(vovworld) - ຕອນເຊົ້າວັນທີ 8 ຕຸລາ, ຫໍມິດຕະພາບຫວຽດນາມ - ຈີນ ເລີ່ມລົງມືກໍ່ສ້າງຢູ່ຮ່າໂນ້ຍ ຢ່າງເປັນທາງການ, ດ້ວຍການເຂົ້າຮ່ວມຂອງທ່ານນາງຮອງລັດຖະມົນຕີການຕ່າງປະເທດຫວຽດນາມ ຫງວຽນເຟືອງງາ, ທ່ານເອກອັກຄະລັດຖະທູດຈີນ ປະຈຳຫວຽດນາມ ໂຄງຊວຽນເຢົາ, ທ່ານປະທານສະຫະພັນບັນດາອົງການມິດຕະພາບຫວຽດນາມ ຫວູຊວນຮົ່ງ, ຜູ້ຕາງໜ້າກະຊວງ, ຂະແໜງການຫວຽດນາມ ແລະ ຈີນ ພ້ອມກັບປະຊາຊົນນະຄອນຮ່າໂນ້ຍເປັນຈຳນວນຫຼວງຫຼາຍເຂົ້າຮ່ວມ. ນີ້ແມ່ນໜຶ່ງໃນບັນດາໂຄງການຮ່ວມມືມິດຕະພາບໃຫຍ່ກວ່າໝູ່ລະຫວ່າງ 2 ປະເທດ ໃນໄລຍະມໍ່ໆມານີ້, ເຊິ່ງໄດ້ຮັບຄວາມເອົາໃຈໃສ່ເປັນພິເສດຈາກການນຳພັກ, ລັດ 2 ປະເທດ.
ກ່າວຄຳເຫັນທີ່ພິທີ, ທ່ານປະທານສະຫະພັນບັນດາອົງການມິດຕະພາບຫວຽດນາມ ຫວູຊວນຮົ່ງ ເນັ້ນໜັກວ່າ ພາຍຫຼັງໄດ້ຮັບການກໍ່ສ້າງສຳເລັດ ແລະ ນຳເຂົ້າໃຊ້ການ, ຫໍມິດຕະພາບຫວຽດນາມ - ຈີນ ຈະເປັນສັນຍາລັກມິດຕະພາບທີ່ມີຊີວິດຂີວາ, ເປັນຂີດໝາຍຂອງການພົວພັນອັນດີງາມຂອງ 2 ປະເທດໃນໄລຍະໃໝ່ ແລະ ແມ່ນສະຖານທີ່ຢ້ຽມຢາມຂອງນັກທ່ອງທ່ຽວຈີນ ເມື່ອມາ ຮ່າໂນ້ຍ.
ສ່ວນທ່ານເອກອັກຄະລັດຖະທູດວິສາມັນ ຜູ້ມີອຳນາດເຕັມແຫ່ງ ສປ ຈີນ ປະຈຳຫວຽດນາມ ໂຄງຊວຽນເຢົາ ໃຫ້ຮູ້ວ່າ.
“ນ້ຳໃຈມິດຕະພາບລະຫວ່າງຈີນ ແລະ ຫວຽດນາມ ໂດຍອີ່ງໃສ່ປະຊາຊົນທຸກຊັ້ນວັນນະ. ມີພຽງປະຊາຊົນ 2 ປະເທດທີ່ມີນ້ຳໃຈມິດຕະພາບເຊິ່ງກັນ ແລະ ກັນ ຈຶ່ງສາມາດສ້າງເປັນສາຍພົວພັນມິດຕະພາບຈີນ - ຫວຽດນາມ ຢ່າງແທ້ຈິງໄດ້. ເລື່ອງກໍ່ສ້າງຫໍມິດຕະພາບຫວຽດນາມ - ຈີນ ແມ່ນແທດເໝາະກັບຄວາມຕ້ອງການພົບປະແລກປ່ຽນຂອງປະຊາຊົນ 2 ປະເທດ ແລະ ຈະກາຍເປັນສະຖານທີ່ພົບປະແລກປ່ຽນປະຊາຊົນລະຫວ່າງ 2 ປະເທດຜ່ານບັນດາການເຄື່ອນໄຫວມິດຕະພາບທີ່ເປັນຫຼາຍຮູບຫຼາຍແບບກ່ຽວກັບດ້ານຮູບແບບ ແລະ ອຸດົມສົມບູນດ້ານເນື້ອໃນ, ເພື່ອໃຫ້ສາຍພົວພັນມິດຕະພາບລະຫວ່າງຈີນ - ຫວຽດນາມ ນັບມື້ນັບເລີກເຊິ່ງ ແລະ ສະໜິດຕິດຜັນກວ່າ”.
ກິດຈະກຳນີ້ໄດ້ຮັບການກໍ່ສ້າງໃນບໍລິເວັນທີ່ມີເນື້ອທີ່ 3,3 ha, ດ້ວຍເນື້ອທີ່ກໍ່ສ້າງເກືອບ 14.000 ຕາລາງແມດ, ຍອດຈຳນວນເງິນລົງທຶນກໍ່ສ້າງກິດຈະກຳປະມານ 140 ລ້ານຢວນ, ໂດຍຈີນ ຊ່ວຍເຫຼືອລ້າ. ຄາດວ່າ, ກິດຈະກຳຈະໄດ້ຮັບການກໍ່ສ້າງສຳເລັດໃນຮອບເວລາ 20 ເດືອນ.