(vovworld) - ພິທີເລີ່ມລົງມືກໍ່ສ້າງໂຄງການ BOT ເສັ້ນທາງຫຼວງ 1A ຕອນຜ່ານບໍລິເວນແຂວງບິ່ງດິ້ງ ຖືກຈັດຂຶ້ນໃນວັນທີ 31/03, ຢູ່ແຂວງ ບິ່ງດິ້ງ. ກ່າວຄຳເຫັນຢູ່ທີ່ນີ້, ທ່ານຮອງນາຍົກລັດຖະມົນຕີຫວຽດນາມ ຫງວຽນຊວນຟຸກ ໄດ້ຕີລາຄາສູງຄວາມມານະພະຍາຍາມຂອງກະຊວງຄົມມະນາຄົມຂົງສົ່ງ ໃນການຜັນຂະຫຍາຍໂຄງການເປີດກວ້າງ, ຍົກລະດັບທາງຫຼວງ 1A, ສູ້ຊົນຮອດປີ 2016 ຈະສຳເລັດການເປີດກວ້າງ, ຍົກລະດັບທາງຫຼວງ 1A ຕອນຈາກ ລ້າງເຊີນ ຮອດນະຄອນເກີນເທີ. ທ່ານຮອງນາຍົກລັດຖະມົນຕີ ກໍຮຽກຮ້ອງໃຫ້ກະຊວງຄົມມະນາຄົມຂົງສົ່ງ, ການນຳແຂວງບິ່ງດິ້ງ, ຟຸ໋ອຽນ ແລະ ບັນດາເຈົ້າຜູ້ຮັບເໝົາກໍ່ສ້າງຕ້ອງຮັບປະກັນການສ້າງເຂດຕັ້ງຖິ່ນຖານຄົງທີ່ຄືນໃໝ່ໃຫ້ແກ່ປະຊາຊົນໃນເຂດບຸກເບີດໜ້າພຽງມີການດຳລົງຊີວິດເປັນປົກກະຕິ, ຮັບປະກັນມີຄຸນນະພາບ, ການປະຕິບັດກິດຈະການຖືກຕາມຈຸດເວລາຄືດັ່ງຄຳໝັນສັນຍາກັບລັດຖະບານ. ທ່ານ ຮອງນາຍົກລັດຖະມົນຕີ ຫງວຽນຊວນຟຸກ ກ່າວວ່າ.
“ຂ້າພະເຈົ້າຮຽກຮ້ອງໃຫ້ຫົວໜ່ວຍອອກແບບ, ໃຫ້ປຶກສາ, ຕິດຕາມກວດກາ ແລະ ພິເສດແມ່ນຫົວໜ່ວຍຈັດຕັ້ງປະຕິບັດການກໍ່ສ້າງຢ່າງມີວີທະຍາສາດ, ຫຼີກລ້ຽງສະພາບການລົດຕິດ, ອຸບັດຕິເຫດທາງຄົມມະນາຄົມໃນໄລຍະດຳເນີນການກໍ່ສ້າງ, ເພື່ອໃຫ້ກິດຈະກຳນີ້ເປັນແບບຢ່າງໃນການຈັດຕັ້ງປະຕິບັດ, ເປີດສະໜອງຖືກຕາມຈຸດເວລາຄືດັ່ງຄຳໝັ້ນສັນຍາ ເຊິ່ງບັນດາສະຫາຍໄດ້ປະກາດໃນມື້ນີ້. ພວກຂ້າພະເຈົ້າກໍຮຽກຮ້ອງໃຫ້ຄະນະກຳມະການປະຊາຊົນບັນດາແຂວງ ບິ່ງດິ້ງ, ຟຸ໋ອຽນ ສືບຕໍ່ຂົນຂວາຍປະຊາຊົນ ເພື່ອໃຫ້ປະຊາຊົນເຂົ້າໃຈແຜນນະໂຍບາຍທີ່ສຳຄັນນີ້ ແລະ ພິເສດແມ່ນການຈັດຕັ້ງປະຕິບັດການສ້າງເຂດຕັ້ງຖິ່ນຖານຄົງທີ່ຄືນໃໝ່ ຮັບປະກັນຊີວິດການເປັນຢູ່ໃຫ້ແກ່ປະຊາຊົນໃນເຂດບຸກເບີດໜ້າພຽງ”.
ໂຄງການ BOT ເປີດກວ້າງ, ຍົກລະດັບທາງຫຼວງ 1A ຈະໄດ້ຮັບການປະຕິບັດໃນໄລຍະເກືອບ 3 ປີ, ຄາດວ່າຮອດເດືອນ 12/2015 ຈະສຳເລັດການກໍ່ສ້າງ ແລະ ນຳເຂົ້າໃຊ້ການ.