ເລຂາທິການໃຫຍ່ເຈື່ອງຈີງ,ນັກທິດສະດີທີ່ດີເດັ່ນ,ການນຳປີຊາສາມາດ,ບຸກຄະລິກພາບໃຫຍ່ຂອງການປະຕິວັດຫວຽດນາມ
ພາບເອກະສານ
|
(vovworld) - ເນື່ອງໃນໂອກາດສະເຫຼີມສະຫຼອງ 110 ປີແຫ່ງວັນຄ້າຍວັນເກີດຂອງທ່ານເລຂາທິການໃຫຍ່ ເຈື່ອງຈີງ (9/2/1907 – 9/2/2017), ທ່ານປະທານປະເທດ ຫວຽດນາມ ເຈີ່ນດ້າຍກວາງ ມີບົດຂຽນທີ່ລົງພິມໃນໜ້າຫຼັກຂອງໜັງສືພິມ ກວນໂດ້ຍເຍີນເຢີນ (ສຽງຂອງກອງທັບປະຊາຊົນ ຫວຽດນາມ) ດ້ວຍຫົວຂໍ້ວ່າ “ທ່ານເລຂາທິການໃຫຍ່ ເຈື່ອງຈີງ - ນັກທິດສະດີທີ່ດີເດັ່ນ, ການນຳທີ່ປີຊາສາມາດ, ບຸກຄະລິກພາບໃຫຍ່ຂອງການປະຕິວັດ ຫວຽດນາມ”. ທ່ານປະທານປະເທດ ເຈີ່ນດ້າຍກວາງ ເນັ້ນໜັກວ່າ: ທ່ານເລຂາທິການໃຫຍ່ ເຈື່ອງຈີງ, ນັກກອມມູນິດຜູ້ອົງອາດກ້າຫານທີ່ເປັນແບບຢ່າງ, ນັກທິດສະດີທີ່ປິຊາສາມາດ, ການນຳຜູ້ດີເລີດ, ແມ່ນໜຶ່ງໃນບັນດາລູກສິດດີເດັ່ນ ແລະ ຜູ້ຮ່ວມງານທີ່ໃກ້ຊິດຂອງປະທານ ໂຮ່ຈີມິນ, ແບບຢ່າງກ່ຽວກັບລັກສະນະເປັນຫຼັກການ ແລະ ການຈັດຕັ້ງລະບຽບວິໄນ, ແມ່ນພຸມປັນຍາໃຫຍ່ຂອງການປະຕິວັດ ຫວຽດນາມ, ໄດ້ອຸທິດຕະຫຼອດຊີວິດຂອງຕົນໃຫ້ແກ່ພາລະກິດຕໍ່ສູ້ປົດປ່ອຍຊາດ, ໂຮມປະເທດຊາດເປັນເອກະພາບ, ສ້າງສາ ແລະ ປົກປັກຮັກສາປະເທດຊາດ. ເພີ່ມເຖິງແກ່ມໍລະນະກຳເມື່ອລວມອາຍຸ 81ປີ, 63 ປີເຄື່ອນໄຫວປະຕິວັດຢ່າງຕໍ່ເນື່ອງຂອງທ່ານແມ່ນຕິດພັນກັບໄລຍະທາງຕໍ່ສູ້ອັນທຸກຍາກລຳບາກທີ່ສຸດ. ແຕ່ກໍ່ເຕັມໄປດ້ວຍຄວາມເອກອ້າງທະນົງໃຈຂອງປະຊາຊົນ ຫວຽດນາມ. ທ່ານປະທານປະເທດ ເຈີ່ນດ້າຍກວາງ ເນັ້ນໜັກວ່າ: ເພື່ອສະເຫຼີມສະຫຼອງ 110 ປີແຫ່ງວັນຄ້າຍວັນເກີດຂອງທ່ານເລຂາທິການໃຫຍ່ ເຈື່ອງຈີງ ແມ່ນໂອກາດເພື່ອຫວນຄືນ, ອາໄລຫາ ແລະ ສະແດງຄວາມຮູ້ບຸນຄຸນຕໍ່ບັນດາຄຸນງາມຄວາມດີ, ການປະກອບສ່ວນຂອງເພີ່ນຕໍ່ການປະຕິວັດ ຫວຽດນາມ. ໃນສະພາບການໂລກ, ພາກພື້ນພວມມີການຜັນແປທີ່ສັບສົນ, ຊ້ອນແຝງບັນດາປັດໄຈຂາດສະຖຽນລະພາບ, ຍາກທີ່ຂາດຄະເນລ່ວງໜ້າໄດ້, ສະພາບການພາຍໃນປະເທດຍັງປະສົບກັບຄວາມຫຍຸ້ງຍາກ, ຮຽກຮ້ອງໃຫ້ທົ່ວພັກ, ທົ່ວປວງຊົນ ແລະ ທົ່ວກອງທັບ ຫວຽດນາມ ຍູ້ແຮງພາລະກິດປ່ຽນໃໝ່ຢ່າງຄົບຊຸດ, ຮອບດ້ານ, ຮັກສາຄວາມສາມັກຄີເປັນເອກະພາບ, ສືບຕໍ່ຍາດໄດ້ບັນດາຜົນງານອັນໃຫຍ່ຫຼວງກ່ວາອີກ, ເປີດໄລຍະພັດທະນາໃໝ່, ສະຫງ່າລາສີດີງາມຂອງປະເທດຊາດ, ກ້າວຂຶ້ນສັງຄົມນິຍົມຢ່າງໝັ້ນຄົງ.