງຢືນວ່າ: ຫວຽດນາມ ຖືເປັນສຳຄັນການພັດທະນາການພົວພັນມິດຕະພາບ ແລະ ການຮ່ວມມືຫຼາຍດ້ານກັບ ອິນເດຍ. ທ່ານ ເວົ້າວ່າ:
“ຂ້າພະເຈົ້າຫວັງວ່າ, ໃນໄລຍະມໍ່ນີ້, ພວກເຮົາຈະສືບຕໍ່ສາມັກຄີ, ສູ້ຊົນ, ໜູນຊ່ວຍເຊິ່ງກັນ ແລະ ກັນເພື່ອປະຕິບັດບັນດາໜ້າທີ່ໃນຖານະວຽກງານຂອງຕົນໃຫ້ດີກ່ວາອີກ. ສຳລັບພໍ່ແມ່ ປຊຊ ຫວຽດນາມ ອາໄສຢູ່ຕ່າງປະເທດ, ນອກຈາກການທຳມາຫາກິນ, ດຳລົງຊີວິດ, ປະຕິບັດກົດໝາຍຂອງປະເທດເພື່ອນມິດ ຍາມໃດກໍ່ອວຍໜ້າເມືອຫາບ້ານເກີດເມືອງນອນ. ນັກຮຽນ, ນັກສຶກສາ ໄປຮຽນຢູ່ ອິນເດຍ ກໍ່ເພື່ອປະກອບສ່ວນສ້າງສາປະເທດຊາດ. ນີ້ແມ່ນຂົວເຊື່ອມຕໍ່ສຳຄັນທີ່ສຸດ, ເປັນທູດ ປຊຊ ໃນການພົວພັນ ຫວຽດນາມ - ອິນເດຍ. ພວກເຮົາໄດ້ສ້າງການພົວພັນຄູ່ຮ່ວມມືຍຸດທະສາດກັບ ອິນເດຍ ແລ້ວ, ການຢ້ຽມຢາມຄັ້ງນີ້ແມ່ນເພື່ອຍົກສູງ, ເຮັດໃຫ້ການພົວພັນນີ້ເລິກເຊິ່ງ ກ້າວຂຶ້ນສູ່ລະດັບສູງໃໝ່, ແທດຈິງກ່ວາ, ມີປະສິດທິຜົນກ່ວາ. ຝ່າຍອິນເດຍຖືເປັນສຳຄັນການຢ້ຽມຢາມນີ້.”
ເນື່ອງໃນການຢ້ຽມຢາມທາງລັດຖະກິດ ອິນເດຍຂອງທ່ານເລຂາທິການໃຫຍ່ ຫງວຽນຟູ໋ຈ້ອງ, ວາລະສານ NAM TODAY ຂອງອິນເດຍໄດ້ພິມຈຳໜ່າຍສະບັບພິເສດ. ດ້ວຍຫົວຂໍ້ວ່າ: “ສະເຫຼີມສະຫຼອງ 6 ປີແຫ່ງວັນສ້າງຕັ້ງການພົວພັນຄູ່ຮ່ວມມືຍຸດທະສາດ ອິນເດຍ - ຫວຽດນາມ ແລະ ເພີ່ມທະວີການພົວພັນ ຫວຽດນາມ - ອິນເດຍ” ແລະ ສະແດງຄວາມເຊື່ອໝັ້ນວ່າ: ການຢ້ຽມຢາມ ອິນເດຍ ຂອງທ່ານເລຂາທິການໃຫຍ່ ຫງວຽນຟູ໋ຈ້ອງ ຈະເປີດໜ້າໃໝ່ໃນປະຫວັດສາດແຫ່ງການພົວພັນລະຫວ່າງ ອິນເດຍ ແລະ ຫວຽດນາມ. ນອກນັ້ນ, ວາລະສານຍັງລົງພິມບັນດາບົດຂຽນກ່ຽວກັບການພົວພັນ ອິນເດຍ - ຫວຽດນາມ, ພ້ອມກັບບັນດາຮູບພາບກ່ຽວກັບປະເທດຊາດ ແລະ ຊາວ ຫວຽດນາມ.