(vovworld) - ວັນທີ 21/6, ແມ່ນວັນສື່ມວນຊົນປະຕິວັດຫວຽດນາມຄົບຮອບ 90 ປີ (21/6/1925-21/6/2015). ເນື່ອງໃນໂອກາດນີ້, ທ່ານ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ໋ຈ້ອງ ໄດ້ມີບົດຂຽນດ້ວຍຫົວຂໍ້ວ່າ:“ເສີມຂະຫຍາຍບົດບາດຂອງສື່ມວນຊົນໃນພາລະກິດປ່ຽນໃໝ່, ສ້າງສາ ແລະ ປົກປັກຮັກສາປະເທດຊາດ“ ໃນນັ້ນທ່ານເລຂາທິການໃຫຍ່ ໄດ້ເຕື້ອງເຖິງບົດບາດຂອງສື່ມວນຊົນ, ທ່ານຢືນຢັນວ່າ, ຊື່ມວນຊົນປະຕິວັດແມ່ນອາວຸດທີ່ແຫຼມຄົມເພື່ອຊຸກຍູ້ສັງຄົມກ້າວຂຶ້ນຢ່າງບໍ່ຢຸດຢັ້ງ. 90 ປີຜ່ານມາ, ພື້ນຖານສື່ມວນຊົນປະຕິວັດຫວຽດນາມ ໂດຍປະທານ ໂຮ່ຈີມິນກໍ່ຕັ້ງ ແລະ ນຳພາ, ຍາມໃດກໍ່ຮ່ວມເດີນທາງພ້ອມກັບໄລຍະທາງຕໍ່ສູ້ຢ່າງກ້າຄົງອົງອາດຂອງພັກກອມມູນິດຫວຽດນາມ, ປະຊາຊົນຫວຽດນາມ, ເພື່ອເອກະລາດແຫ່ງຊາດ, ລັດທິສັງຄົມນິຍົມ. ກ້າວເຂົ້າສູ່ໄລຍະປ່ຽນໃໝ່, ໃນເກືອບ 30 ປີຜ່ານມາ, ສື່ມວນຊົນບັນລຸໄດ້ຜົນງານທີ່ສຳຄັນຫຼາຍຢ່າງ. ບັນດານັກຂ່າວຍາມໃດກໍ່ໃກ້ຊິດຕິດແທດກັບພຶດຕິກຳຕົວຈິງຢ່າງມີຊີວິດຊີວາ; ຍ້ອງຍໍແບບຢ່າງທີ່ດີເດັ່ນ; ເປັນເຈົ້າການຕໍ່ສູ້ຕ້ານບັນດາປະກົດການທີ່ຫຍໍ້ທໍ້; ຕໍ່ສູ້ປົກປັກຮັກສາອະທິປະໄຕອັນສັກກະລະບູຊາຂອງປະເທດຊາດ. ສື່ມວນຊົນໄດ້ປະກອບສ່ວນຢ່າງຫຼວງຫຼາຍເຂົ້າໃນການເປີດກວ້າງການພົວພັນກັບຕ່າງປະເທດ; ປະກອບສ່ວນຢ່າງຕັ້ງໜ້າເຂົ້າໃນການໂຄສະນາ, ແນະນຳປະເທດຊາດ, ປະຊາຊົນ, ວັດທະນະທຳຫວຽດນາມເຖິງເພື່ອນມິດສາກົນ.
