(vovworld) - ຕອນເຊົ້າວັນທີ 28/12, ຢູ່ ຮ່າໂນ້ຍ, ຄະນະພັກທະຫານສູນກາງ, ກະຊວງປ້ອງກັນປະເທດໄດ້ຈັດກອງປະຊຸມສະຫລຸບວຽກງານການທະຫານ, ປ້ອງກັນປະເທດປີ 2013. ກ່າວຄຳເຫັນທີ່ກອງປະຊຸມ, ທ່ານເລຂາທິການໃຫຍ່ຄະນະບໍລິຫານງານສູນກາງພັກ ກອມມູນິດ ຫວຽດນາມ ຫງວຽນຟູ໋ຈ້ອງ, ເລຂາຄະນະພັກທະຫານສູນກາງ ໄດ້ຊີ້ແຈ້ງໜ້າທີ່ວາງອອກຕໍ່ທົ່ວພັກ, ທົ່ວກອງທັບ, ທົ່ວປວງຊົນ ແລະ ທົ່ວລະບົບການເມືອງໃນປີ 2014 ແມ່ນເພີ່ມທະວີຄວາມສາມັກຄີ, ຄວາມເຫັນດີເຫັນພ້ອມ, ປະຕິບັດ 3 ຈຸດໝາຍຄື: ປົກປັກຮັກສາເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນຂອງປະເທດຊາດ, ປົກປັກຮັກສາລະບອບສັງຄົມນິຍົມ, ປົກປັກຮັກສາໝາກຜົນແຫ່ງການປະຕິວັດ, ຮັກສາສະຖຽນລະພາບດ້ານການເມືອງ, ສະພາບແວດລ້ອມສັນຕິພາບເພື່ອພັດທະນາປະເທດຊາດ. ທ່ານເລຂາທິການໃຫຍ່ ຫງວຽນຟູ໋ຈ້ອງ ເນັ້ນໜັກວ່າ:
“ຄວນສືບຕໍ່ສ້າງກອງທັບໃຫ້ໝັ້ນຄົງ, ເຂັ້ມແຂງທາງດ້ານການເມືອງ, ແນວຄິດ ແລະ ການຈັດຕັ້ງ, ຈົ່ງຮັກພັກດີກັບພາລະກິດປະຕິວັດຂອງພັກ, ຂອງປະຊາຊົນ, ມີເຈດຈຳນົງກຽມພ້ອມຕໍ່ສູ້ ແລະ ໄຊຊະນະ, ມີຄຸນນະທາດດ້ານການເມືອງຢ່າງໝັ້ນຄົງ, ຍົກສູງສະຕິ ແລະ ຄວາມຮັບຜິດຊອບໃນໜ້າທີ່ວຽກງານທີ່ໄດ້ຮັບມອບໝາຍ”
ທ່ານເລຂາທິການໃຫຍ່ ຫງວຽນຟູ໋ຈ້ອງ ປາດຖະໜາວ່າກອງທັບຈະສືບຕໍ່ໃກ້ຊິດຕິດແທດກັບປະຊາຊົນຢ່າງແໜ້ນແຟ້ນ, ສຸດຈິດສຸດໃຈເພື່ອປະຊາຊົນ, ທັງຕໍ່ສູ້,ທັງປະຕິບັດງານຢ່າງແທ້ຈິງ.
“ສືບຕໍ່ປະຕິບັດໜ້າທີ່ຂອງກອງທັບ, ປະຕິບັດງານເປັນຢ່າງດີ, ຍູ້ແຮງວຽກງານຂົນຂວາຍປະຊາຊົນ, ເປັນເຈົ້າການສົມທົບກັບຄະນະພັກ, ອຳນາດການປົກຄອງ, ບັນດາອົງການການເມືອງສັງຄົມ, ເຂົ້າຮ່ວມການກໍ່ສ້າງອົງການການເມືອງຢູ່ທ້ອງຖີ່ນຢ່າງໝັ້ນຄົງ ແລະ ເຂັ້ມແຂງ, ປະຕິບັດບັນດາລາຍການພັດທະນາເສດຖະກິດ, ສັງຄົມເປັນຢ່າງດີ, ຊ່ວຍເຫຼືອປະຊາຊົນພັດທະນາການຜະລິດ, ລົບລ້າງຄວາມອຶດຫິວຫລຸດຜ່ອນຄວາມທຸກຍາກ, ຍົກສູງຊີວິດດ້ານວັດຖຸ ແລະ ຈິດໃຈ. . . ກອງທັບຕ້ອງແມ່ນກຳລັງຫຼັກແຫຼ່ງໃນການປ້ອງກັນ, ຕ້ານ, ແກ້ໄຂຜົນຮ້າຍຢ້ອນຫຼັງຈາກໄພພິບັດທຳມະຊາດ, ກູ້ໄພ, ກູ້ຊີບ, ຖືນີ້ແມ່ນໜ້າຕົ້ນຕໍໃນໄລຍະສັນຕິພາບ.”.