(vovworld) - ວັນທີ 25/03, ກະຊວງອຸດສາຫະກຳການຄ້າ, ສະຖານທູດຫວຽດນາມ ປະຈຳຝລັ່ງ ໄດ້ສົມທົບກັບສະພາສູງຝລັ່ງ ແລະ ອົງການສົ່ງເສີມດ້ານການຄ້າ ແລະ ການລົງທຶນຂອງຝລັ່ງ ຈັດຕັ້ງເວທີປາໄສວິສາຫະກິດ “ຫວຽດນາມ, ມັງກອນໃໝ່ຢູ່ອາຊີ” ພ້ອມກັບບັນດາກອງປະຊຸມໂຕະມົນລົງເລິກ ແລະ ລາຍການໂຄສະນາຜະລິດຕະພັນກະເສດຂອງຫວຽດນາມ ຢູ່ສະພາສູງຝລັ່ງ. ທ່ານ ຫວູຮຸຍຮ່ວາງ, ລັດຖະມົນຕີວ່າການກະຊວງອຸດສາຫະກຳການຄ້າຫວຽດນາມ ເປັນປະທານຮ່ວມ.
ດ້ວຍຫົວຂໍ້ວ່າ “ຫວຽດນາມ, ມັງກອນໃໝ່ຢູ່ອາຊີ”, ເວທີປາໄສໄດ້ສຸມໃສ່ເຂົ້າໃນ 2 ຂົງເຂດຕົ້ນຕໍແມ່ນ: ການຮ່ວມມືດ້ານອຸດສາຫະກຳເຊິ່ງຈຸດສຸມແມ່ນການຮ່ວມມືດ້ານພະລັງງານ ແລະ ສົ່ງເສີມການຄ້າ ບັນດາສິນຄ້າຜະລິດຕະພັນກະເສດຂອງຫວຽດນາມ, ພິເສດແມ່ນເຂົ້າສານ. ນີ້ແມ່ນຄັ້ງທຳອິດທີ່ເວທີປາໄສເສດຖະກິດກ່ຽວກັບຫວຽດນາມ ໄດ້ຮັບການຈັດຕັ້ງດ້ວຍຂອບຂະໜາດໃຫຍ່ຢູ່ສະພາສູງຝລັ່ງ. ທ່ານນາງ ຫງວຽນກີນແອງ, ທີ່ປຶກສາດ້ານການຄ້າສະຖານທູດຫວຽດນາມ ປະຈຳຝລັ່ງ ໃຫ້ຮູວ່າ.
“ການຈັດຕັ້ງບັນດາເຫດການຢູ່ຝລັ່ງ ຄັ້ງນີ້ແມ່ນບາດກ້າວຖັດຈາກບັນດາເຫດການໄດ້ຮັບການຈັດຕັ້ງຂຶ້ນລະຫວ່າງຫວຽດນາມ - ຝລັ່ງ ແລະ ບັນດາການເຄື່ອນໄຫວຮ່ວມລະຫວ່າງ 2 ປະເທດໃນປີ 2015. ເລື່ອງຈັດຕັ້ງບັນດາເຫດການຄັ້ງນີ້ແມ່ນເລີ່ມມາຈາກຄວາມຕ້ອງການຂອງວິສາຫະກິດທັງ 2 ຝ່າຍຫວຽດນາມ ແລະ ຝລັ່ງ, ເພື່ອແນໃສ່ແຈ້ງຂໍ້ມູນຂ່າວກ່ຽວກັບຄວາມສາມາດບົ່ມຊ້ອນຂອງຕະຫຼາດ, ຮີດຄອງປະເພນີດຳເນີນທຸລະກິດ, ເຮັດແນວໃດເພື່ອເປີດກວ້າງເຄືອຂ່າຍການເຊື່ອມຕໍ່ວິສາຫະກິດລະຫວ່າງຫວຽດນາມ ກັບຝລັ່ງ. ຕໍ່ຈາກນັ້ນພວກຂ້າພະເຈົ້າກໍລໍຖາວ່າ ຈະກຳນົດກາລະໂອກາດດຳເນີນທຸລະກິດໃໝ່ໂດຍສັນຍາຫວຽດນາມ ແລະ ອີຢູ ນຳມາໃຫ້.”
ໃນຂອບເຂດເຫດການນີ້, ການນຳ 2 ຝ່າຍກໍເປັນສັກຂີພິຍານພິທີລົງນາມໃນຂໍ້ຕົກລົງໜູນຊ່ວຍລະຫວ່າງກົມສົ່ງເສີມການຄ້າຫວຽດນາມ ແລະ ອົງການການຄ້າຝລັ່ງ.