ປະຈຸບັນ, ທົ່ວປະເທດມີ 849 ອົງການສື່ສິ່ງພິມ, 67 ສະຖານີວິທະຍຸກະຈາຍສຽງ - ໂທລະພາບ, 98 ໜັງສືພິມ, ວາລະສານສື່ເອເລກໂຕນິກ, ສຳນັກຂ່າວສານແຫ່ງຊາດ 1 ແຫ່ງ. ປີ 2009 ຜູ້ທີ່ເຮັດວຽກງານສື່ມວນຊົນມີ 31.000 ຄົນ, ປະຈຸບັນໄດ້ມີ 35.000 ຄົນ. ທ່ານເລຂາທິການໃຫຍ່ ຫງວຽນຟູ໋ຈ້ອງ ຮຽກຮ້ອງຜູ້ທີ່ເຮັກວຽກງານສື່ມວນຊົນຕ້ອງຫຼໍ່ຫຼອມ, ຍົກສູງຄວາມຮູ້ດ້ານການເມືອງ, ລະດັບວິຊາສະເພາະ, ພິເສດແມ່ນຈັນຍາບັນນັກຂ່າວຢ່າງບໍ່ຢຸດຢັ້ງ. ນັກຂ່າວປະຕິວັດຕ້ອງມີຄຸນນະທາດປະຕິວັດ, ຮັກສາບົດບາດທິດທາງສື່ສານ, ພ້ອມທັງຕອບສະໜອງສິດສື່ສານຂອງປະຊາຊົນທຸກຊັ້ນວັນນະໃຫ້ດີທີ່ສຸດ.
ທ່ານເລຂາທິການໃຫຍ່ ຫງວຽນຟູ໋ຈ້ອງ ສະເໜີບັນດາອົງການສື່ມວນຊົນ, ຄຸ້ມຄອງສື່ມວນຊົນຍົກສູງຄຸນນະພາບວຽກງານເປັນເສນາທິການ, ວາງແຜນນະໂຍບາຍ, ແນວທາງພັດທະນາ ແລະ ຄຸ້ມຄອງສື່ມວນຊົນ. ບັນດາອົງການຄຸ້ມຄອງສື່ມວນຊົນຄວນເພີ່ມທະວີວຽກງານຄຸ້ມຄອງ, ແຕ່ກໍ່ຕ້ອງເປີດອົກເປີດໃຈກວ່າໃນການສະໜອງຂໍ້ມູນ, ສ້າງເງື່ອນໄຂສະດວກໃຫ້ແກ່ການເຄື່ອນໄຫວສື່ມວນຊົນ; ລົງທຶນໃຫ້ແກ່ການພັດທະນາສື່ມວນຊົນຕາມທິດທັນສະໄໝ.
ທ່ານເລຂາທິການໃຫຍ່ ຫງວຽນຟູ໋ຈ້ອງ ສະເໜີບັນດາອົງການສື່ມວນຊົນສຸມໃສ່ໂຄສະນາປຸກລະດົມບັນດາຂະບວນການແຂ່ງຂັນ, ຈັດຕັ້ງເພື່ອໃຫ້ປະຊາຊົນທຸກຊັ້ນວັນນະປະກອບຄວາມເຫັນໃສ່ຮ່າງເອກະສານກອງປະຊຸມໃຫຍ່ພັກທົ່ວປະເທດຄັ້ງທີ 12. ນີ້ກໍ່ແມ່ນໂອກາດເພື່ອຢືນຢັນທັດສະນະສະເໝີຕົ້ນສະເໝີປາຍ, ແນວທາງປ່ຽນໃໝ່ຂອງພັກ, ເດັດດຽວຕໍ່ສູ້ຕ້ານບັນດາຖ້ອຍທຳນອງເສກສັນປັ້ນແຕ່ງຂອງບັນດາອິດທິກຳລັງທີ່ເປັນປໍລະປັກ, ທີ່ສວຍໃຊ້ສິດເສລີ, ປະຊາທິປະໄຕ, ທວງໃຫ້ມີຫຼາຍພັກ. ສື່ມວນຊົນຕ້ອງນຳໜ້າໃນແນວຮົບດ້ານແນວຄິດ, ເປີດເຜີຍກົນອຸບາຍຂອງບັນດາອິດທິກຳລັງທີ່ເປັນປໍລະປັກ, ປັບປຸງຄວາມເຊື່ອໝັ້ນຂອງປະຊາຊົນຕໍ່ພັກ, ລັດ ແລະ ລະບອບ.