(vovworld) - ຕອນເຊົ້າວັນທີ 26/06, ຢູ່ຮ່າໂນ້ຍ, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ອອກຄຳສັ່ງເລີ່ມລົງມືກໍ່ສ້າງໂຄງການພັດທະນາພື້ນໂຄງລ່າງເຂດອຸດສາຫະກຳເຕັກໂນໂລຊີສູງຮ່ວາຫຼາກ. ໂຄງການພັດທະນາພື້ນໂຄງລ່າງເຂດອຸດສາຫະກຳເຕັກໂນໂລຊີສູງຮ່ວາຫຼາກ ດ້ວຍຍອດເງິນລົງທຶນປະມານ 450 ລ້ານ USD ຈາກແຫຼ່ງທຶນໜູນຊ່ວຍພັດທະນາທາງການ (ODA) ຂອງຍີ່ປຸ່ນ ແລະ ທຶນສົມທົບຂອງຫວຽດນາມ. ກ່າວຄຳເຫັນທີ່ພິທີເລີ່ມລົງມືກໍ່ສ້າງ, ທ່ານນາຍົກລັດຖະມົນຕີ ຫງວຽນເຕີນຢຸງ ຊີ້ແຈ້ງວ່າ: ພັກ, ລັດ ໄດ້ກຳນົດວ່າ ວິທະຍາສາດເຕັກໂນໂລຊີ ພ້ອມກັບການສຶກສາບຳລຸງສ້າງ, ໂດຍສະເພາະແມ່ນບຳລຸງສ້າງແຫຼ່ງຊັບພະຍາກອນມະນຸດທີ່ມີຄຸນນະພາບສູງແມ່ນນະໂຍບາຍອັນດັບໜຶ່ງຂອງຊາດ, ແມ່ນໜຶ່ງໃນ 3 ຂອດບຸກທະລຸ ເພື່ອຍູ້ແຮງລະດັບຫັນເປັນອຸດສາຫະກຳ, ທັນສະໄໝ, ຖືວິທະຍາສາດເຕັກໂນໂລຊີແມ່ນກຳລັງໜູນ, ແມ່ນພື້ນຖານຂອງການພັດທະນາຢ່າງໄວ ແລະ ໝັ້ນຄົງ. ທ່ານນາຍົກລັດຖະມົນຕີ ຫງວຽນເຕີນຢຸງ ຊີ້ແຈ້ງວ່າ.
“ມື້ນີ້, ພວກເຮົາເລີ່ມລົງມືກໍ່ສ້າງໂຄງການພັດທະນາພື້ນໂຄງລ່າງເຂດອຸດສາຫະກຳເຕັກໂນໂລຊີສູງຮ່ວາຫຼາກຢ່າງຄົບຊຸດ. ນີ້ແມ່ນເງື່ອນໄຂສຳຄັນເພື່ອໃຫ້ເຂດອຸດສາຫະກຳເຕັກໂນໂລຊີສູງ ຮ່ວາຫຼາກ ພັດທະນາຢ່າງໄວ ແລະ ມີປະສິດທິຜົນກວ່າ. ອາດເວົ້າໄດ້ວ່າ, ຮອດຕົ້ນປີ 2018 ຈະນຳບັນດາກິດຈະກຳນີ້ເຂົ້າເຄື່ອນໄຫວ, ເວລານັ້ນເຂດອຸດສາຫະກຳເຕັກໂນໂລຊີສູງຮ່ວາຫຼາກ ຈະໂສມໜ້າໃໝ່, ມີເງື່ອນໄຂເພື່ອພັດທະນາຢ່າງກະໂດດຂັ້ນ”