ເລີ່ມປະຕິບັດໂຄງການ ເກັບກູ້ລູກລະເບີດ ຍັງບໍ່ທັນແຕກຢູ່ ແຂວງກວາງນາມ
ທ່ານ David Shear ເອກອັກຄະລັດຖະທູດອາເມລິກາປະຈຳຫວຽດນາມ ຮັບຊົມວັດຖຸລະເບີດ ຍັງບໍ່ທັນແຕກທີ່ພິທີເປີດໂຄງການ
(ພາບ: internet)
|
Vovworld- ວັນທີ 12/10, ຢູ່ຕາແສງ ບິງມິນ, ເມືອງທັງບີງ ແຂວງກວາງນາມ, ໄດ້ເລີ່ມປະຕິບັດໂຄງການຊອກຄົ້ນຫາ, ມ້າງຮື້ລູກລະເບີດ ແລະ ວັດຖຸລະເບີດ ຍັງບໍ່ທັນແຕກໃນບໍລິເວນແຂວງ. ນີ້ແມ່ນໂຄງການໂດຍລັດຖະບານອາເມລິກາອຸປະຖຳຜ່ານກຸ່ມໃຫ້ຄຳປຶກສາກ່ຽວກັບລູກລະເບີດ(MAG) , ແນໃສ່ເກັບກູ້ລູກລະເບີດ ແລະ ວັດຖຸລະເບີດຍັງບໍ່ທັນແຕກໃນບໍລິເວນແຂວງກວາງນາມ. ນັບແຕ່ເວລາເລີ່ມເຄື່ອນໄຫວໃນເດືອນ 7/2012, ກຸ່ມໃຫ້ຄຳປຶກສາກ່ຽວກັບລູກລະເບີດຢູ່ແຂວງກວາງນາມ ໄດ້ສົມທົບກັບອຳນາດການປົກຄອງທ້ອງຖິ່ນ ແລະ ບັນດາກົມກອງທະຫານທ້ອງຖິ່ນດຳເນີນການເຄື່ອນໄຫວຕີລາຄາຢູ່ເມືອງທັງບີງ, ແນໃສ່ກຳນົດບັນດາຈຸດທີ່ມີລູກລະເບີດ ແລະ ວັດຖຸລະເບີດຍັງບໍ່ທັນແຕກກໍ່ຜົນສະທ້ອນເຖິງວົງຄະນະຍາດ. ຕາມທ່ານ David Shear ເອກອັກຄະລັດຖະທູດອາເມລິກາປະຈຳຫວຽດນາມແລ້ວ, ນັບແຕ່ປີ 1989 ມາຮອດປະຈຸບັນ, ອາເມລິກາໄດ້ໃຫ້ການໜູນຊ່ວຍຫຼາຍສົມຄວນໃຫ້ແກ່ວຽກງານແກ້ໄຂບັນຫາລູກລະເບີດທີ່ຍັງບໍ່ທັນແຕກຢູ່ຫວຽດນາມ. ສະເພາະປີນີ້, ກະຊວງການຕ່າງປະເທດອາເມລິກາໄດ້ອຸປະຖຳເງິນກ່ວາ 4 ລ້ານ USD ໃຫ້ແກ່ບັນດາອົງການທີ່ບໍ່ຂຶ້ນກັບລັດຖະບານ ປະຕິບັດບັນດາໂຄງການໜູນຊ່ວຍທີ່ກ່ຽວຂ້ອງເຖິງການເກັບກູ້ລູກລະເບີດ ແລະ ວັດຖຸລະເບີດຍັງບໍ່ທັນແຕກຢູ່ຫວຽດນາມ.