ເວທີປາໄສ “ປະຊາຄົມພັດທະນາພາກໃຕ້ທະວີບອາບຟຣີກາ”
(ພາບ: dangcongsan.vn)
(vovworld) – ເວທີປາໄສ “ປະຊາຄົມພັດທະນາພາກໃຕ້ທະວີບອາບຟຣີກາ” ໂດຍສະມາຄົມມິດຕະພາບຮ່ວມມື ຫວຽດນາມ - ອາບຟຣີກາ ສົມທົບກັບສະຖານທູດບັນດາປະເທດກຸ່ມປະຊາຄົມພັດທະນາພາກໃຕ້ທະວີບອາບຟຣີກາ (SADC) ປະຈຳ ຮ່າໂນ້ຍ ຈັດຕັ້ງໃນວັນທີ 17/8, ເນື່ອງໃນໂອກາດສະເຫຼີມສະຫຼອງ 36 ປີແຫ່ງວັນສ້າງຕັ້ງ SADC. ໃນຊຸມປີມໍ່ໆມານີ້, ການພົວພັນຮ່ວມມືກ່ຽວກັບເສດຖະກິດ, ການຄ້າ ແລະ ການລົງທຶນລະຫວ່າງ ຫວຽດນາມ ແລະ ບັນດາປະເທດ ອາບຟຣີກາ, ພິເສດແມ່ນບັນດາປະເທດຢູ່ພາກໃຕ້ ອາບຟຣີກາ, ນັບມື້ນັບໄດ້ຮັບຄວາມສົນໃຈ ແລະ ຍູ້ແຮງ. ບັນດາວິສາຫະກິດ ຫວຽດນາມ ໄດ້ ແລະ ພວມຮ່ວມມືຢ່າງມີປະສິດທິຜົນກັບຫຼາຍປະເທດຂຶ້ນກັບ SADC ໃນບາງຂົງເຂດຄື: ນ້ຳມັນອາຍແກຼັດ, ໂທລະຄົມ, ກະສິກຳ, ບໍ່ແຮ່… ວົງເງິນຄ້າຂາຍ 2 ສົ້ນລະຫວ່າງ ຫວຽດນາມ ແລະ ບັນດາປະເທດ SADC ຍັງຄົງຮັກສາໄດ້ທ່າເຕີບໂຕຢ່າງສະໝ່ຳສະເໝີ ແລະ ໝັ້ນຄົງ. ເຖິງຢ່າງໃດກໍ່ຕາມ, ບັນດາໝາກຜົນນີ້ບໍ່ທັນເໝາະສົມກັບຄວາມສາມາດບົ່ມຊ້ອນ ແລະ ຄວາມມຸ່ງຫວັງຂອງປະຊາຊົນ 2 ຝ່າຍເທື່ອ. ທີ່ການປຶກສາຫາລືໃນເວທີປາໄສ, ບັນດາຜູ້ແທນຖືວ່າບັນດາອົງການ, ວິສາຫະກິດ, ບຸກຄົນ ຫວຽດນາມ ແລະ SADC ສືບຕໍ່ເພີ່ມທະວີການຊອກຮູ້, ແລກປ່ຽນ, ກຳແໜ້ນຄວາມຕ້ອງການ ແລະ ຄວາມມຸ່ງຫວັງຂອງກັນ, ສືບຕໍ່ສົມທົບກັນໃນການສະເໜີຕໍ່ລັດຖະບານປະເທດຕ່າງໆແກ້ໄຂ້ສິ່ງທີ່ຍັງຄົງຄ້າງ, ສ້າງສະພາບແວດລ້ອມແຫ່ງການຮ່ວມມື, ລົງທຶນ ໃຫ້ນັບມື້ນັບສະດວກແກ່ບັນດາວິສາຫະກິດ. ອົງການການທູດຂອງບັນດາປະເທດ SADC ຕ້ອງເອົາໃຈໃສ່ສະໜອງຂ້ໍມູນຂ່າວກ່ຽວກັບກາລະໂອກາດ, ຄວາມສາມາດບົ່ມຊ້ອນຮ່ວມມືຢູ່ບັນດາປະເທດນັ້ນໃຫ້ແກ່ວິສາຫະກິດ ຫວຽດນາມ ຢ່າງທັນການ, ຄົບຖ້ວນ.