(ພາບປະກອບ)
(vovworld) – ຕອນເຊົ້າວັນທີ 4/9, ຢູ່ຮ່າໂນ້ຍ, ຄະນະເສດຖະກິດສູນກາງສົມທົບກັບສະຫະສະມາຄົມວິທະຍາສາດ ແລະ ເຕັກນິກ ຫວຽດນາມ ຈັດຕັ້ງເວທີປາໄສວິທະຍາສາດ “ເສດຖະກິດ ຫວຽດນາມ 2016 – 2020 - ການບຸກທະລຸພັດທະນາຈຳນວນໜຶ່ງ”. ເຂົ້າຮ່ວມເວທີປາໄສມີຜູ້ແທນເກືອບ 200 ຄົນທີ່ຕາງໜ້າໃຫ້ບັນດາກະຊວງ, ຄະນະ, ຂະແໜງການ, ທ້ອງຖິ່ນ, ຫົວໜ່ວຍຄົ້ນຄວ້າຕ່າງໆພ້ອມກັບບັນດານັກຊ່ຽວຊານ, ນັກວິທະຍາສາດ
ເກືອບ 5 ປີຜ່ານມາ, ພື້ນຖານເສດຖະກິດ ຫວຽດນາມ ໄດ້ຜ່ານຜາຄວາມຫຍຸ້ງຍາກ, ສິ່ງທ້າທາຍຫລາຍຢ່າງ, ຂອບຂະໜາດ ແລະ ກຳລັງບົ່ມຊ້ອນຖືກຍົກສູງຢ່າງຈະແຈ້ງ. ໂຄງປະກອບເສດຖະກິດສືບຕໍ່ຫັນປ່ຽນຕາມທິດຫັນເປັນອຸດສາຫະກຳ ແລະ ທັນສະໄໝເໝາະສົມກັບເງື່ອນໄຂເຊື່ອມໂຍງເຂົ້າກັບສາກົນຢ່າງເລິກເຊິ່ງ, ກ້ວາງຂວາງ…ເຖິງຢ່າງໃດກໍ່ຕາມ ຍັງມີຫລາຍຄາດໝາຍ, ໜ້າທີ່ ເຊິ່ງກອງປະຊຸມໃຫຍ່ ຊຸດທີ 11, ສຸນກາງ ແລະ ສະພາແຫ່ງຊາດ ໄດ້ວາງອອກຍັງບໍ່ທັນບັນລຸໄດ້ເທື່ອ. ທ່ານຮອງຫົວໜ້າຄະນະເສດຖະກິດສູນກາງ ດິງວັນເກືອງ ຖືວ່າ:
“ສ້າງການບຸກທະລຸໃນການຊຸກຍູ້ວິວັດການສ້າງໂຄງປະກອບຄືນໃໝ່, ແກ້ໄຂບັນດາສິ່ງທີ່ຍັງຄົງຄ້າງຂອງພື້ນຖານເສດຖະກິດ ເພື່ອແນໃສ່ຍູ້ແຮງການສ້າງໂຄງປະກອບພື້ນຖານເສດຖະກິດຄືນໃໝ່ຕິດພັນກັບການປ່ຽນໃໝ່ຮູບແບບເຕີບໂຕຕາມທິດຍົກສູງຄຸນນະພາບ, ປະສິດທິຜົນ ແລະ ກຳລັງແກ່ງແຍ້ງ, ຮັບປະກັນການພັດທະນາວ່ອງໄວ ແລະ ໝັ້ນຄົງ, ຍົກສູງລະດັບພັດທະນາ ແລະ ຄວາມສາມາດແກ່ງແຍ້ງຂອງບັນດາຂະແໜງ, ວິສາຫະກິດ, ຜະລິດຕະພັນ ແລະ ພື້ນຖານເສດຖະກິດ.”
ເພື່ອປັບປຸງສະພາບແວດລ້ອມແຫ່ງການດຳເນີນທຸລະກິດ ແລະ ຍົກສູງຄວາມສາມາດແກ່ງແຍ້ງແຫ່ງຊາດໃນໄລຍະຈະມາເຖິງ, ບັນດານັກປາຖະກະຖາສະເໜີວ່າ: ຕ້ອງມຸ່ງໄປເຖິງຮູບແບບເຕີບໂຕອີງໃສ່ສະມັດຕະພາບ ແລະ ປະສິດທິຜົນ, ມຸ່ງໄປເຖິງການພັດທະນາຢ່າງວ່ອງໄວ ແລະ ໝັ້ນຄົງ.