(vovworld) – ວັນທີ 10/6, ຢູ່ສຳນັກງານລັດຖະບານ, ທ່ານຮອງນາຍົກລັດຖະມົນຕີ ຫວຽດນາມ ຫວູວັນນິງ ໄດ້ໃຫ້ການຕ້ອນຮັບຄະນະຕິດຕາມກວດກາເສດຖະກິດມະຫາພາກຂອງກອງທຶນເງິນຕາສາກົນ (IMF), ໂດຍທ່ານ John Nelmes ເປັນຫົວໜ້າຄະນະ, ພວມຢູ່ຢ້ຽມຢາມ ແລະ ເຮັດວຽກຢູ່ຫວຽດນາມ. ທີ່ການຕ້ອນຮັບ, ທ່ານຮອງນາຍົກລັດຖະມົນຕີ ຫວູວັນນິງ ຕີລາຄາສູງ ບັນດາການໜູນຊ່ວຍຂອງ IMF ທີ່ມີຕໍ່ຫວຽດນາມ ໃນໄລຍະຈະມາເຖິງ. ພິເສດ, ບັນດາຄຳເຫັນທີ່ປຶກສາໃນບັນດາຂົງເຂດເສດຖະກິດມະຫາພາກ, ການເງິນທີ່ລັດຖະບານ ຫວຽດນາມ ຖືເປັນສຳຄັນ ແລະ ນຳມາຄົ້ນຄ້ວາ, ໃນນັ້ນມີບ້ວງເງິນກູ້ຢືມບຸລິມະສິດໄດ້ປະກອບສ່ວນໜູນຊ່ວຍ ຫວຽດນາມ ພັດທະນາເສດຖະກິດ, ສັງຄົມ. ທ່ານຮອງນາຍົກລັດຖະມົນຕີ ຫວູວັນນີງ ຢືນຢັນວ່າ: ລັດຖະບານ ຫວຽດນາມ ຈະສືບຕໍ່ຢືດໝັ້ນຄວບຄຸມໄພເງິນເຟີ້, ຮັບປະກັນເສດຖະກິດມະຫາພາກເປັນປົກກະຕິ, ຊຸກຍູ້ການສ້າງໂຄງປະກອບພື້ນຖານເສດຖະກິດຄືນໃໝ່ຢ່າງແຮງ, ໄພເງິນເຟີ້ຫລຸດລົງພໍສົມຄວນ, ການເຕີບໂຕຢູ່ໃນລະດັບເໝາະສົມ, ການສະສົມເງິນຕາຕ່າງປະເທດເພີ່ມຂຶ້ນ... ທ່ານ John Nelmes ປາດຖະໜາຢາກເພີ່ມທະວີການຮ່ວມມືໃນການໜູນຊ່ວຍດ້ານເຕັກນິກ, ແລກປ່ຽນບົດຮຽນກັບບັນດາກະຊວງ, ຂະແໜງຕ່າງໆຂອງຫວຽດນາມ ໃນໄລຍະຈະມາເຖິງ.