(vovworld) – ທີ່ການຕອບສຳພາດຕໍ່ຊ່ອງໂທລະພາບ CNN ໃນຕອນເຊົ້າວັນທີ 29/05 (ຕາມເວລາຫວຽດນາມ), ທ່ານເອກອັກຄະລັດຖະທູດຫວຽດນາມ ປະຈຳອາເມລິກາ ຫງວຽນກ໋ວກເກື່ອງ ຢືນຢັນວ່າ ເລື່ອງຈີນ ນຳຮ້ານເຈາະນ້ຳມັນໄຮຢາງ 981 ແລະ ບັນດາກຳປັ່ນປ້ອງກັນເຂົ້າເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ ແມ່ນການລະເມີດອະທິປະໄຕ ແລະ ສິດອະທິປະໄຕຂອງຫວຽດນາມ, ລະເມີດກົດໝາຍສາກົນ, ສົນທິສັນຍາສະຫະປະຊາຊາດກ່ຽວກັບທະເລປີ 1982 ແລະ ບັນດາຄຳໝັ້ນສັນຍາຂອງການນຳຈີນ ກັບອາຊຽນ ເມື່ອຈີນໄດ້ລົງນາມໃນຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ປີ 2002. ການກະທຳດັ່ງກ່າວຊີ້ໃຫ້ເຫັນວ່າ ຈີນ ພວມຊອກຫາວິທີຫັນປ່ຽນເຂດທະເລບໍ່ຂັດແຍ້ງກັນເປັນເຂດທະເລຂັດແຍ້ງກັນ. ສິ່ງນີ້ແມ່ນບໍ່ສາມາດຮັບຮູ້ໄດ້.
ກ່ຽວກັບນະໂຍບາຍການຕ່າງປະເທດຂອງຫວຽດນາມ, ທ່ານເອກອັກຄະລັດຖະທູດ ຫງວຽນກ໋ວກເກື່ອງ ເນັ້ນໜັກວ່າ, ຍາມໃດ ຫວຽດນາມ ກໍ່ປະຕິບັດນະໂຍບາຍການຕ່າງປະເທດເອກະລາດ ແລະ ຢາກມີການພົວພັນທີ່ດີກັບຈີນ, ອາເມລິກາ ແລະ ບັນດາປະເທດອື່ນໆ ແຕ່ບໍ່ຮັບຮູ້ຕໍ່ການບັງຄັບ ຫຼື ນາບຂູ່. ທ່ານຢືນຢັນວ່າ ປະຊາຊົນຫວຽດນາມ ຕັດສິນໃຈປົກປັກຮັກສາອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຕົນ. ຊາວຫວຽດນາມ ບໍ່ວ່າອາໄສຢູ່ແຫ່ງໃດ ກໍ່ລ້ວນແຕ່ມີສະຕິທີ່ວ່າ ບໍ່ມີຫຍັງປະເສີດກວ່າເອກະລາດ ແລະ ຄວາມເສລີພາບ.